النضال

سعدي جبار مكلف

الحوار المتمدن-العدد: 4345 - 2014 / 1 / 25 - 20:53
المحور: الادب والفن
    

لقد كثر النضال في شوارع المدن الاوربية
هنيئاً لهم النضال وستظل أسمائهم خالده في شوارعها
كما بقيت أسماء الأبطال على جدران السلمان والحلة والرمادي والعمارة
أطرن هورها أموزر
أطرن هورها ومحزم أبتفگه
أطرنها وحط محبس عرس موزر
وطرزها السنين أجروح
وخليها الجروف أتنوح
وخليها التفگ أنجوم
أسرد كل جرح ملموم
خل ينزف
خله أيحني المعلوم
خلي الليل أله غبشه
مضيف لدلة المهضوم
سوالف عشگ للمهموم
لابد تنقشع الغيوم
ربيع البردي والنفاش
يلاعبها شمال أجنوب
هلاهل عرس للمحبوب
طشن بالسلف زرات
زرات الزلم خطار
كل نشغه صداها نار
أخ العار
يا بيرغ شماته العار
طشو بالسلف زرات
حتى المات
جاي أمولم الچيلات
متوسد التراب وملتحف بالضيم
شي همه الورد فواح مو فواح
أفراشه الگصب
وغطاه رسن الخيل
ميهمه صبح غبشه
ميهمه ظلام الليل
يشم بارودة البرنو يگول الهيل
عد عيناك والله والمنايا سيل
عد عيناك من أنهد
عد عيناك من أنگوم
أنتوزر بالزعل ونگله حد أبحد
على أسفوح الجبال ويشهد النا أسهيل
عد موج الفرات أنصيح يا شعلان
وي صوت الموذن ننخه الرحمان
وي فكت العين وصرخة الآذان
أنطر الفجرمحراب يا أنسان
تعال وشوف يا شعلان
تعال وشوف أسراب الذياب أتحوف
ما تعرف خجل ما تعرف المعروف
أهم اذياب معطه تختفي بالصوف
أگول وداعتك منعوف
أشلون أنعوف هاي الگاع
جم طيب سبع ماتوا بسد الطوف
أبد مارفت الشفه
ولا لحظه لفاهم خوف
منين الخوف من الموت
شحلاته من يجي أيهلهل بلايا صوت
زود وفوت
أهي ثورة عواصف بس تهب بسكوت
عفاها الروح تتألم
سنه وسنتين تتحلم
نتحلم نشيل الرايه صبحيه
تتراكص مناجلنا على الزرعات يوميه
نغني الحمد جوبيه
صوت الناي يعزف غنوه شعبيه
تظل أنته هذاك أنته
نتناك الربيع الجاي
أذا جانا الربيع براي
كلها توگف وتتناك
أمعدل ذيچ حاضن هاي
أمعدل كل كتر بهداي
بس أنته رهم مفتاحك البابي
يا دشت حرثتي أو وسطة أشبابي
ديوان السلف يا زفة أحبابي
هدم أبيض نتنومس بيك
مسج وهيل حنه وياس أطيابي
ما ريد الشماته تصهل أبظهري
ولا بيرغ يشيله الحافي بالديوان
يمشي مشية الشجعان
أيتفاخر يگول أفلان
أنا أفلان....ياهو أفلان
أفرزنهن ألك أصفوف
أحطهن حرز بزنود الزلم
وأتمرغث أبفيه
أحطنهن على چفوفي خبز تنور
رفيف الريه عل الريه
يمته الكوصر يغني
واليمته نتني الربيه
يجلمات المحب محلات طاريه
وين أيروح وين أيچن
طير أمعلك ومذبوح
مدري شنهو تاليه
ماكو أشجار
اذا حتى النخل گلباته عاريه
وين أيحط وين أتروح يمذبل
أخاف من الجرف ينهدم جاليه
ونته أبليل نص الليل
تبقه أموزر الچلمات
منهو المات منهو الفات
هيعون اليشيل الراس والهامات
ويدگ أيده على صدره
يضوي أيواكح النجمات
يم أحسين ...يمه فدوى ال أسمه
يظل عند الشعب رسمه
مو بس ربعه تفخر بيه
روحوا حلفوا خصمه
يحسين الوفي يحسين
يحسين الشهم يحسين
وألله تسوه ماي العين
شهيد والشهاده أتلوگ الك يحسين
شهيد أمغسل أبدمه
معرس زفته أمه
غمكها الجروح حسين شي همه
شهيد الموت ما ضمه
ياهو ليجسر أيطمه
حضن چف المنايا وال لحد شمه
حتى الگبر مالمه
صبح گبره حجي الوادم
وما يخلص يظل أجيال
ما يخلص سنه وسنتين
يمه أحسين يمه أحسين
بعد شيبي يأبني الزين

#سعدي_جبار_مكلف (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات