بحبوحه ع القانون

زاهد عزت حرش
(Zahed Ezzt Harash)

الحوار المتمدن-العدد: 1572 - 2006 / 6 / 5 - 12:27
المحور: الفلسفة ,علم النفس , وعلم الاجتماع
    

هيك اشي ما بيصير غير عنا (3)

بحبوحه ع القانون

مش مهم شو هو القانون.. المهم هالقانون بيخدم مين؟؟ وتعالوا تنحكي على ظاهرة قوانين السير ببلداتنا العربية.. يعني كيف ممكن هذا اللي راكب سيارة جديدة بنت سنتها يروح يدور ع موقف تيحط سيارته والموقف بعيد شي 100 متر عن باب الدكان اللي بدو يشتري منها شي غرض.. كل الشغلة ما بتستحمل اكثرمن 3 دقايق.. هو صحيح انه لما فات حضرته ع الدكان لقي صاحبه او صاحبته او انه صاحب الدكان فتح موضوع وحكي بيناتهم .. ويمكن شي نكته من هون او شي خرافية من هناك.. وحكي بيجيب حكي.. بس الله وكيلكم ما كان قصده يسكر الشارع لشي نص ساعة.. كل القصة انه كان بدو يتناول شغلة.. ويعني يمكن توخذ معه القصة شي 3 دقايق مش اكثر.

على كل حال شو صار يعني.؟؟ طارت الدنيا؟! وشو فيها اذا سكر الشارع شي ربع ساعة؟؟ اذا احنا اولاد البلد ما تحملنا بعضنا مين بدو يتحملنا.. يعني ما بيكفي لما منروح على شي مدينة يهودية ما منقدر نوقف وين ما بدنا.. وما منلحق نوقف بشي محل ممنوع حتى يطلع لنا شي شرطي ويشكنا مخالفة ويقدحنا قدح .. طيب خلينا ع القليلة ببلدنا نوخذ راحتنا.. يعني اذا ما اخذ الواحد منا راحته ببلدو بيفقع وبيموت.

بعدين شو قصة اشارات المرور اللي صاروا يحطوا لنا اياها على الشوارع.. قال شو.. ممنوع الدخول طريق باتجاه واحد!! يا سلام بدك ايانا نلف لفة شي 500 متر عشان نفوت على الشارع التاني, ونوصل لحد محل ما بيبعد عن المدخل الاول اكثر من 50 متر.. وين الله قال هيك اشي.. شو اتجاه واحد ما اتجاه واحد.. ما كل عمرنا واحنا نمرق من هذا الشارع طالعين نازلين.. شو غيير الاحوال.!! هاي قصة طريق باتجاه واحد بتنفع عند اليهود.. هناك اكثريتهم بيمشو ع القانون لانهن بيخافو من البوليس.. والله احنا وقت الجد اكبر بوليس منطعجوا.. ويروح يقفل.. هي بلدنا واحنا حرين كيف منسوق فيها!!

يعني هداك اليوم وانا محمل نقلة بطيخ وداير انادي "ع السكين يا بطيخ" .. "حلو مثل السكر يا بطيخ" .. بدك اياني كل ما اجيت ع شارع ممنوع الممرور, طريق باتجاه واحد.. افتل الفتله كلها عشان اكم بيت يمكن يشتروا مني ويمكن يقدحوا لي.. لا خيا لا .. بتوفيش معنا.. اي مهو هيك هيك عمنسرق نص الحمولة ويا دوب عمبتوفي.. كيف اذا بدنا نسوق ع القانون؟؟ بتطلع ربحت جحا بالبيض. !!
لا لا بس اتطمنوا احنا شعب خلاق فش اشي بيصعب علينا.. هذاك اليوم لمن عملوا الطريق بحارتنا باتجاه واحد.. ودهنوا على الشارع باللون الابيض سهم بيدل ع اتجاه السير.. قام واحد من الجيران ساكن بحد الشارع.. حمل سطل دهان اسود ولغمط الشارع وبطل يبين لون السهم من لون الزفته... زفتها على كيفه.. خلي البوليس اسا يجي يعمل مخالفة.. قال شو.. فايتين بعكس السير.. وين الاشارة اصلا ؟؟ مهو اولاد ابو فلان.. الله يبارك ثلاثة.. الواحد منهن قد العمّال.. كان في اشارة ممنوع الدخول بالشارع اللي بحد بيتهم.. هجموا عليها قلعوها من اساسها!! طز.. وشو بدو يعمل البوليس؟؟ اشارة وقبعوها.. وسهم ولغمطوا.. يعني فش اي اثبات انه احنا فايتين بعكس السير وبطريق باتجاه واحد.. والله ما حدا طالع من خرج هالدولة وقوانينها غيرنا..!!!

اللز اشي محلات الفلافل والشورما اللي بتكون بجنب الطريق ويهك في شي فسحة صغيري قدامها.. بيجيلك الواحد بسيارته وفاتح لك هالمسجل ع الاخر.. وخالتك هيفا بتغني "بوس الواوا".. وبيكون هيك مظبط حاله عاملك شعرو كوتسيم.. وسيجارته بثمه.. بوقف السياره طيازه.. يعني عكس خلق ربنا كلهن.. لكان كيف بدوا يفرجي حاله.. وبينزل من هالسياره "البي ام" خيا.. وبيفوت ع المطعم وبترك صوت هيفا ع الواوا يلعلع للسما.!! ابياخ ما الزها.. يا هيك تكون الجخة يا بلاش!! هي كيف اذا بتكونلها شي صبيه معه.. بِعُدش حدا يتلقاه.. اي بيعملك شوية حركوت وبيفرفك لك عجال السيارة بيخلي العالم بفرفك قلبها من الخوف.. وبيقوم الضحك.. والله عايشين بعز وبحبوحة في اسرائيل.. الله يرحمك يا نصر الدين.. يا هيك تكون البحبوحة يا بلاش.

#زاهد_عزت_حرش (هاشتاغ)       Zahed_Ezzt_Harash#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل