ديوان شاعر البيت

مصطفى التركي
شاعر
(Mostafa Eltorky)

الحوار المتمدن-العدد: 8693 - 2026 / 4 / 30 - 01:34
المحور: الادب والفن
    

شاعر البيت




بعدما أصبتُ بالاكتئاب، فقدتُ تركيزي؛ خفتُ على شِعري، فكنت أحاول أن أقرأ أي شيء وأنا أرى السطر الواحد في الكتاب أربعة أسطر.
بكيت
لا لم أبكي
بل انتحبت
ظن أبي أني جننت
أختي دَمَعَتْ على آخر العنقود
أصدقائي تناثروا وتبعتروا ولم يبق منهم سوى القليل
هذه تجربتي المرة التي أريد حذفها
وهذا إهداء مر أود حذفه

فلترقد في سلام أخي محمد


إهداء إلى محمد عبد المنعم زهران







































التحول

كان ممكن أبقى زي ده
ديل جلابيتي دايب
وشي مِهَبِّبْ
عقلي بياخد القرار من غير ميزان
لولا ان ابويا خاف عليا
لولا ان أختي استحملت دمعي اللي يكوي
كنت اترميت.. ولا طاقني إنسان في المكان
الحكمة دي بنت الألم
زاد الألم زودني حكمة
والحكمة لما تزيد أسيطر ع الألم
واقف وحيد
لكن
لما ندهت
أخويا ضَللني
نوّر ما ضللني
إختارته واختارني
طيف في الهوا بيقدح شرار
يبقى جناح وابقى جناح
وماتعرفوش مين فينا طار
هادي ورزين
كان حلمي أبقى رزين وهادي
ووصلت للي انا عايزه عادي
ما يهمنيش الشوك في رجلي
ما يهزنيش الخوف في دمي
طول ما ربي معايا
هاذكر
وابتسم
هادي ورزين



اللي يبكي عليا أبكيله
دمعي يبقى سراجه قنديله
لو ندهت يجيني أشكيله
م اللي شوفته في الليالي الكحل
لا ما وما تطبطبش على كتفي
سيبني أغسل بالدموع الوحل
كنت فين يا ابن أمي الألم
بَك حبره ف دمي زي القلم
بكّى كل الناس عليا وإنت
شايف المدبوح وواقف صنم
مش هعاتبك مش هعاتبك لأ
يكفي إنك لما بابكي بتجري
تبني سد لدمع نازل يجري
قلبك الصادق أتاني لقيت
قلبي وقّع نفسه زي البيت
لما يبقى قديم يقول حنيت
للتراب اللي أنا من أصله
إبكي جنبي وسيبني أبكي عشان
الزمان والدنيا فيا يفاصلوا
يمكن أبقى كويس
يمكن أبقى تمام
إبكي جنبي وسيبني أبكي عشان
لما تبكي باحس إني كويس
والهدوء بيحل
والإنسان
















زي النبات: برفان زفيري أكسجين...


























الفقر مش بس الفلوس
الفقر عوزة واحتياج
محتاج وعايز روحها تلمسني أطير
؛
إنتي غنيّة
وحلوة جدًا
والغني يدّي الفقير















تقدري تصحيني م النوم أي وقت
علّي صوتِك
مش هَامانع
تاخدي قلبي
شوفي ده انا هدّيكي قلبي اللي فيه
اللي بتحاولي تدوقيه
كل ده وبشرط واحد
نبتدي ومافيش نهاية
يا ناموسة
دوقي مني طعم دمّي
بس خليكي معايا









الوحدة

في عز لون الضلمة الاسود
ظهرت قصادي الذكريات
إنت حميتني
لو إنت كنت أذيت
ف انا شايفك حميتني
وانتي جميلة
وذوق
لطيفة
حتى ولو كنتي ف حقيقتك مش كدا
ف انا شايفِك لطيفة
وانت معايا زي كشاف للطريق
إن كنت بتضللني
ف أنا عايز أشوفك زي كشاف للطريق
؛
خليكوا جنبي
دموعي نزلت م الآلام
والضغط
ومن الذكريات
إحموني منهم
الخيول بتدوس عليا وكنت فاكر إنهم اتهد حيلهم
إحموني منهم
سرب م الخفافيش عليا ومش عارف أزيلهم
إحموني منهم
وابعتولي إبتسامة
وكام فراشة
وزقزقة عصافير على شجر الربيع
في قلبي اشيلهم










مش كل ثانية تبعتيلي حمام يوصل لي رسايل
أنا قلبي أهو
و آدي إيديه
إيه ينفعِك مني خديه
عقلي؟ لساني؟ عينيا؟ روحي؟
روحي اسألي دكتور وحاولي تفهميه
أنا لما اكون مكتئب هحبك قد إيه؟













قصيدة حفظًا لماء الوجه

محاولة
للدخول في قلبي من تاني
شايفها وهي بتمثل
وبتقول إني وحداني
ضعيف جدًا عشان هي
قالتلي اني ضعيف جدًا
ومستنية أعيش العمر أندب حظي واترجى تسامحني
وشايفة إني م الإحباط بخاف لا حد يجرحني
حقيقي الجهل والتلفيق جُمال جدًا
لكن أجمل من الاتنين دموعها لما تلمحني
غروري يزيد مع الصعب اللي بانجز فيه
أنا المغرور عشان واقف لوحدي نبيه
ب افُك الخط واكتب بيه
وحيد علشان من الضلمة باشوف النور
ومحبط م اللي شوفته زمان
ومَشْتَل للأمل ب ارويه
أديني بحركة من إيدي
كتبتك كدب في الصفحة
ياريت لو فيه كلام تقوليه
تلاقي الدنيا بتضلّم
وتِلْقي طيفي بيقولّك
كلامك سهل أبني عليه















قالوا إثبت صدق حبك للظنون
قلت أنا المفتون على غصون العيون















هدوء وألفة
لما أداوي قلبي مين يداويني؟
لما النسيم بيطيّب ليه النسيم يكويني؟
ليه كل ما اخبيكي تطلعي من عيني؟
كنت الهدوء واللطف والحنية
كنت افرشلها من جلدي تمشي عليا
ليه أصحى ألقى إيديها مش في إيديا؟
إحنا ابتدينا عشان بخاف م الأوضة
إحنا التقينا وكنا نهر في روضة
ليه يبقى كل كلامي زي الموضة؟
وتغيّريني
جايز ما قولتش حاجة لكن
كان فيه هدوء بينك وبيني
مش معترض إنك مشيتي
لكن أقلُّه عرفيني




















بامشي كتير علشان تشوفي قلبي وانتي هناك
جيبتي منين القسوة تقفلي الشباك؟
















كان نفسي نبقى
خبّطت يا قلبي على بابها اتطردت
إهدى وسيبني أشوف هنعمل إيه
فكرة رجوعها مستحيلة
مش كل واحدة تكون جميلة
تداوي فيك
ولا كل بيت هتقوله ليها
يجيبها ليك
فوق منّها وإعرف إنها
مش هتناديك
لو هي ليها عيون تشوفك
لو ليها قلب
المغناطيس كان شدكوا
لو ليها صوت
كنتوا هتبقوا عصفورين بيغرّدوا
لو هي فعلًا الجميلة
كانت تشوفك الجميل
لكن مسافة كبيرة بينكوا
خلّتك تظهر قليل
وانت كبير عندي أنا
يا قلبي وماعنديش دليل
سيبها تطوف
تضحك لواحد زيها
وتصطنع الكسوف
وانت يا قلبي
اتدارى وابدأ في الخسوف






كوفيد-19 والباي بولر
.............................
لقّحت جسمي ينام على أسفلت أوضتي
وصحيت في ساعة
قبل ما شمس المرض تبقى عمودية
-فين السجاير؟ فين؟ وليه الأوضة هادية؟
إيه اللي حاصل؟ ليه الشوارع برضو هادية؟
يعني إيه؟ لازم امشي السكة دي وأجيب سجايري؟
ابن اخويا فين يجيبلي؟ خد وهات
عقلي شاط
إرتباط
قلبي حطوه احتياط
إيه اللي انا بقوله ده كله؟ جبت؟ هات.
بعد ما ولّعت واحدة
عرقي نازل نقطة نقطة
جسمي عمّال يترعش وبدأت اشوف
الخيال ويا الحقيقة بدون كسوف
المطر نازل ياخدني
المطر ده فيه كورونا
دي مؤامرة عالمية
يا ناس سيبونا
لأ ده وهم
لأ حقيقة
لو وصلكم أي حاجة كلمونا.
هو ده كاتب في بوست كلام يلقّح قصده مين؟
ده أكيد لازم قاصدني والكلام ناصبه كمين
إيه اللي جاب أمريكا بيتنا دخّلوها إزاي منين؟
لأ ده وهم
لأ حقيقة
عقلي ليه رجلين وماشي ونفسي أعرف ماشي فين؟
سيبوا قلبي
إنتوا بتشدّوه وعايزين تقتلوه
فين قزازة الميّه ارش الأرض؛ عاملين لي عَمَل
كلكم جعانين وناويين تاكلوا جسمي
بعدها تحلوا بفواكه طعم اسمي
-فوق لنفسك يا ابني فوق
=ده أنا فايق وفوق
-ليه بتضرب في الهوا رصاص الكلام
=كنت عايز أقول للناس بإني مش تمام
إوعوا من وشي أنا موجود هنا
أيوة عارف كل حاجة
كل حاجة
كل حاجة
قومي يا ستي
كورونا
جت علينا
والمطر جايب كورونا
فيه بشر بيموتونا
أيوة خايف
بصوا على حركة سناني والشفايف
أيوة قلقان م النهاردة
عايز آخد البشر جمعًا في حضني
لأ ده وهم وناوي لجهنم ياخدني
هاتوا مصحف
أقرا فيه
هاحتويكم واحمي نفسي اتحامي بيه
البشر عايزنني اموت
يا خراب كل البيوت
يا كورونا
كل دول راقبوني حاسبوا يراقبوا فيكوا
بصوا إيدي من السلام شايلة إيديكوا
-يا ابني إهدى
=هاتوا مصحف
-ما انت ماسكه
الطريق يكشف لشخص مدى تماسكه
واللي يهذي
حد زيي
ليه المرض ساب كل واحد ع الطريق ولقيته جايلي؟
في انتظار الكون بحاله ياخدني منكوا
فيه أكيد قوة غريبة فوقنا إحنا
البشر، ساعة ما حاولنا نفكر، دوبنا، سيحنا
آه يا راسي
الصداع يا ناس قسمني
والألم نابه طويل
غارسه في فصي الشمال
أي برشامة احتمال
لما أبلعها تكون جاية مقاسي
آه يا راسي
جابوا دجال خفت منه
دس في الميّه مُهدئ
قال كلام مش فاكره عني
جابوا دجال غيره تاني
خفت أكتر
كان سمين ومعاه عصاية
قال حاجات بالهمس خفت
قال وقال ووافقت طبعًا
قاللي شوفت؛ قلت: شوفت
سابني على إني كويس
بس انا في الوهم طوفت
جُم ملايكة
أو مشايخ
أو ملايكة في المشايخ
أذّنوا في البيت عشان
يرعبوا صنف الشيطان
نمت على حجر المشايخ
قال رُقْيَةْ
هديت معاهم
جابوا ماء ورد وسقوني
قالوا: واللي اتبقّى منّك
ادلقه ع الجسم من فوق الكتاف.
ده اللي خلّاني آمنت
لما شوفت ملايكة فيهم
شالوا ألمي، الخُفاف
خفت على صاحبي ندهته
دوست على إيده وقلت:
الناس يا صاحبي
الألم أتاريه مخبّي
قبل ما ادخل للطبيب
كنت شايف كل حاجة لابسة حاجة
اللي جوا التاكسي صاحبي
واللي مرسوم ع الحيطان ده رسالة ليا
والعصير فيه سم فيا
أي حاجة خارجية
ساكنة فيا متدارية
شخّصوني
باي بولر
زي فان جوخ ف زمانه
بس كل الفرق بيننا
إنه لما إنتحر
عشت انا واقف مكانه










على مسرح إسكندرية

-المكان: إسكندرية سيدي بشر
-موسيقى: عمر خيرت اللقاء الثاني
-ديكور: لا يوجد
..............................
كنت فيها
شقة في نواحي العصافرة
بدأت بضاعة تتفرش ع الأرض تتوزع علينا
كنا خمسة
كل واحد ليه مكان في اسكندرية
لو سمحت
عايز اوصل للهدف مش قادر اوصل
ممكن ادخل للزباين؟
كان كريم عبد العزيز هو اللي شبهي
لما كان جوا المحطة بيبيع الورق على إني حاجة
أما انا معايا:
مبشرة/سكينة سيليكون/مفرشين/مَسّاحة لوكس/أطقم معالق
اشتروا مني عشان أبقى كويس
.....
روحت تاني مكان وتالت حتى سادس
ما شتروش
والحياة عايزة البشوش
لما باتعب
كنت اروح للبحر وارويه بالدموع
كان لطيف جدًا ويقبل دمعتي
كان حنين
زي ما يكون والدي سافر م الصعيد لاسكندرية واندمج مع ملحها
كنت عايز ألحق الروح بالفنون
كل حاجة كات قصادي حسستني
جيت احب اسكندرية قطّعتني
بس انا مسامح وراضي
رغم إني كنت موهوم وهم فاضح
كل دولا بيضحكوا عليا قصادي
برضو عادي
واستمعت لصوت هدير الموجة ع الراديو
واكتشفت جمال البحر والموجة
قلبي مافيهوش أي حاجة غير حنين
صدري زي بيتين جيران
ما افتكرش حضنت واحدة من سنين
قلت أحضن نفسي فهدمت البيتين
كنت في التروماي وعيني الكاميرا تلقط
لقطة اللي يبيع سِبَح
لقطة اللي عاكس الوردة
ولقطة للي قطفها.
لكن جميلة
هزّت جزوع النخل في قلبي
نزل الكلام الحلو على كفي
مش فاكر الا شعرها البرتقاني
شعرها البرتقاني
شعرها بيعصر حناني
شعرها فيه اسكندرية










إقبليني!

هي البلاغة ضعيفة قدّامها
والّا بلاغتي ضعيفة
مش شايفة إني في شعري بارسمها
نسمة رقيقة لطيفة
لو ألاقي حل يخلي روحها تشوفني روح
وتمد إيدها كمادات للقلب وعلاج للجروح
أنا كنت ما استنش واروح
مضطر أكتب بس مش مضطر أقول
إنك جميلة
الوصف ده عندي يطول
قلبي العجين بتشكّليه
بتوقّعيه في الشك ليه؟
كشكولي لما كتبت فيه
قاللي: انت عايز تكتب ايه
قلت: اللي فيها ومش لاقيه
مدّي رموشِك سكة لعينيكي
قولي إني ممكن أبقى يوم ليكي
أو إقبلي اللي كتبته بروحي وإيديكي!















كل كلمة بقولها ليها قصد تاني
قلت: (بانسى) لما كنت بافتكر
وافتكرتك بعد ما قلت: (اتنسيتي)
صدقي اللي باقوله قلبي بيحتضر
عقلي بيقول كل ثانية: (إنتي جيتي)
تِقْلِت الألفاظ عليا كشفت سر
كل ما اكتب بيت جديد بتكوني بيتي



















يا بلاد بعيدة قرّبي مني
ده كفها بعينيا متحني
وحلقها ده
بيت من قصيدة كتبته بتأني
لو فيه شكوك من عقلي
ف قلبي بيغني













منطق صديقتي (مروة عبد المنعم)

بيقولوا للبنت الجميلة: (أخدتي قلبي)
وأقول لهم: الجميلة هتاخد إيه؟
كبرِت كدا،
شايفة العيون حواليها بس،
تخيّلوا
تشوفوا عيون مش ناس حواليكم!
منطق جمالها يقول: أنا، ولا حد غيري يبان هنا، ولا عين تشوفني إلا وريق الفم يجري.
الجميلة قدام المراية
حتى في الشارع عينيكم
دي مرايتها
والجميلة دي بداية حكاية
يتسجن فيها اللي يسمح
للرئة تاخد ريحتها
والجميلة جلد ناعم
الجميلة شعر غالي
والجميلة طريقها زاحم
الجميلة في برج عالي
إوعى يا صاحبي بسذاجة
للجميلة تقول: تعالي!






الأركان الأربعة

إهداء إلى
أربع حلول للمشكلة
أربع صحاب
كانوا في بالي
نفخوا في قلبي نفخة واحدة وبعدها طار التراب
١_عبد المهيمن
إنت سافرت يا صاحبي
ومين معايا؟
طب لو تعبت وجتني موجة إكتئاب
أنده يا لمين يمضي حضورك بتد ما مضيت الغياب؟
يا أول الحاضرين في وقت الأزمة
يا أول الصحبة
عمري ما شوفتك غير من النخبة
مش عايز اشوفك غير صديقي من ابتدائي...
٢_أحمد حسام
طبطب عليا لما فارقتني
دارى جراجي كتير
لو شاف حبال بدأت تكتّفني
يعرف مكان السير
ويقطعها
أحمد حسام بالذات
عارف اكتئابي
وعارف إمتى أخفف الجرعة
وإمتى
أبلع دوائي...
٣_محمد رجب
كان فيه في جيبنا شغف
ولازال في جيبنا
زي اللي فرحانين رافعين بإيدهم سعف
يجمعنا حب النبي
وان حد فينا ضعف
يجري عليه التاني
(ماتقولش أنا وحداني)
دي شَرْبة من زمزم
إشرب أنا الساقي...
٤_عصام شعبان
ماعرفش مين فينا
يقول لمين فينا
إجمد وكمِّل
لكن في ساعة صفا
بدأت أتأمل
الصعب زي الفرن
والسهل زي سلالم المترو
يا تستوي في النار
يا تمشي زي الباقي
و (الباقي) دول كتروا
حاولت أوصف شيء ومش لاقي
لكن هقول
أخلاقه
أخلاقي...















شاهدة الليالي عليا لما فشلت
أسمع كلامها الحلو م الصورة
























ليكي قوة غريبة جدًا
أثّرت فيا وغيري
شالك الصوف بابتسامتك
أقسم انه شال حريري
العبير صابغ كلامك
والحمام شالك تطيري
اسمحيلي اوصف شوية
لو نجحت تكوني طيري
















لا عايزك تضحكي بهدوء
ولا تقوليلي حبيتك
ولا تشوفيني بعينيكي
أنا عايز جواب لسؤال:
وجودك ليه جميل جدًا؟


















حسيت بنغزة في قلبي متأخرة
آدي اللي أمرت قلبي يرجع ورا
نزلت دموعها إمبارح
و ما اظنش انّي الجارح.

















باقرا واكتب وحدي

صَمْت قافل قلبي، صُمْت بامنع قلبي، صُنْت حبك ياما، بس باعرف اخبّي.
في الليالي دموعي، لليالي خضوعي، كنت عندي كرامي، سيّحتها شموعي.
شوفت طيفها جميل، طيف زيادة دليل، إنهم فارقوني، بس لسه عليل.
كل يوم باتكلم، أضحك.. ابكي.. واسلّم، واترعش م الخوف واتدارى، في أي ركن مضلّم.
حُبّها مش فاكره، حُبّهم مش فاكره، سمهم سهم سكن صدري، غدر لازم اذاكره.
مش كفاية باشوفكم جنبي؟
مش كفاية تعبت وذنبي
إني أعشق بنت جميلة
والجميلة تجر زميلة
كنت باكتب
كانوا يقروا
بس قطر معدّى
خلى أطيافهم يشوفوني
باقرا واكتب وحدي...












إهداء إلى
كريم البربري

..................

في مرة كنت
عيل في نفسي كدا
بافتح ضلوعي
واللي رايح واللي جاي
يرمي على قلبي الحجارة والمرض والنقص
مش بس ده مش بس ده كله
كانوا بياخدوا قلبي لاصحابهم وبيقولوا نكت
متخيل الألم اللي شوفته يا كريم؟

في مرة زي المرة دي بالظبط
أهديت قصيدة لواحدة
قطّعْت روحي كتبت
سابتني برضو

في مرة لما بنت بيضا
شافت جروحي وقالت:
(هاقدر أعالجها)
ماعرفتش أبعدها
صدقني والله حاولت
وسابتني في الآخر وعارف
بس قلت
(أهي دي نهاية الفيلم الجميل)

ما علينا يا صاحبي.. القصيدة دي ليك.. أصل الصحاب مش بالعدد.. باكتب أهو.. كل الكلام علشانك
لكن أنا
مش عارف أكتب حاجة غير نفسي
وإحنا نفس اللون
ونفس الروح
ونفس البرج
نفس الضحكة

إحفظ قصيدتي يا كريم
وماترميهاش في السكة











إني إنتَ

إكتب انت عشان تداوي جراحك
وابقى سيبني عشان أداري جراحي
إكتب انت عشان تأثر فيهم
وابقى سيبني عشان أحرك نفسي
إكتب انت عشان تناجي حبيبتك
وابقى سيبني عشان أناجي الصدى
إكتب انت عشان تلاقي اللي اختفى
وابقى سيبني عشان ألاقي اللي ظهر
إكتب انت عشان تشم الهوا
وابقى سيبني عشان ميعاد الدوا
إكتب انت عشان رفاهيتك
وابقى سيبني عشان أشوف القمر
إكتب انت ع الكايبورد قصيدة
وابقى سيبني اشطب كلامي عن البعيدة
إكتب انت واوعى تنساني
إني إنت في مكان تاني



عينِك

عينِك جميلة وقلبي مال ليها
عينِك سما وسحابة تداريها
عينِك غابات ودموع بترويها

عينِك شايفها بس مش فيها!

عينِك مَحَل النور/بداية الضيّ
عينِك بتثبت ليا إن انا حي
عينِك باقول مع غيرها مالهاش زي

عينِك ونفسي أبقى الجفن واحميها!

عينِك يا شعلة بترمي جوا روحي شرار
عينِك بنظرة واحدة تطفي النار
عينِك كإنها عروة فيها زرار

عينِك يطول الوصف لو أنوي اوصفِك بيها

عينِك بداية سكة للراحة
عينِك رقيقة تشد بصراحة
عينِك بتشفي جراحي: جرّاحة

عينِك تشوفها عينيا تحييها

عينِك رحيق وبداية العسلِ
عينِك بتبقى زرقا أو عسلي
عينِك يُحار في وصفها المَثَلِ

عينِك وروحِك ساكنة تحتيها





الرطوبة

إسمع اسمع
لما باتكلم بتسمع
وده مش جديد
لما باكتب بانقش الكلمة على سور من حديد
والكل يسكت ينتظر
وانا ما انتظرش
صدقوا اللي انا قولته تاني
وهي مش عارفة تجاوب
لو نسيتي خدعتي
دوسي سيرش
كنت أرهف
باحمي فيها
كنت غيمة بتداريها
ياما شعري زمان كتبها
ياما فتحت ليا بابها
تقول تعالى
وان ما روحتش
ألقى كل الناس تزعق: يا ابني روح
عايز اجرح جرح لكن
اللي يجرحها يروح
بس انا اتعلمت شيء
يجرحك من غير علامة
جهزي مكان للجروح
كدّبي الشاعر لثانية وصدّقي الإنسان
كدّبي الإنسان لثانية وصدّقي الساحر
كدّبي الساحر لثانية وصدّقي الشاعر
كدّبي الإنسان لثانية واحفظي العنوان
توهي مني بقيت أناني ومعجمي
زاد؛ بقيت عامية فصحى وأعجمي
القوافي بقولها علشان تكتمي
رن رن القافية شغالة تزن
زن زن القاسي لا يمكن يِكِنّ
إنّ إنْ تعمل ضعيف هيّ تحن
ده أنا الممثل ساحر الشاعر أنا قاتل الحيوان
دقت مُرّ ودقت حلو وكانوا لي سيّان
الملامح ميّة واحدة
بس أعرف أبقى من الوشوش ألوان
صدقيني
وكدبيني
هتلاقيني كدبة حلوة تحسسك بأمان
لا هزمية
فيه انتصار
الدمار شوفته في أوضتي من زمان
كنتي حلوة
فِ عيني كنتي
لما صونتِك
إنتي خونتي
ده طوفان من ذكرياتي وفيه كمان
كنت ليّن في المعاملة لحد ما أصبحت هاين
والعروسة شوفتها ع الرف معروضة لزباين
تقتل اللي تقتله وتنصب كماين
كنت جاهل والليالي علّمتني
العروسة السلعة دي رخيصة في متنى... تيجي تثبت كلمتي ف ماتلاقيش
فوق كدا وركز شوية اسألني ده: ليه وفين كلمتها؟
هرد ده: ليه وفين دي كلمتني... لأ ما قولتش العروسة ما تساويش.

#مصطفى_التركي (هاشتاغ)       Mostafa_Eltorky#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل