فشل معرض -صمت الدماء- يا بلد الهريسه

زاهد عزت حرش
(Zahed Ezzt Harash)

الحوار المتمدن-العدد: 1643 - 2006 / 8 / 15 - 09:29
المحور: الادب والفن
    

هيك اشي ليش بيصير بس عنا؟؟
فشل معرض "صمت الدماء" يا بلد الهريسه
زاهد عزت حرش

اسمع يا صاحبي القديم.. يا رفيق ايام النضال من اول الطريق.. بتعرف انه صار لنا بهالمعمعات اكثر من ثلاثين سنة!! وهاي المرة كمان زي كل مرة.. منركض منركض.. بس طبعاً انا بطلت اقدر اركض .. صرت ادحل وادحل.. وبالآخر منقول هون كنا!! يعني زي المثل اللي بيقول.. كإنا يا بدر لا رحنا ولا جينا!! بعد التعب والشحشطة بتطلع النتيجة زي اللي نط ع الحمار طب من الناحية الثانية.. قال محل ما خري شنقوه!! يا اخي ليش هيك بيصير معنا.. وين غلطنا؟؟ مش يمكن يكون التو منا ومش من الناس!!

طيب هذا معرض "صمت الدماء" اللي صار لنا نشتغل عليه شي شهرين تقريباً.. واللي خصصنا من ناحية العمل الفني ومن ناحية العمل الجماهيري لإحياء ذكرى الشهداء بشفاعمرو.. واللي كان افتتاحه ليلة السبت 5 آب.. يعني بالضبط بذكرى سنة على الجريمة اللي راح ضحيتها اربعة من بنات واولاد بلدنا.. ليش ما حدا اجا عليه.. حتى اهالي الشهداء واقاربهن.. واللي بيعدوا حالهن سياسين واصحاب قضية!! كمان هدول ما اجوا.!! ليش؟؟

يا اخي.. الله وكيلك انو حرثنا الارض.. هاي المرة!! طبعاً زي كل مرة.. بس النتيجة طلعت بتسود الوجه!! هو صحيح افتتاح معرض مش مهرجان شعبي.. بس العمى ما يكون في مية شخص بهيك مناسبة.. وشغله بتخص البلد وأشي بعده حامي ما انتسى!! اشي بيحط العقل بالكف!! صار لي من اكم يوم احسبها مش عارف الاقيها؟؟ مش بس هيك.. كمان مسيرة الالوف.. اذا بدك للحقيقة ما وصل عدد اللي كانوا فيها لنص الف؟!! يمكن الناس بترد على عرسان!! انا ما عزمته ع المعرض.. ليكونوا الاهالي متشامنين معه وعشان هيك ما اجوا لا على المسيرة ولا على المعرض؟؟

طيب تعال تنراجع شو سوينا.. اول اشي نشرنا عن طريق الانترنيت من شي عشرين يوم خبر عن المعرض!! بدون مبالغة باربع مواقع معروفة!! موقع بانياس, موقع اشكرى, موقع كل يوم نيت, موقع دنيا فن.

هههههههه.. هلا هلا شو مفكر شعبنا قاعد ع الانترنيت كل النهار.. طيب بلاش هاي.. عملنا بوستر وحطينا بأكثر من 25 محل من المحلات الشعبية في البلد.. رحنا لعند اهالي الشهدا وقدمنالهن رزمة دعوات عشان يعزموا على كيفهن.. مش بس هيك.. انا وابو رضا لحالنا كتبنا ثلاث مية دعوة.. ووزعنا مش اقل من ميتين دعوة منهن بشكل شخصي.. المية الباقيات وزعوهن الشباب.. يعني ولادي واصحابهن.. عمبحكي بالتفصيل حتى ما احط اشي على ذمتي.. الدنيا فيها موت وحياة!!

ورفيقنا زهير ورفيقنا نضال وزعوا بدون مبالغة شي مية وخمسين دعوة.. ويوم المسيرة.. مهي مسيرة الالوف زي ما حكينا.. وزعنا اكثر من خمسين دعوة.. يعني حساب بسط منكون وزعنا ما يقارب 500 دعوة بشكل شخصي؟؟ يا خسارة تعبك يا ابو عيسى.. يا دوب كانا كلنا على بعضنا خمسين شخص.. بما فيهن الشباب والصبايا!!

بتعرف شو.. بدي افش خلقي واحكي حتى لو في حكي عيب ينحكى!! العمى!! ولووو خمسين شخص؟؟ طبعاً شكراً كثير للحضر.. للاخوان من طمرة ومن عبلين.. وللاستاذ علي والاستاذ امين وللشباب وللدكتور غسان والدكتور فؤاد.. ولكل الصبايا والشباب وشكراً كثير على باقة الورد اللي بتجنن يا احلى الصبايا!! بس مع هذا وكله كان المعرض فاشل, غاشل من ناحية الافتتاح والحضور وعلى مدى باقي الاسبوع!! طيب ليش؟؟؟؟؟؟؟؟؟؟؟؟

اسمع يا صاحبي يا ابو السعيد.. واحنا صغار كانوا يحكوا نوادر عن شفاعمرو واهلها.. وخاصة انه اهل البلد كانوا يعيرونا انه احنا غربية .. يعني انتي شعباوي.. وانا حوراني.. مع انه للحقيقه وللتاريخ انا من اصل حموي!! بس ما علينا.. تعال بدي احكي عن نوادر زمان اللي كنا نسمعها عن شفاعمرو.. ويمكن يكون هون السبب.. لانه مش معقول انك تشتغل كل هالشغل وتكون النتيجة هيك!! ولو ع القليلة اهالي الشهدا!! مش بس هيك خوذ مسطره انه عرسان رئيس بلديتها!!

كانوا يحكولنا زمان انه شفاعمر بلد هريسه.. وانه اولها مقابر وآخرها مشاحر.. بس في اشي بعرفه من ايام بياع الحبوب في السوق القديم.. المرحوم ابو رؤوف.. هو اللي حكاها لحياة ابوي وسمعت القصة كنت حاضر عليها.. قال: ايام ما قضى الجزار على ظاهر العمر في عكا.. يومت ما خانوا الدركزلي المغربي.. وحطو واحد من المكر يجمع الجباية من شفاعمرو وقضاها.. اللي كان اسمه صالح افندي.. كانت تركيا بدها تعرف ليش اهل شفاعمرو تقاتلوا هنه وعثمان ابن الظاهر وما سمحوا لو يرجع ع البلد الا بعد ما صلح حاله مع ابوه.. وبعد ما وعد انه يتصرف منيح.. اجت تركيا بعتت مندوب منها يشوف شو قصة اهالي شفاعمرو.. قام اخونا برم بالسوق القديم.. هون سنكري.. وهون كندرجي .. وهون محل حبوب.. سوق وعامر.. بس الحقيقة اكثر اشي كانت منتشرة بالبلد محلات الكندرجية.. وكل ما فات المندوب على شي محل يسمع اللي قاعدين فيه بيحكوا بالسياسة.. ايامها كانت الحياة صعبة والناس على قدها.. خاصة واجا الجزار.. اللي قلب الدنيا فوق راس اللي كانوا مع ظاهر العمر.. الله يقطعها من هديك ايام.. المهم انهم قاعدين والحكي بالسياسة داير من محل لمحل. لمن رجع المندوب على اسطنبول سأله السطان شو لاقيت بشفاعمرو؟؟ قام المندوب لخصها بجملة.. قال: يعضون على النعال ويتحدثون بالسياسة!! يعني قيق قيق وبيض مفيش!!

الله يقطعك يا ابو عيسى لهون وصلت معك!!!
لكان يا اخي فهمني ليش هيك عمبيصير.. طيب بلاش شو احنا عملنا.. مرور ذكرى سنة على قتل شهدائنا.. وبظروف حرب اجرامية على ابناء شعبنا.. والشيخ عرسان افندي بحكي بوسائل اعلامه المسموعة.. حكي غريب.. لا الله بقبله ولا عبد بقبله.. ومنيجي ع المسيرة يا دوب بيكون فيها 300 – 400 انسان!! الله اكبر!!

هذا هو واقعنا المزري.. بلا لف ودوران.. لكان شو اللي خلانا نوصل لهون.. بكفيك هالنصب التذكاري اللي عامليونه.. اشي نصب تمتم!! خيا فش اشي من برا.. سوس الخشب منه فيه.. هاي هي شفاعمرو .. هاي هي الحقيقة.. اتذكر ايام يوم الارض.. قديش كان عدد الشباب اللي وقفوا وقفه رفعت راس شفاعمرو.. ويومت طوشة الباصات.. مين اللي علق فيها.. اخخخخخخ ولك يا صاحبي في اشي اذا بحكيه بيوقف شعر راس القرعان!! لو الناس بتعرف مين اللي شهد بالمحكمة ضد حياة الشهيد محمد ابو رعد لمن ام الرفيق قدمت شكوى ضد حكومة اسرائيل.. على قتل ابو اولادها!! اخخخخخ اما حنا شعب منافق وموجهن على ستين بته!! خللي الطابق مستور.. اللي راح راح!! بلا منقلب المواجع.. شوف المساطر اللي قدامك.. زعامات مثل الفل.. زيها زي زعامات الامة العربية!! يعني شو فكرك نستورد زعامات من السويد!!

فشل المعرض.. للجهنم!! مهو مش اول مرة ولا آخر مرة .. كل عمرك يا زبيبة بطيزك هالعود!!

#زاهد_عزت_حرش (هاشتاغ)       Zahed_Ezzt_Harash#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات