وزارة الذكاء الاصطناعي

حسين علي الحمداني

الحوار المتمدن-العدد: 8861 - 2026 / 10 / 17 - 13:17
المحور: كتابات ساخرة
    

علماء الذكاء الصناعي بالعراق استبشروا خيراً من سمعوا راح يسوولهم وزارة الهم، وهذا يدلل على اهمية الذكاء الصناعي بحياة العراقيين.

العراقيين اللي لحد هسه مدارسهم تعاني من نقص الكتب المنهجية، وتكدس التلاميذ بالصفوف، وغياب المختبرات ووسائل التعليم، وانقطاع الكهرباء أغلب ساعات الدوام، وتعطيل المدارس بسبب زخة مطر، حتى وإن مطر صيف ما يبلل اليمشون.

لكن الحمد لله، اجه الحل. صار عدنا وزارة للذكاء الصناعي، وفيها وكلاء وزير ومديريات مرتبطة بيها ومكاتب وحمايات وتخصيصات مالية، واكيد ايفادات، لان مؤتمرات الذكاء الصناعي هواي.

وهسه راح تشوفون فوائدها:

الذكاء الصناعي راح يحسن مفردات الحصة التموينية. بعد ما جان تمن وعدس ودهن، هسه راح يصير تمن ذكي، يطبخ روحه بروحه، وعدس يفهم مشاكل المواطن.

الذكاء الصناعي راح يبلط الشوارع. بدل ما المقاول يبوك نص التبليط، راح نجيب روبوت يبلط، والروبوت ما يبوك، بس الوزير مالته يبوك.

الذكاء الصناعي راح يسوي ادامة للمجاري. مجارينا صارلها 40 سنة ما متنظفة، هسه الذكاء الصناعي راح ينزل للمجاري ويكتشف وين الانسداد، ويكتشف ان الانسداد بالوزارة نفسها.

والأهم، الذكاء الصناعي راح يحد من ارتفاع الأسعار. من يرتفع سعر الطماطة، الوزارة راح تدز روبوت يتفاهم ويا أبو العلاكة، ويقنعه ينزل السعر، واذا ما اقتنع، الروبوت راح يشتري الطماطة كلها ويخزنها بالثلاجة الذكية.

أحدهم سألني: وين مكان الوزارة؟

قلت له: يمكن راح تداوم دوام مزدوج ويا وزارة السياحة، الأحد والاثنين صباحي، وباقي الأيام ظهري، وينعكس الدوام بالسنة الجاية.

الصباح ذكاء صناعي يفكر شلون يحل مشكلة الحصة، والعصر سياحة تفكر وين تودي السائح، والسائح الوحيد عدنا هو المواطن العراقي التايه بين الحصة والمجاري.

صدك، دولة تريد تطب للعالم المتقدم من شباك الذكاء الصناعي، وهي بعدها ما داخلة للعالم النامي من باب توفير كتاب مدرسي.

#حسين_علي_الحمداني (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل