الأبطال

سعدي جبار مكلف

الحوار المتمدن-العدد: 4366 - 2014 / 2 / 15 - 01:34
المحور: الادب والفن
    

لمناسبة يوم الشهيد الشيوع
الأبطــال

الشهداء الأبطال...... ستار خضيرالحيدر، كريم خلف الداخل، رعد عبد الجبار خماس، بشير زغيرحرز، نافع عبد الرزاق الحيدر، سعيد صبيح المناحي، مصطفى إشنيشل حسن، عبد المنعم فزع
أسمحوا لي ياسادتي الشهداء أن أتطيب بعطر البردي والقصب والچولان وألبس الرستة البيضاء الطاهرة النقية وأركع أمام ذكراكم السرمدية لأشعل بخور الطيبة والتضحية وأتشرف أن أحكي معكم لأنكم أطهر وأنقى وأكرم البشر...
لا أرثيكم لأنكم شمس لا تغيب....
يا ناس يا أهل الوفه
أهل المحنة والمحبة والعلم والمعرفة
آه يا ريحة هلي
الطرزت أرض الوطن
بعيون حلوة إموالفـة
طرزتها بالشباب وبالزلم
الماتت بأرض السواتـر
والشواطي والضفة
الماتت أبگوه عله أدروب الرعونة
الماتت أتغني عله درب النضال
وتنتظر يوم المحال
ساعه صاح الذيب بيها
لساتر الشرقية حصة
ويترس الطاعون چفـة
والشباب أطيح موت
وكلها هاذي موش كلفـة
نص شباب الوطن ماتت
الله وأكبر كلها صدفـة
ليش هذا الموت يحصد
خل نموت الموت گوة هذا حتفـة
نال ستار الشهادة
والشهادة أعظم شرف
طاح أبو مي العظيم
وصار للمجرم هدف
يا عمت عين الليالي
يا كحل مرود إعيوني
أحنه ندري علم عالي بالسلف
ما قبل صك المذلـة
ولا رضى أيعيش أبخنوع
وما رضى يعيش بترف
شلون يا بو مي حبيبي
أيسيل مايك من تحت
أتموت يا زين الرجال
وتحمل الرايـة العظيمة
وصرت للمجرم هدف
عيوني أنته يا كريم الداخل وشبل الخلف
الله يل چتلك كلف
الله يا ريحان يا نعناع
يا حسرة أبخطف
أشلون يكريم الخلف
إتحنوا بموت الترف
آخ ...آخ
وتدري أشچم آخ بيـة
عيوني تصرخ حيل وسفة
يل بعادك عمه أعيوني
العمة تالفهن تلف
يبـن عمي بيك تتغنة الشهادة
ونتة دومك گمر عالي
وأسمك يعادل ألف
خل يظل الشامت أيسولف شماتـة
وأنتـة أنتـة علم عالي
منهو أيلوح الكلف
خوية أسألك...جرحي جرحك
خوية لا تعتب على الباع الشرف
وقّع بيـدة براءة وأعترف
صار سالوفة أبسلف
أنتـه شيخ من الشيوخ
شنهي أخاف
للمنية أركض زحف
موش كل من نايه بيده
يغني موال بعزف
موش كل من نام گبرة
وسلموا ورقـة وفاتـه
وختموا الورقة بحرف
الموت موت العدل خـوية
موش للنام بكهف
عيوني أبو عادل بشير
شرد أوصفنك أحيـر
يا بشير إزغير أتعود الليالي
وأنتـه تدري چنا سرب أطيور شاية
ماهو حاط ولا هو طاير
وگليبك إگليب المحنة
آه ياگلب الچبيـر
آه يم عزب القاعة
قاعه ستة بالعمارة
وچنت شمعتنا التنيـر
چنت أشوفك گمر عالي
المارهم عندك يصيـر
أعذرني يا خويه بشيـر
نافع ونعمين نافع
يلي ذكرك نجم ساطع
وفي معروف الشهامة
صگر فوك العالي طالع
أيلوك ألك أسم الشهيد
أتلوك ألك شارة شهادة
ودمه حنة ودشتة دشت زلم
إموزر أبمزنة بطوله
يصيح ربعي أبزوده راجع
هيل طش أعله المرابع
من أذكرى أتشوغ روحي
لا يفائز لا تهيجها المواجع
الله ياشدة حزمنا
لا ينافع ...لا ينافع
ولك خوية يا سعيد
ياسعيد إمناحي عونك
شكتب أنا شنهو أريد
أيلوك ألك أسم الشهيد
سلمتها أبغير حسرة
حتى لو عدت الحياتك
هم ترد ألها جديد
أبنك أزغير تركتـه
ما عرفتـه
من بعادك ما لفانا يوم عيد
أبعيد سلوان أو وحيد
إهناك هوه بالسويد
يا حسافه أعيوني أنتـه گبر ماكـو
أسمك ألنا يظل نشيد
يا سعيد....يا سعيد
ونته يا منعم حبيبي
فراگك الربالي علة
يا نعيم أبد ما بطل نحيبي
شراع عالي
بيرغ أموزر عمامه
والجرح بيدك تشله
ما رضيت أتعيش ذلـة
رحت تنشد غنوة أبطال المشانق
ما تساوم...ما تساوم
لا أعتراف ولا براءة
لا حجاية أتمس صديق
خلي حبلي لا تفلـه
الموت أرحم من حياة الذل يخايب
أجرع السم ولا تسولف بالبراءة
أنطيني كاس الموت كله
سلمتها ما تخاف وما تخاف
غنوتك غنوة رجال
فدوه ذاك العمر ولاه
منهو مل من النضال منهو ولاه
أيه أبن خالي رعد
يا رعد وك خويه أبشـر
ذهب صافي أيهلهل وموزرك يكسر
يخسه الموت خوية أبشر
أبد ما رفت الشفة
شحلاتة الموت مو صدفة
شحلات الموت من يتوسد المطرة
وما ترضى بحجي الغبرة
تظل إتصيح ها شعبي
لسلام الگاصداً أثره
وماني حاير أبأمرة
شهيد وشارته الشذرة
أهي هيج الرجولة اتصير
نيشان الفشك صدره
سجلها عله صدره
ولك تاريخ لا ترحم
ندري كل شي أمگدره
أبن جبار لازج فشكتة أبعشرة
خذاك الموت يا نشمي
نطاها وما نطق سرة
هله مصطاف يا طير الگطة الطاير
هلة يا مصطفى إشنيشل
عليك الگلب ظل حاير
عله درب النضال أموزر وسايـر
غمها الروح لو ترجف
أحطها بالگبر ونشدها أشصايـر
مصطاف المهندس فدوة ألك عمري
أدري أبحالته أدري
أدري بيك يحبيب
نار أموجرة وتسري
وأنته العارف أبأمري
وهن عشرين خو عمري
ألك كل العمر منذور
يا آذار حيف الحيف ما تدري
شبعد عندي
أنا ميت والله گبلك
وچفني الحرف چفني
وأبيات القصيد أتصير أهي لحدي
ما متوا ...أشلون أيموت المدلل
إنجوم أمضوية وتضوي

#سعدي_جبار_مكلف (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل