حكايات شعبية من مدينة يثرب (42)

حسين سليم
(Hussain Saleem)

الحوار المتمدن-العدد: 8851 - 2026 / 10 / 7 - 18:14
المحور: الادب والفن
    

الحمامة تأكل والمواطن يحاسب

حركة الأسواق في "يثرب" هذه الأيام مصابة بالركود، ويرافق هذا الركود غلاء وضريبة. والثالوث الليبرالي مرتبط ارتباطاً جدلياً بالفساد، والأخير - والعياذ بالله - مرتبط بالمحاصصة، والمحاصصة مرتبطة بخارج الحدود.

دخل زبون إلى المحل بعد فشل اليوم بالحصول على عمل. سحب نفس من خبطة معسل تفاحتين وعبس:
- هاي الخبطة مو مثل قبل. التفاحتين صاير مغشوش.
أجبته: هذا التفاحتين المصري، إله تاريخ. من چان أبوك يشرب چاي بالگهوة وهو موجود. من مصانع النخلة بالقاهرة لحد ما صار ماركة عالمية... بس سعره هسه صار نار.
قال: الأمور واصلة حدها والدولار گمز والله.
أردفت أمازحه: إذا واصلة حدها، بطل معسل واشرب عرگ أحسن، أرخصلك.
ضحك وقال: لا، آخذ المعسل وأخلي بيه عرگ بالشيشة، اثنين بواحد.
ضحكت وتسألت: وش راح يصير بيك من تسويها؟
هنا تدخل أبو الچاي، الي يشوف نفس الوجوه ونفس الحچي يومية، وگالها ببرود وهو يصب الاستكان:
يروح راساً لعالم البرزخ.
ضحكنا، وانفتح الباب ودخل أبو مواطن، وجهه تعبان ومغبر.
سلّم وقال: اليوم البلدية حارگة الشارع حرك.
- خير شكو؟
- ضريبة. رسوم مهنة وإعلان ونفايات. طبوا على المحلات محل محل. الزغير 600 الى 800 ألف، والمحلات الزينة من مليون لحد 3 و 4 ملايين. وصل وادفع، ماكو تفاهم يشمعون المحل.
قلت: رأيي نعمل لافتة أو رقة على كل محل نگول بيها؛ أُغلق المحل بسبب المبالغ العالية من قبل البلدية ولعدم وجود السلوك المهني في التعامل.
رد ابو الچاي: يابه ادفعوا وخلصونا.
أجبته: ترى ما نشتري منك چاي.
قال: لا يمعودين سووا إضراب.
واحد من الگاعدين جاوب:
- إيه، هذا لأنهم فلشوا السوگ. شالوا كل البسطيات، گالوا حتى نعمر السوگ ونبلط الشارع من جديد.
التفتُ مستغرباً:
- وعلاقتنا إحنا شنو وية السوگ؟ إحنا ندفع إيجارنا، شنو دخلنا بتعمير السوگ أو تبليط الشارع؟
رد أبو مواطن وهمس، مثل واحد يحچي بسر خطير:
- البلدية مخصصة 7 مليار - ما نعرف دينار لو دولار - لإعادة تأهيل السوگ وشارع السوگ. بس الفلوس... أكلتهن الحمامة.
انتبه الجميع له.
وهو يكمل:
- فهسه البلدية شنت حملة على المحلات حتى تلم الفلوس الي أكلتهن الحمامة.
أبو الچاي هز راسه وگال جملته الأخيرة قبل سكوت الجميع نهائياً:
في يثرب؛ الحمامة تأكل، والمواطن يحاسب.

#حسين_سليم (هاشتاغ)       Hussain_Saleem#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل