سجل وبلاش تأجل

خالد محمد جوشن
محامى= سياسى = كاتب
(Khalid Goshan)

الحوار المتمدن-العدد: 8563 - 2025 / 12 / 21 - 00:53
المحور: حقوق الانسان
    

فاصل موسيقى فى الراديو والتلفزيون ، مواطن جميل يقول انه ذهب للشهر العقارى وقدم طلب لتسجيل شقته ، وبعد اسبوعين طلبوا منه الحضور لاستلام المسجل الخاص به .

يستمع المواطنين عشرات المرات الى هذا الاعلان وانا منهم بالطبع ، وان كان الاعلان قد خفت وتيرته حاليا ، ويصدقون .

ولما كنت محامى فقد قررت ان اخوض التجربة بنفسى واقوم بتسجيل عقارى

ذهبت للشهر العقارى لاقدم طلب التسجيل قالوا لا مثلما قالت شريهان فى مسرحيتها الجميلة مع سمير غانم .

وقالت الموظفة : انت تروح الاول تقدم على طلب رفع مساحى فى المركز التكنولوجى ، رحت المركز التكنولوجى وقدمت الطلب ، وشهر ورا شهر لحد ماجالى المعاينة وتمت على خير وقالوا هنتصل بيك او تيجى ليك المعاينة المساحية .

وشهر يجرجر شهر يجر شهر على رأى شريهان فى الفوازير وعدى اكثر من سبع اشهر لحد ما جت المعاينة .

تنفست الصعداء وخدت ورقى والمعاينة المساحية ورحت الشهر العقارى منتشى ، معايا المعاينة المساحية بقى ، تانى قالو لا .

وقالت الموظفة : انت لازم تجيب ورقة تفيد ان العقار مبنى سنة 1990 ، يعنى عدى عليه 33 سنة طيب مينفعش عدى عليه عشرين سنة او حتى خمسة وعشرين قالت لا ، لازم سنة 1990، كانوا طيبين اوى يا خال ، قالو لى هات شهادة من الكهرباء ، من حصر الضرايب العقارية ، الرخصة بتاع البناء . سهلة اهيه ؟

صدقت كلامهم يا محترم وروحت الكهرباء لاقيت الكهرباء دخلت 1996

بلاش دى . متنفعش

روحت الضرايب العقارية لاقيت الحصر 1991 لكن الربط فى 2006 .متنفعش .

بلاش دى روحت شركة المعادى شركة حكومية جميلة وعريقة وهيا الى قامت ببناء العقار .

قلت لهم : هاتو ياجماعة الخير صورة من رخصة المبانى قالو عنينا ، قدم طلب وتعالى بعد اسبوعين اسال عليها .

مكدبتش خبر وقدمت على الشهادة ، وبعد اسبوعين قالو تمام موافقين ادفع الرسوم ، كام؟ قالو 1300 جنية مصرى ، جنيه ينطح جنية

عبارة عن مصروفات قانونية 1000 و300 جنيه تصوير ، ده الى مكتوب فى الايصال ، الوصل موجود .ينهار اسود

ورقة بالف ثلاثمائة جنيه ليه ؟ على رأى عبد الغفور البرعى فى مسلسه الشهير لن اعيش فى جلباب ابى .

المهم دفعت وروح استلم الرخصة ، عبارة عن ورقة بهتانة ، نصف الكلام غير واضح لكن أهو ، عليها ختم اخضر وجميل مكتوب عليه شركة المعادى

قلت لهم عاوز ختم النسر قالو لا

معندناش ختم النسر انت متقلقش هياخدوا بيها فى الشهر العقارى.

صدقتهم ياحضرات ورحت الشهر العقارى سلمت الموظفة الشهادة ومرفق بيها الوصل ابو 1300 جنيه رغم عدم ضرورته لكن علشان اضفى على الورقة هيبة

قلبت فى الورقة وقال لا
ايه ياستى لازم ختم النسر ، مافيش، قالت ماليش دعوة ، عاوزة ختم النسر ، روح طلع صورة الرخصة من الحى هيكون عليها ختم النسر .

خدت بعضى ومشيت خمسمائة متر بره المأمورية ، وانا بكلم نفسى واقول يانهار اسوس واجيب لهم الشهادة من الحى يرفضوها ، انا لازم اقول لها ، تراجعها وتشوف هتنفع ولا لا

وصدق حدسى قلبت الورقة وهى منزعجة وقال لا حتى لو جبتها عليها النسر

ليه ياهانم ؟ قالت دى رخصة عن المنطقة ف وانت ب

ياست هانم دى رخصة تشمل المنطفة ف الى بها اربع عمارات ا ب ج ود

ودن من طين وودن من عجين .

وانا بافكر اسفخها قلم ، افتكرت ، ده المفتش عندهم قلت استنجد بيه ، لعل وعسى يفهم ، قلب الورق وقلب العقد وقلب الرخصة وقال تمشى الرخصة ، وهى تجادل معه بغية افساد الامرـ متقولش بسجل بيت ابوها علشان اخده .

فى النهاية الراجل قال تمشى الورقة . على مضض قالت الموظفة ماشى ، وهى فى قرارة نفسها تتمنى افساد الامر ، قلب الام بقه انا حاسس بيها .

خدت بعضى وعلى الحى عدل ، اجيب صورة رسمية من الرخصة مختومة بختم النسر من المركز التكنولوجى .

دخلت على الموظفة انا عاوز صورة رسمية من الرخصة دى وانتو الحى بقى الى بيطلع التراخيص ، بصت بابتسامة ماكرة وقالت لا

ليه ياستى تانى ، انت تجيب الاول خطاب تحسين من المحافظة فى الدور الثانى وتيجى تحسين ايه ؟ هو ده القانون يامحترم .

حاضر ده انا ، ولما اجيب خطاب التحسين هكلمكم على الى جرى بعد كده ، وسجل وبلاش تأجل

#خالد_محمد_جوشن (هاشتاغ)       Khalid_Goshan#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل