هلاوس على هامش الوكسة

أنطونيوس نبيل

الحوار المتمدن-العدد: 6693 - 2020 / 10 / 3 - 19:43
المحور: الادب والفن
    

مُهداة إلى روح: شادي حبش

1. مشهد من أوبرا مفقودة

رهاف (رسيتاتيف):

آدي الخَلْق أهي صابرة وكاتمة
دايخة بتزحف جوَّه العتمة
مدبوحة بسكاكينها التِلْمة

مصارين روحهم يمكن قايدة
بسّ هـ تنفخ ومافيش فايدة
مش راح تسمع منهم كِلْمة

حسين (طبقة الباريتون):

لو رعشةْ الخوف مِسْكِتَك
قُدَّام مخالبهم
إيَّاك تسيبها تسكِّتَك
صوتك هـ يغلبهم

نَسِّل شباشب غنوتك
فـ الليل على دماغهم
وإيَّاك تكشَّر: ضحكتك
تقدر تجيب داغهم

طهَّر لسانك م العطن
واهجُر خنادقهم
دُول كسَّروا ضلوع الوطن
بضهور بنادقهم

كورس (طبقة الكونترالتو):

عيِّل جبان.. تافه عبيط
بيقول كلام غامض
علشان يبان.. واعي وحويط
بيحبّ يتلامض

الحاكم بأمر الدرهم (طبقة الباص):

أنا من غيري هـ يبقى مصيركم
جنَّة سخيفة مخيفة تزهَّق
مافيهاش أيّ دراما تثيركم
مافيهاش غير عصافير بتنهَّق

حسين (طبقة الباريتون):

صمتك مِسلسل همِّتك
ضعفك مآزرهم
لو بسّ تنطق: كلمتك
تفضح مجازرهم

رابضة الوحوش على سِكتك
خوفك مِسمِّنْهُم
طمِّن بصوتك خطوتك
وإيّاك تخاف مِنْهُم

بالدندنة فـ وشّ الخطر
تهزم مشانقهم
مع إنها فـ حَلْقك مطر
دي مِنَشِّفة ريقهم

كورس (طبقة الميتزو سوبرانو):

برغوت نحيل.. ع الأرض لاح
دِمِّل يا دوب بارز
بيقول لفيل.. هاتلك سلاح
واطلعلي نتبارز


الحاكم بأمر الدرهم (طبقة الباص):

أنا بالعافية قبلتْ أَسودكم
سيبتْ لجامكو يوسَّخ كفِّي
أنا كرابيجي بتشوي جلودكم
علشان يابني تِبات متدفِّي


حسين (طبقة الباريتون):

زغزغ بصوتك عتمتك
تِقلب موازينهم
يترعبوا من نار بسمتك
تِركع زنازينهم

يأسك ضباب بيشتتك
اضحك وهزَّأهم
حَشْد الوحوش دا بنكتتك
تقدر تبعزقهم

صمتك أنين صابُه العفن
مزيكا فـ ودانهم
لا عمرُه كان خُرم فـ كفن
ولا سوسة فـ عيدانهم

كورس (طبقة الميتزو سوبرانو):

الشعب شاف.. فـ بحور قفاك
كَمْ مِنْ كفوف خاضت
وقت الهتاف.. لو ثار معاك
تبقى الأسود باضت

الحاكم بأمر الدرهم (طبقة الباص):

زيّ ناموس مهووس بيغلِّس
جابلي صداع مِن راسي اتمكِّن
يبقى ضروري يا شعب مفلِّس
تتصرَّفلي فـ طِن مُسكِّن

كورس (طبقة السوبرانو):

مين قالك ترغي وتتفلسف
سيبنا فـ حالنا بلاش تخوِتنا
أرجوك ياللا بسرعة اتأسف
شكلُه خلاص ناوي يموِّتنا

يرضيك يعني نموت علشانك
قَطْم رقبتك قَطْع لسانك
مش ناقصاك ولا ناقصة جنانك
شكلك أهطل مابتفهمش

رهاف (أريوسو):

صوتَك وحدُه اللي مكدَّرهم
ريحةْ صمت قلوبهم فاحت
آمنوا بإن العتمة قدرهم
وإن الشمس دي غُمَّة انزاحت

مانا قايلة لك كده م الأوِّل:
طول ما الليل مسعور ومطوِّل
تخرس خالص ماتبرطمش

كورس (طبقة السوبرانو):

لازمًا وِشَّك يبقى مبلِّم
مَكْوِي تمللي بنعل بيادة
إيَّاك تضحك أو تتألم
خلِّي ملامحَك دايمًا سادة

اعقل واعمل نفسك حيطة
تخَّن جلدك وبلاش زيطة
دا الليل فاجر مابيرحمش

2. فروض الطاعة

قدِّم يا ابني فروض الطاعة
واعلن إنك مابتفهمش
طبِّل ياللا بكل نطاعة
داللي يطبل مابيندمش

أوعى تقول أنا عندي كرامة
أوعى يا فالح تعمل دؤرُم
وقتها هـ نواجهك بصرامة
تيجي كلابنا فـ لحمك تُقُرم

نقدر يا ابني فـ لحظة نجيبك
لو كنت فـ قمقم متداري
بالكهربا نكشف ملاعيبك
وتقوَّق وماحدش داري

أوعى تقول ما اقبلش إهانة
طاطي وطنش وأوعى تخرَّف
واعرف إن الحقّ معانا
وإن الذلّ دا حاجة تشرَّف

مش غاويين يا حبيبي أذيَّة
قلبنا طاهر قوي وحنيِّن
بسّ تآمن بالحريَّة
تبقى عدو وكفرك بيِّن

إيه ذنبنا علشان تحرجنا
دا مافيش غيرنا عليك بيحِن
مِن رِقتنا تشوف كرابيجنا
نازلة بتبكي عليك وتئن

جالك قلب إزاي تناكفنا
نعل جِزمنا دا فوقك سقف
والدنيا دي هـ تمشي بكيفنا
مهما تهاتي يوماتي يا بأف

دا الكون غابة واحنا أسودها
وانتا وجودك مالهوش قيمة
بالدبابة الدنيا نسودها
صوتك يطلع تبقى جريمة

صوتك ريحتُه بارود وبجاحة
أمَّا تناحة وحاجة تِشِلّ
ما آدي الناس حواليك مرتاحة
وانتا لوحدك كًتلةْ غِلّ

بتشكك فـ عقول معصومة
يا ابني اتنيِّل بقى واتلمّ
دي المسألة واضحة ومحسومة:
أي كلام بنقولُه أهمّ

على مين جاي يا حلو تحوَّر
اعقل بقى واستهدى يا جحش
لأحسن م الكهربا هـ تنوَّر
اخرس خالص ماتبجَّحش

بعد ما نزهق من تعذيبك
ونصدَّع من كُتر عياطك
مِن رحمتنا هـ يبقى نصيبك
موتة تعالجك مِن إحباطك

3. بلاش بجاحة

مربوط فـ ساقية ومغميينك
وفـ كل خطوة كرباج يهينك
يمكن يكونوا مستهيفينك
عشان ضلوعك ع الجَلد صابرة

أطرش يا عيني والدنيا زفَّة
ضيَّعت عمرك فـ ألف لفَّة
وياريت بفايدة دي الأرض جافَّة
والساقية دايرة والعيشة غَبرة

وآدي الجبابرة سارقين منابك
مِن كلّ حاجة إلا اكتئابك

لو قُلت مرَّة: يادي المصيبة
عايشين فـ دايرة بتهدّ حيلنا
وآدي النتيجة أيام عصيبة
باين عليهم مستغفلينَّا

بوعود جميلة بيقرطسونا
ويغطَّسونا فـ بحور تعاسة
راكبين علينا هـ يفطَّسونا
دي دنيا ولَّا دا سوق نخاسة

لو قلت جوعنا وزاد جنانك
هـ يطفَّحونا شوربةْ لسانك

هـ يقولوا إنَّك عامل مؤامرة
تافه ومُدمن حشيش وخمرة
مُلحد ومؤمن بثورة حمرا
أكيد بجاحتك وراها إنَّ

نَقْص الرباية نبع احتجاجك
عايزها فوضى ماشية بمزاجك
بطَلقة واحدة هـ يكون علاجك
لو مانكتمتش وعيشت بينَّا

ذليل مطاطي راضي بآلامك
بلاش بجاحة واعرف مقامك

#أنطونيوس_نبيل (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل