سجل وبلاش تأجل 2

خالد محمد جوشن
محامى= سياسى = كاتب
(Khalid Goshan)

الحوار المتمدن-العدد: 8568 - 2025 / 12 / 26 - 00:07
المحور: كتابات ساخرة
    

وصلنا فى المقال الاول الى ان الست الموظفة بصت لى بابتسامة ماكرة وقال لا

روح هات خطاب تحسين من المحافظة فى الدور الثانى .

روحت وانا فرحان للمحافظة فى الدور الثانى ووقفت على الشباك قالى الموظف اوامر .

قلت له عاوز خطاب تحسين للحى علشان اجيب صورة من الرخصة .

قالى لا شايف الورقة الى ملزوقة على الحيطة هناك دى ؟

قلت له اه ، قال روح اقراها وهات المستندات الى فيها وتعال خد شهادة التحسين .

هنا ادركت لما كانت الموظفة فى الحى تنظر لى بابتسامة ماكرة ، وهيا بتقولى روح المحافظة هات شهادة التحسين ، عامله لى مفاجأة العفريتة .

المهم قربت على الحيطة وقعدت اقرأ .

الاوراق المطلوبة لأستخراج شهادة تحسين

اولا - اصل خريطة مساحية محدد عليها الموقع مختومة بمعرفة مهندس نقابى

ثانيا - صورة من خريطة تقسيم

ثالثا - صورة الرخصة

رابعا - صورة عقد الملكية

خامسا صورة بطاقة المالك

سادسا - صورة التوكيل

سابعا صورة بطاقة الوكيل

ثامنا - دوسية

ينهار اسود ومنيل علشان اجيب شهادة التحسين اجيب المستندات دى كلها ، وكله كوم وانى اجيب كمان صورة الرخصة من ضمن اوراق شهادة التحسين الى بطلعها علشان اجيب الرخصة ، دى كوم تانى .

رجعت للموظف وقلت له كله تمام وانا باجز على سنانى ، بس بالعقل كده يا باشا ازاى اجيب صورة الرخصة اذا كنت انا جاى اجيب شهادة التحسين علشان اجيب الرخصة ؟

قال هى دى التعليمات انت مش قريت الورقة الى متعلقة ، خلاص .

قعدت ادور فى اللغة العربية عن كلمة قبيحة اقولها للموظف افش فيها غلى وامشى ، بس ميكونش بيحاسب عليها القانون ، ملقتش ، بعد ما مشيت .

افتكرت كلمة باسم يوسف لما قال للمذيع ( ---- ) ردا على طلب الاسرائليين نقل سكان غزة لمصر لحد ما يخلصوا على حماس ، بس باسم قالها فى التلفزيون وفى بلاد الفرنجة ، انا لو قلتها للموظف هنا هيعكوشونى وعينك ماتشوف الا النور ، ومش هروح اصلا ، قلت فى نفسى اعقل يلا وخلى الطابق مستور .

قعدت افكر فى الورطة بتاع التسجيل دى اعمل ايه؟ اعمل ايه ؟ ، قلت فى عقل بالى انا لازم اعقل ، وانسى موضوع التسجيل ده ---- وقعدت ادندن وانا ماشى اجل وبلاش تسجل ، اجل وبلاش تسجل ، اجل ---اجل ---- اجل . على وزن اغنية سعاد حسنى المشهورة ، قفلى على كل المواضيع ، قفل ، قفل ، قفل ،

وانا قررت اقفل موضوع التسجيل الى ان يقضى الله امرا كان مفعولا .

#خالد_محمد_جوشن (هاشتاغ)       Khalid_Goshan#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل