سفينة بلا شراع

سعدي جبار مكلف

الحوار المتمدن-العدد: 4728 - 2015 / 2 / 22 - 23:06
المحور: الادب والفن
    

سفينه بلا شراع

آه من الأعماق إن شواطئ الصدق رائعه تنادينا ربما لا نصل أليها أذا لم نطلب الرحمة من الريح، كيف نعيش بلا شراع ...الموت ...المشانق ... الشهداء .. السجن ...الأمهات ..الأخوات... الذل بباب السجن ..في لحظة واحدة يمكن أن يمر العمر ويستمر السؤال لماذا...

گلنالك تحذرنا وراك الذيب
يا جبهة التكض سطوة حراميها
گلنالك تحذر ذوله همه إشباط
وبقصر النهاية أعلام تلگيها
يبو روح العزيزة وريحة الطيبين
شيفيد العتب لو ثار سرگيها
كل الناس ألك والهور حتى إدهوك
بس أشر نصب نيران تصليها
چم نجمة الهوت بالگاع وأنتة أتشوف
تدري أشباط الأسود هوة سابيها
بده الطاعون يحصد يلگط الزينين
وسفة أعله النشامة أيموت حاديها
يا سيد العفة أشلون تنسه إشباط
والعلگم شربته وعفت صافيها
يا ويلاخ ملچ الموت من ملگاه
أتغلس عن رفاقك هاي تاليها
مهرة أمسرجة ليلو وعگد الماس
گلي أشلون ترفض تركب أعليها
أكحيلة من تهدها أبريح ما تچفل
جناجلها ذهب لايگ أبرجليها
أحنا أهل الجسر والراضعين الطيب
تاليها أبحماية ذيب نرضيها
ما حسبت چم سجة القطار الموت
چم شمعة أنطفت أشلون تنسيها
ياجبهة وعهد ميثاق موت ودم
يا چلمة التوگف غدر ناويها
هذوله هم بشر ودگ معاهم ساس
ناوين أعله چتلك نار طفيها
وسفة وألف وسفة أخواني كلها أتموت
وأنته أسكوت صابك ما تسل بيها
ولا حتى الجفن باليل فز وصاح
ظل الموت يحصد كل معاليها
ياجبهة الگشرى ياخزي ياعار
يا بيرغ الذل بكل معانيها
يا ميثاق الأگشر دونوه أبدم
تعمه العين من نذكر أساميها
يا بيرغ الذل وتفگة الغدار
چم موت العصف برگاب واليها
زعاطيط الوكت والطوش والعاگول
أتوزع بالمنايا أبشور طاغيها
عرفناها المنايا أدگ على البيبان
دخل طاعونها گاصد تواليها
أصحه أقره التأريخ حگ الموت
سيوف الغدرتك گطع أياديها
أصحه والجبل حنة وكحل لعيون
كلها أبشوگ يا صايغ تراچيها
چم نجم التوسد شارة الطيبين
مامش زود لا غبشة التصد ليها
چم نشمي أنچتل نال الشهادة أبعز
وأنته السكتة ألك وصلت الواطيها
يا ميثاق يا جبهة التصد الروچ
فشگات الغدر حصدت بيابيها
يا ميثاق يا جبهة التصد طاعون
دظل أبغصتك بعدين تلگيها
مو شمتان وعيونك عتب سبعين
كسران الضلع شارة التزكيها
شعتب والعتب ما ظل بعد مستور
سفينة أبلا شراع الموج طاميها
مو شمتان بس أهروش تصرخ آه
تايه بالبحر چا وين چاليها
مو شمتان لا هي زوبعة فنجان
هي صرخة مناضل وگته چاويها
من اللفه مشى أبدربك يتاج الراس
ظل شدة أحزام ودومه شاريها
ما طخ راس وأيام السجن تشهد
بقى تأريخه أبيض سل أهاليها
عتابي وياك ما يخلص يبعد الروح
أهي عشرة عمر أشلون أنهيها
آهي-;- ثورة عتاب وصرخة البركان
لحد گطع النفس والغبشة نتنيها
مو شمتان وعيونك أعد أجروح
تدريني وفي بظلمة لياليها


14 / 2 / 2015
استراليا سيدني

#سعدي_جبار_مكلف (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل