دعم فني

هيثم ضمره

الحوار المتمدن-العدد: 8813 - 2026 / 8 / 30 - 15:51
المحور: كتابات ساخرة
    

من كتاب «الحلم الكندي»

«الحلم الكندي» كتاب ساخر للكاتب هيثم ضمره عن تجربة الهجرة والحياة اليومية في كندا، يروي تفاصيلها الصغيرة بعين مهاجر يحاول أن يفهم بلدًا جديدًا… بينما يكتشف، شيئًا فشيئًا، أن البلد الجديد يعيد تشكيله هو أيضًا.

وهذا أحد مقالات الكتاب:

دعم فني

زمان، كان الواحد يتغرب عشرين أو ثلاثين سنة ويرجع.

يرجع معه هدايا، ومصاري حوّشها، وأغراض.

وطبعًا، كان يرجع معه أحيانًا عادات وتصرفات غريبة ما كنا نفهمها وقتها.

حركات يعملها بدون ما ينتبه.

طريقة يقعد فيها.

طريقة يحكي.

وأحيانًا أشياء ما إلها تفسير أصلًا.

تقعد مع واحد، تسأله:

— كيف كانت الغربة؟

— وِننن… وِنننن… والله كانت أيام صعبة.

— وإمتى رجعت؟

— وِننن… رجعت آخر التسعينات.

كل ما بده يحكي، بده نقرة سلف قبل ما يطلع الكلام.

وبعدين، من الحديث، تعرف إنه عاش عشرين سنة بألمانيا وكان يشتغل بالسيارات.

آآآه.

فهمت.

تقعد مع واحد ثاني.

إيده ما بتهدى.

يمسح التلفون.

يمسح الطاولة.

يمسح الكاسة.

حتى إيدك لو حطيتها على الطاولة، يمسحها.

وبعدين تعرف إنه كان عايش ببريطانيا.

واحد ثالث، حتى لو كان قاعد مع ختيار عمره تسعين سنة وما بعرف كلمة إنجليزي:

— Wassup يا حج؟

— How you doing?

وبعدين يكمل معه عربي عادي.

يشوف ولد:

— Good boy… good boy.

كل شوي كلمة إنجليزي.

قبل ما يحكيلك وين كان عايش، بتكون قاطعته وبلشت تسأل:

— كيف الواحد ياخد فيزا أمريكا؟
— في شغل؟
— قديش الرواتب؟
— بأي ولاية كنت؟

المهم «بأي ولاية؟» لازم تنسأل.

وفي ناس ما عرفنا شو صار معهم لليوم.

ولا لقينا تفسير للي كانوا يعملوه.

تقعد تحكي مع واحد، تلاقيه رافع راسه لفوق وفكه السفلي نازل.

وواحد رافع بنطلونه لشفايفه.

زمان كنا نشوف هاي الأشياء ونضحك.

بس اليوم أنا بصراحة بعتذر لهذاك الجيل عن كل ضحكة ضحكناها، وإحنا ما بنعرف الظروف اللي مرّوا فيها.

خصوصًا بعد ما تغربت.

بلشت أفهم.

لأنك بس تنتقل لبلد جديد، بتشوف ظواهر كثيرة ما عندك إلها تفسير.

وبعضها ممكن يكون…

حيوان.

آه، حيوان.

تخيل حالك وصلت كندا قبل أربعين سنة.

وبالليل تطلع، تلاقي حيوان أسود، عليه خط أبيض.

إنت أصلًا مش عارف شو هو.

ولا عارف الخط الأبيض هذا جزء منه…

أو كان واقف على كتف الطريق لما عبدوه.

وتوقف تتطلع عليه.

وهو ساكت.

ما بتحرك.

ما بصدر صوت.

وهذا اللي بحيرك أكثر.

بتصير تودي وتجيب.

شو هذا؟

ليش عليه خط؟

ليش ساكت؟

إحنا اليوم وضعنا أسهل.

أنا إذا واجهت إشي مش فاهمه، بسأل مايكل.

ما عرف؟

Google.

ما لقيت؟

الذكاء الاصطناعي موجود.

ما عرفت اسم الإشي، بوصفه.

ما عرفت أوصفه، بصوره.

وبثواني بعرف شو هو، من وين إجا، وين بعيش، شو بأكل، وليش عليه الخط الأبيض.

وحتى ليش كان واقف عند باب بيتك.

أما اللي تغرب قبل أربعين أو خمسين سنة، ما كان عنده دعم فني.

يشوف.

يستغرب.

ويكمل حياته.

وبعدين يرجع على البلد.

يمكن إحنا كنا نشوف آخر القصة بس.

نشوف الحركة اللي رجعت معه…

وما نعرف شو شاف قبلها.

وعشان هيك صرت أراقب حالي.

لأني أنا كمان كل يوم هون بتعود على أشياء بدون ما أنتبه.

ويمكن بعد عشرين سنة أرجع…

ويقعد واحد يتطلع عليّ ويقول:

شو ماله هذا؟

#هيثم_ضمره (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل