هيك اشي ما بيصير غير عنا - 2

زاهد عزت حرش
(Zahed Ezzt Harash)

الحوار المتمدن-العدد: 1567 - 2006 / 5 / 31 - 10:24
المحور: الفلسفة ,علم النفس , وعلم الاجتماع
    

جوزنا الصبي.. عقبال عندكم

قرب موسم العراس.. وصار لازم نحضر ميزانية ونوخذ لنا اكم قرض من البنك عشان نقوم بالواجب اللي علينا.. يعني الحرمة بدها اكم فستان جديد.. والبنات كمان!! بيصرش يروحوا بنفس الفساتين اللي اشتروهن السنة الماضية.. صار في موديلات جديدة ولازم يظهروا بمظهر لايق قدام الناس.. شو بدكوا العالم تجرسنا وتحكي علينا.. بعدين اذا البنات ما لبسن ع الموضه بتروح عليهن.. بعدش ولا شاب يتطلع عليهن.. اي بلا شهادة بلا ظراط حمير.. ما بينفع البنت الا سترتها.. عشان هيك لّبس خيا لّبس وعلى اخر موديل.. بلكي الله بيعركج الشباب وبتجوزا الصبايا وما بتبقى تعنس ولا صبيه.

ما علينا.. المهم موسم العراس بلش.. واذا كان العرس لواحد من القرايب منكون اتخوزقنا.. ما بيعود يكفي نقوط واحد والسلام عليكم.. اذا العرس عرس عربي بدك تنقط ع العشا وع الغذا وع طلعت العروس.. واذا العرس بمنتزه بتكون خريت سعاد.. بدك نقوط لابو العريس ونقوط للزفة ونقوط للمنتزه.. ونقوط المنتزه هذا غير شكل.. هذا النقوط بالذات اله تسعيرة .. مهو اقل وجبة بـ 100 شيكل.. وطبعاً عرس قرايب ولازم يروحوا كل اهل البيت.. واذا كنتوا شي 5 اشخاص بدوا يكون النقوط ع القليلة 1000 شيكل.. انت بتنقط منهون.. واخر السهرة صاحب المتنزه بيعد مين هون!!!

يا عمي والله الافراح حلوة.. الله لا يخليها من بيت مخلوق.. بس بهالايام صار الفرح خازق!! كنا زمان نعمل صف سحجة وغدا عند دار العريس.. واذا كثرناها منعمل سهرة عويدة.. بس الاكل ما كان ينكب.. يعني لو ظل الاكل جمعة ولو يتوزع منه ع الجيران والقرايب.. بس ما كان حدا يرمي اكل الفرح ببرميل الزبالة.. اما اليوم..... يا ساتر استر.. اذا حظر ع سهرة المنتزه من فوق 300 شخص, خليك لاخر الليل وشوف الاكل اللي بينكب.. يا حرام!! ولك في عالم بتموت من الجوع وعالم بتموت من الشبع!! مش بس هيك العالم بتنقط بالميات.. واذا بتحسبها اكثر السهرات بطلع العريس ملحوق.. يعني ما بين حق الوجبة واجرة الفرقة الموسيقية ومصور الفيديو.. بيحط العريس اللي فوقة واللي تحته.. هو صحيح انه كثير مرات بيبقى معه شي 10 الاف شيكل بيروح بيعمل فيهم شهر العسل ببلاد برا.. بس لما بيرجع عريس الزين.. هناك اتفرج على البكاء وصرير الاسنان.. بيصير يحسبها بالطول وبالعرض.. مهو ما بيلحق يرجع الا صار عليه واجبات.. ولازم يروح على العراس اللي معزوم عليها.. فش لوين يتهرب مهو كله قرضى ودين!!

الله وكيلك صارت العراس جلجقة.. بكفيش طنه ورنه لازم تكمل الشغلة ويولع ضرب الصواريخ.. لا لا مش كتيوشا.. هي بسموها زيكوكيم.. مفرقعات ضوئية!! من اول الاسبوع بتبلش طيخ طاخ.. وكل ليلة قبل ما يتجمعوا الحبايب ع التعاليل بتولع الزيكوكيم وبصير قالب بطيز القالب.. واذا مش عاجبتك هاي يوخذ غيرها.. وبتمد معنا خيا لسيعات نص الليل.!! شو خصرانين مهي مرة بالعمر!! شو هو كل يوم الواحد بيتجوز؟؟

احنا شعب عنده خصوصياته.. لازم لما نفرح نوسع باب الدار.. هاي ايام البيادر والسحات الوسيعة.. يرحم جدك.. هاي كانت ايام زمان!! ليش هنه اخوات الغايبه خلولنا شقفة ارض نعمر عليها.. صارت اكثرية بيوتنا راكب ومركوب.. ما بقي محل تتوقف فيه سيارتك.. والله يعين اهل الفرح لما يكثروا حبايبهن.. بينجبروا يسكروا الشارع من اول الحارة.. او ع القليلة قدام بيتهن.. اي وين يروحوا يعني.. يطلعوا ع القمر؟؟ طيب ناس وعندهن فرح.. والحبايب كثار.. وكل واحد بيجي بسيارة حتى لو كان ساكن بنفس الحارة.. عشان هيك بيتسكر الشارع كثير مرات.. والناس بينجبروا يغيروا طريقهن تيوصلوا ع الحارة الثانية او على قلب البلد.. مش مهم لو سكروا الطريق يا عمي.. الله يديم افراحكم وافراح كل الناس.. اللي بيتضايقوا من هيك شغلات بتكون غيرة وضيقة عين.. حسد يعني..!! الله يعمي قلوب الحاسدين. بدنا انجوز ونسكر الشوارع اللي قدام بيوتنا.. ومش بس هيك.. رح كمان نوصل حبال الكهرباء ولامباتها الملونة من ضو الشارع.. يعني من شي عمود كهربا عمومي.. مهو احنا اللي مندفع ضرايب للبلدية.. والبلدية بتدفع فاتورة الكهرباء للمرافق العامة وضوات الشوارع.. واعراسنا افراح عامة.. من حقنا نضويها على حساب ميزانية البلد.. مهي هاي الضوات مش لاهل العرس لحالهن, مهو كل الناس شايفتها كمان.. زيها زي ضو الشوارع.

كمان شغلة مهمة.. لازم تعرفوا بدنا نجيب "دي دجي" كمان.. يعني تكليطان.. ومش سماعة وحدة تيسمعوا الموجودين.. لا يابا اربع سماعات ومن الكبار كمان.. خلي الصوت يوصل لاخر البلد.. وخلي التعاليل كل ليله لبعد نص الليل.. واللي مش عاجبه يرحل!! الز اشي لما نختم السهرة بمهاهات النساوين.. ابياخ لما تطلع لك شي وحدة من هانساوين, من اللي صوطهن قوي, بطلعت اويها اخر الليل.. هاي لما يكون الجو هادي ويفكروا الناس انه حلت السهرة.. اي بيطلع صوتها ولا صوت اكبر جلاد من زمن تركيا.. اه هيك خلينا نحس وخلي كل العالم تعرف انه في فرح!!

اخر شغلة بدي اقولها وسامحوني اذا طولت المقالة.. بلاش يزعلوا دار ابو فلان.. لانه عملنا عرس مطنطن وببيتهن كان في حادث وفاة مؤلم.. ماتت كنتهن صبية يا دوب وصلت عمر الثلاثين وعندها بنت والد.. قتلها هذا المرض اللي الله يكفينا شره!! الله يرحمها ويرحم امواتكم.. بس يا عمي شو نساوي.. صرنا عازمين وموزعين المكاتيب.. معدناش نقدر نغيير!! ومنقدرش انقصر قدام المعازيم.. يعني لا حول ولا قوة الا بالله.. الله يرحمها.. مش بيقولوا الحي ابقى من الميت!! هو صحيح القصة لازم يكون فيها مراعاة مشاعرهن وشوية زوق.. بس نحمد الله اللي بعدنا منلاقي مطرح يدفنونا فيه ويصرلنا جنازه مرتبه.. شوفوا القتل اللي بيصير بالدنيا.. احضروا اخبار.. الناس بتموت بالشوارع ما حدا بيسال عنها.. عشان هيك سامحونا!! الله يرحم امواتكم.. قدروا الظروف.. وبعدين مش كل يوم احنا مجوزين.. الله يبارك فيكم وعقبال اولادكم.

#زاهد_عزت_حرش (هاشتاغ)       Zahed_Ezzt_Harash#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات