هيك اشي ما بيصير غير عنا 1

زاهد عزت حرش
(Zahed Ezzt Harash)

الحوار المتمدن-العدد: 1559 - 2006 / 5 / 23 - 10:11
المحور: الفلسفة ,علم النفس , وعلم الاجتماع
    

هيك اشي ما بيصير غير عنا (1)
زمن الحمص الاخضر

يا اخي بلا ما نتفلسف ونعمل حالنا منفهم اكثر من غيرنا.. اليوم العالم فتحت عيونها وكل اشي صار معروف.. يعني ليش انتي زعلان من حفلات الحمص الاخضر؟؟!! ولك ليش في اطيب منها تقعد هيك على جنب الشارع وقدامك حومة اولاد وشلة وشباب, وعلى شمالك كومة حمص اخضر وحلة مي فوق راس غاز قوة, وشي عشر ضمم حمص اخضر محطوطين بحلة المي.. واغلي كنك بتغلي.

بكفي تحكي لي ع النضافة وانه الشارع بينتلي بقايا حمص مفصفص.. اه وشو فيها يعني!؟؟ انت جربت تقعد على جنب الطريق وتفصفص حمص اخضر؟؟ طيب ما بيكفي اليهود اخدوا لنا الحمص المتبل.. وصاروا يعملوا حمص صبار وحمص احلى وحمص مش عارف ايش.. وما بيكفي صاروا يعتبروا الفلافل والحمص انهن اكلات اسرائيلية وطنية من الدرجة الاولى!! شو مش عمتحضر تلفزيون حضرتك؟ يعني اكم مسلسل تلفزيوني لحمص احلى شايف بحياتك انت؟؟ من يوم مطعم ابو رامي لحد ما طلعو لنا بحكاية انه "الحمص بيعملوا بحب"!! يا سلام بشو بدن يعملوا الحمص لكان.. عجيبة هدول اليهود كل شي عندهم غير شكل.

والله نسيتني عن شو كنا نحكي!! طيب عشان ما يطير موسم الحمص الاخضر من ايدينا, لازم نعمل هيك, وحلوة كثير حفلات الحمص الاخضر ساعات المسا على جوانب الطرقات.. هيك شغلة صعب اليهود يسرقولنا اياها وتصير حفلات الحمص الاخضر الاسرائيلية الوطنية بامتياز.. ساعتها شو رح يضل النا؟؟ هي رح اتضل النا وعلى ضمانتي. يمكن تستغربوا كيف بحّمل حالي هيك مسؤولية.. بس يا عمي عند اليهود اذا شخ شي كلب بشي جنينة عامة بدفعوا صاحبة مخالفة قيمتها 600 شيكل.. فكيف اذا عمل شي واحد منهم حفلة حمص على طرف الشارع وترك وراه كومة حمص مفصفص.. اي وحياتكم بيفصفصوا فصفصة.. اذا شخة الكلب بـ 600 شيكل.. وكل مساحة شخة الكلب ما بتوخذ اكثر من 15 سم مربع .. فكيف هيك كومة حمص وقشر منعوف بالطريق بيحتلوا مساحة شي 15 متر مربع.. يعني على هالرشة يمكن توصل المخالفة لشي 60 الف شيكل... ولووووو كثير هيك!!

بعدين لشو عمبتقولوا انه هي الشغلة فيها وسخ واعتداء على المرافق العامة!! ليش هذا الشارع اللي باب بيتنا يعتبر مرافق عامة؟؟ اخي هذا باب بيتنا واحنا حرين فيه.. منوكل حمص منوكل ترمس ما حدا دخلوا.. بعدين الدنيا ربيع.. واللون الاخضر كثير حلو وبيجنن.. يعني بدك يضل لون الزفت المزفت بشوارعنا السودا طول السنة على نفس الحال.. لا لا هيك مع حمص بيكون احسن؟؟ هيك بيصير تغيير بالموسم والمناظر العامة.. بعدين بيصير حركة بالبلد.. يا اخي شوف ما احلانا لما منتجمع صغار وكبار حوالي حلة المي السخنة ومنستنى الحمص الاخضر المسلوق تيستوي.. وكيف بيصير يهبل واحنا من الفرحة منهبل اكثر منه.. اي واللهي بباريس ما في هيك مناظر!! لو وزارة السياحة بتعمم مواسم الحمص الاخضر ليصير في مهرجانات دولية للاحتفال بهيك مواسم.

كانوا يقولو زمان جمعة مشمشية.. يعني ما تلحق حبات شجرة المشمش تستوي الا هي خالصة خلال اسبوع.. بهالايام ما عاد عنا مشمش.. واحنا شعب ابو البدائل.. هاي صار عنا جمعة حمصانية.. شو يعني كلها شغلت شهر زمان وبيخلص موسم الحمص وحفلات السالق والمسلوق.. وبترجع شوارعنا مزفته بالزفت الاسود.. وساعتها رح نتحصر على الحمص الاخضر ونستنى الربيع الجاي.. فبالله عليكم لا تدوشونا بقصة انه هي شغلة عمبتوسخ البلد ببقايا الحمص ومش عارف شو.. كل القصة ابو شهر زمان وكل شي بيرجع على طبيعته.. صحتين يا عمي كلوا حمص وفصفصوا على كيفكم.. خلي كل شعوب العالم تنقهر وتبز عيونها لانهم مش رح يعرفوا يعملوا مثلنا.

#زاهد_عزت_حرش (هاشتاغ)       Zahed_Ezzt_Harash#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل