الصحاب يا رب.. نص بالعامية المصرية

مختار سعد شحاته

الحوار المتمدن-العدد: 7369 - 2022 / 9 / 12 - 17:38
المحور: الادب والفن
    

عارف يا رب، أنا لما أجيلك
هاشكيلك...
كمية الخذلان والرفض اللي على عيني...
مكتوب على جبيني!
الصحاب يا رب تحويشة العمر اللي فات، المصححين زي الجنيه الورق، فككهم العشم المضروب، والمبالغ فيه، لما بقوا ملاليم...
يا رب هل تعرف المليم؟
يمكن دي الحاجة الوحيدة من حاجات معرفتهاش يا رب، طول عمرك صحابك ولا غلطة...
دا نبي، ودا صاحب رسالة، ودا اصطفيته ولي، ودا موقوف على باب الرجا درويش، ودا كاتب...
صحيح مفيش صاحب م الصحاب إلا وكان في الخيال زي الجنيه الدهب، والدهب غالى...
يا رب, عمرك وقفت على باب صديق قلقان؟
طيب، عمر الصديق قال يستحق يعيش كما الإنسان، وأكون لصاحبي سبب من الأسباب؟
يا رب اتفككوا وحياتك ولا همهم مين فضل ورق، ومين أصله دهب، ومين بقى سحتوت...
يا رب صحابك على الدوام جدعان، وأنا الماسك على الصحبة كما الماسكة على المنديل، تسمح وجه المسيح في طريق الصلب!!
يا رب!!
أنا أب، بلا أب...
أنا المسؤول بفتح الباب على الآخر، ولا أتّاخر وأرد الباب ف وش صديق...
يا رب كما بتدعيك الست أم قلب طيب ف الصلاة وتقول: أنا خالتك أم الجبر!! متعرفنيش؟! وتدعي لك عشان تحمي ولادها من شر الوسواس الخناس، وتزود من قماشة ودّها الطيبة، وتقول خباص يوسوس في صدور الناس، من الجنة والناس...
يا رب لجل خاطر آدم اللي لسه ف الجنة مأكلش م التفاح، ولا داق دفا حليب الأم...
في صحابنا متخذلناش، ماهو للدرجة دي الصحاب همّ، وحملهم واعر، وإلا حبيبك النبي ما كان وصى وقال "لا تخذوني في أصحابي"!!
وحياة جمال النبي اللي لسه في علم الغيب ولا جاش، طفيت له نار فارس، ويوم العرض الصراط له بساط فارش...
يا رب ف صحابنا متخذلناش، ومتحشناش ولا تمنع حسن النوايا والإحسان...
يا رب صفيهم، وحبة الملاليم تخليهم، يمكن قلبي يعرف يجمدهم كما كانوا، ويرجعوا كاملين ف عنينا بعد النقص

#مختار_سعد_شحاته (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات