حكايات شعبية من مدينة يثرب (40)

حسين سليم
(Hussain Saleem)

الحوار المتمدن-العدد: 8819 - 2026 / 9 / 5 - 18:15
المحور: الادب والفن
    

هاي وين .. ذيچ وين!

وقع حدثان في الأسبوع الماضي يثيران الدهشة، يتشابهان في الشكل والتزامن، ويختلفان في المضمون. الأول احتجاج قوى التيار الديمقراطي وجماهيره ضد الفساد والمحاصصة، قرب وزارة التخطيط، والثاني مظاهرات على "العرگ" في إحدى ضواحي مدينتنا "يثرب". ومقاربة للحدثين وغيرها في الشارع كان اتحاد الأدباء يعقد "مؤتمر الشعر و النقد في نصف قرن".
أردف (أبو مواطن):
- هي النّاس غير من ضيمها تروح على العرگ!
- ذاك اليوم المسا اشتهيت لبلبي، اكو واحد عنده عربانة يبيع لبلبي، يوگف بعربانته يم التقاطع. يضيف لكاسة اللبلبي أربعة فصوص ثوم مع دبس الرمان، أو فليفلة حارة ونوع أو أكثر من البهارات حسب الطلب. راح واحد منا، گتله: دجيبلنا كاستين من هذا ابو اللبلبي. بعد شوية رجع صاحبي خالي الوفاض؛ يگول أبو اللبلبي: هو السيد هسة يريد لبلبي؟ دائمًا يجي بالوقت الضايع، العرگجية خلصوه للجدر حتى الباجلة هم خلصت.
- هههههه حتى أبو سلام - أبو الكباب يگول: أنه افتح المطعم الساعة ثنتين الظهر وأبقى للصبح، شغلي على العرگچية.
- كلّ خلق الله بالعالم تشرب خمر على مود تفرفش وترتاح بس احنا العراقيين نشرب علمود ننسى الهموم والأحزان، لا والنوب انثيرها وانكوم نبچي، ومن يريدون يسمعون أغاني يحطون ياس خضر.
- يمعود واحد يگلي: عمي خليها على العرگ، عل المعسل،على الجگاير، ولا المخدرات، هاي نعلت سلف سالفنا، مزگت الشباب والمجتمع. هسة گلي شنو الربط بين المظاهرتين الي تفضلت بيها بداية حديثك؟
- الأولى احتجاج على وضع المحاصصة والفساد، وكل ما يجري في البلد والمجتمع من أزمات، هي السبب. والثانية هي نتاج المحاصصة والفساد أيضًا. هذولة هسة لو طالعين على المخدرات أهون!
- يعني عفتو كلّ المشاكل والأزمات؛ المستشفيات الأدوية، الكهرباء والمولدات، الماء، الرشاوي، المعامل وبيعها، الزراعة وتدهورها، السلاح، الدواجن، السكن، البانزين، المخدرات، البطالة والانتحار وغيرها، وچلبتوا بالعرگ؟! صدگ أبو المثل ما خله شي ما گاله؛ (عرب وين طنبورة وين).
- هذا المثل مالك يذكرني بسالفة قريبة منه، منقولة بحسب الرواة، عن مثقف أو أديب، چان راجع للبيت ويه حلة الدوام بالمصلحة أم الطابقين رقم 55 لمدينة الثورة. المصلحة مقبطة، صايرة حنة، هو گاعد بالطابق العلوي وگاعد بصفه عامل على رأسه غترة لافها. المثقف ضرط، ومن إحراجه بدأ يسوي بحذائه حركة يحكّ وحدة بوحدة بلكت يطلع صوت مثل الضرطة. العامل انتبه عليه وگاله: عمي هاي وين .. ذيچ وين!

#حسين_سليم (هاشتاغ)       Hussain_Saleem#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل