يا شيعه.. يا شيوعية!!

زاهد عزت حرش
(Zahed Ezzt Harash)

الحوار المتمدن-العدد: 1635 - 2006 / 8 / 7 - 10:41
المحور: مواضيع وابحاث سياسية
    

هيك اشي ما بيصيرغير عنا!!
يا شيعه.. يا شيوعية!!

شو يا صاحبي.. بعدك متأمل بإشي اسمه الامة العربية؟؟ وانه رح يجي يوم ونصحى من غفوة اهل الكهف؟!! آخخخخخ هاي قصة الصحوة غريبة علينا.. مش موجوده بقاموسنا.. خاصة اذا اجينا تنحكي على مستوى الحكومات والزعماء العرب.. وعشان ما نحكي بالعموميات.. خوذ لك هالمسطره.

مصر والاردن.. والسعودية طبعاً.. السعودية تبعت "نفط بن الكعبة" هدول اللي برروا همجية اسرائيل .. لانه حسن نصرالله هو السبب.. ولانه هو اللي خطف جنود اسرائيل.. وهاي الدول العربية المركزية طبعاً – السعودية ومصر- اتركك من الاردن.. هاي فص كر لا بينفع ولا بيضر.. هاي الدول العربية المركزية هي اول من اعطى الضو الاخضر لاسرائيل تتشن هجومها على لبنان وشعب لبنان!! مش هيك.. كل الجرائم والبشاعة والمجازر والقتل اللي ارتكبتها اسرائيل على مدى 25 يوم.. ما حرك ولا شعره براس واحد من زعماء هاي الدول.. ويمكن ما حرك ولا شعرة براس اي زعيم عربي.. يمكن كلهن قرعان ما في براسهن شعر؟!! شو بدهن يحركوا تيحركوا.. خليها مستورة!! عشان هيك ما قدروا يتفقوا على عقد مؤتمر لمه عربية.. لا على مستوى وزراء الخارجية ولا على مستوى رؤساء الدول!!

بالمناسبة يتعرف انه رئيس فنزويلا.. شافيز, بتعرف انه واحد ما بيستحي على حاله؟؟! مش عيب عليه يتدخل بالشؤون الداخلية اللي بين العرب واسرائيل.. مش عيب عليه يسحب سفير دولته من تل ابيب؟؟ قال شو.. لانه بيرفض الجرائم اللي بتقوم فيها اسرائيل ضد الشعب اللبناني!! وما بيقبل تكون اله علاقات دبلوماسية عادية مع دولة تمارس الارهاب والقتل مثل اسرائيل!!

يعني ضروري يا أخ شافيز تحرج زعماء العالم العربي؟؟ بعدين شو دخلك انت بهيك امور.. احنا شعوب سامية.. يعني من قرمية وحدة.. منتقاتل مع بعضنا.. انت غريب شو دخلك فينا؟!! بعدين شو تحرجهن ما تحرجهن.!! ليش هنه شو دخلهن.. اللي خلق المشكل السيد حسن نصرالله.. وكل العالم بيعرف انه السيد حسن شيعي.. وحزبه ومقاومته شيعه.. والشيعه اتباع ايران!! واحنا شعوب العالم العربي سنيين.. سنه يعني!! ومش من اتباع حزب الله.. بعدين مهو ايران من اكبر اعداء العرب والمسلمين.. وخاصة ايران الثورة الاسلامية الشيعية!!

بتتذكر.. زمان لمن كانت ايران.. ايران الشاه!! ما كان في عداوة بينها وبين الامة العربية والاسلامية.. ايامها كانت ايران حليفة اميركا واسرائيل.. يعني ما كان في سبب للعداوة بينها وبين العرب.. وما كا في اي خطورة بانها تحاول تتزعم العالم العربي والاسلامي.. ويصيروا الشيعه اصحاب الحل والربط والعنعنات.. اي مهو من زمان الامام علي وهنه الشيعه يحلموا انهن يركبوا الامة الاسلامية ويتزعموها!!

بس لمن سقط الشاه ومسكت الامور الثورة الاسلامية.. وقع الخطر.. ايامها قام صدام العرب والمسلمين بالتصدي للعدو الفارسي.. وشن صدام حرب على ايران من اجل تحرير فلسطين.. والله بعدني بتذكر كلماته لما قال " ان تحرير فلسطين يبدأ من البوابة الشرقية للوطن العربي" هههههههه الله يرحمك يا اميل حبيبي.. ايامها كتب بوحدة من مقالات اسبوعياته اللي كان ينشرها بت"الاتحاد" عن هذا الموضوع .. واخر المقال كتبت .."اذا كان تحرير فلسطين بيبدا من البوابه الشرقية, يعني من ايران.. معناها كفك ع الضيعه".!!

يمكن انا اسا بديت افهم شو السبب؟؟ يعني العرب العاربة, والمستعربة, والمستغربة.. ما كان في مشكلة بينها وبين ايران ايام الشاه.. حتى لما سقط كان اول من استقبله مصر السادات.. بس من يوم ما سقط الساقط.. صارت ايران دولة معادية.!!

طيب يا صاحبي تعال تنحاول نفهم ليش هيك صار!! طيب حسن نصرالله بيحكي عربي .. مش فارسي. وبيقول انه بيدافع عن شرف الامة العربية والاسلامية!! وانه يمكن يخسر كل شيء لكنه وحزبه يرفض التنازل عن الكرامة العربية والاسلامية!! يعني معقول يكون كذاب وبحكي هالحكي للمزاودة بس.!!
يعني معقول يكون بحكي هالحكي وبعرض لبنان للدمار دفاع عن الكرامة العربية؟؟ مش يمكن يكون كذاب زي غيروا من زعماء العرب؟؟!!
طيب بلكي حسن نصرالله عميل للموساد الاسرائيلي؟!!
- لحظة شوي يا صاحبي.. حاول تفهمني.. مش يمكن حسن نصرالله عمبيعمل كل هالعمل تيخدم اسرائيل.. ويكون عمبينفذ مخطط مرتب على ايد الموساد الاسرائيلي.. يعني المخابرات؟؟ والقصد من كل عملته هاي انه يجر العالم العربي ويورطه بحرب مع اسرائيل؟!! مهنه زعماء العالم العربي بعرفوا حقيقة وضعهن وقوتهن العسكرية.. وبعرفوا انه اذا علقت حرب مع اسرائيل.. رح اسرائيل اتدمرهن وتدعس على رقابهن!! واسرائيل بدها سبب حتى تشن حرب عليهن وتقلب عروشهن!! يعني بالترتيب بين اسرائيل وحزب الله عمل السيد حسن شغلته واعطى ضو اخضر لاسرائيل.. عشان اسرائيل تشن هاي الحرب الهمجية على لبنان.. وهيك بيتحرك الدم العربي وبيقوموا العرب ضد اسرائيل.. واسرائيل بتستغل هاي القومة وبتكسر راس العرب وبتشتت جيوشهن!! عشان هيك زعماء العالم العربي فاهمين القصة واللعبة كلها .. وعشان هيك وقفوا مع اسرائيل ضد حسن نصرالله.. يعني لو كانوا اغبياء وراحت عليهن .. كان مش بس بيروت اسا مهدومة.. كان بتكون القاهرة وعمان ومكة مهدمات كمان وبتكون شعوبهن مشردة!!

لو كانت نوايا حسن نصرالله شريفة ووطنية وعلى قد المسؤولية.. كان رتب خطواته مع حسونه.. آه حسونة.. يعني حسني مبارك. مهي سوزان ما بتنادي عليه غير حسونة!! من يوم ما راح لعند بوش قبل اكم سنه.. ونام عنده في عزبته بكاليفورنيا يا بتكساس.. مش مهم.. المهم من يوم ما نام عنده وبوش صار يدلعه ويقوله حبيبي حسونه.. صارت كمان سوزان تنادي له حسونه!!لا.. لا تفهمونيش غلط.. حسني مبارك مش لوطي!! كل ما في الامر انه بوش بحب يدلعه.

على كل الاحوال خلينا بقصة شافيز.. والصحيح انه الشغلة قلبت عليه.. صفى لحاله زي الاهبل!! سحب سفير دولته من اسرائيل.. قاموا العرب طقعوا له!! طيب مش يمكن شافيز عمل هيك لانه شيعي؟؟ آه شيعي شو فيها.. مهو من يوم ما وصل للحكم والكل بيقولوا عنه بالاخبار انه شيعي.!! لا.. لا اسف كانوا يقولو شيوعي. مش يمكن هاي مثل هاي؟؟ لكان شو اللي خلاه يخطي خطوه زي هاي ضد اسرائيل ولصالح الشيعه وحسن نصرالله.!!؟؟

اسمع يا صاحبي يمكن خربطنا نبلش.. مش عمبفهم شو اللي عمبيصير؟؟ بس بتذكر انه مظفر النواب .. وهذا واحد شيعي وشيوعي.. واصله من النجف كمان.. يعني التهمة ثابته عليه. بتذكر قصيده اله بيخاطب فيها الامام علي.. وبيقول له "يا ملك الثوار ان الثورة يزنى فيها.. والقلب تموت امانيه" وبيكمل حكي لآخر القصيدة .. وبيقول بآخرها "واللهي لو جئت اليوم لحاربك الداعون اليكَ وسموّكَ شيوعيا".. خلص بيّنت.!

حسن نصرالله من اتباع الامام علي.. يعني حسن نصرالله كمان شيوعي!! واذا كان حسن نصرالله مش شيوعي .. معناها شافيز شيعي!!

مش مهم.. اذا كانوا شيعه او كانوا شيوعيه.. مهو اي طرف فيهن بيكون من الد اعداء الاسلام والعرب!! واذا بتتذكر يا صاحبي ابو السعيد.. هياني قلت مع مين عمبحكي.. حتى ما تقولوا بتهبل!! اذا بترجع معي شوي لبطن التاريخ وبتتذكر شو اللي صار بموقعة كربلاء.. كيف انقتل من جيوش المسلمين اربعين الف مسلم.. بالحرب اللي دارت بين السنة والشيعة!! وكمان شغله صارت مش من زمان.. اذا بتتذكر لما كان عبد الناصر بالحكم.. كيف الشيوعين الروس ضحكوا عليه وعملوا له السد العالي.. وجمعوا كمية مي مخيفة في بركة ناصر.. بتعرف ليش هيك عملوا.. مش عشنهن بيحبوا عبد الناصر زي ما كل الناس كانت فاهمه.. مهو كل اشي انكشف لمن اجا السادات.. ولمن اجا ابو عمر وفضحهن وقال انه الروس الشيوعيين عملوا هذا السد عشان اذا بيصير حرب بين اسرائيل ومصر.. وطبعاً الكل بيعرف ان سلاح الطيران الاسرائيلي من اقوى سلاح بالعالم.. وانه فش قوة سلاح طيران بالعالم العربي بتقدر تواجه.. ففي هيك حاله بتقدر اسرائيل تضرب السد العالي.. وساعتها بيصير طوفان بيقضي على مصر عن بكرة ابيها!! يعني الشيعه كانوا السبب بأول فتنه بتاريخ الاسلام .. والشيوعيين عملوا اكبر مجمع مياه بمصر.. مش عشان عيون مصر .. انما عشان اسرائيل تقدر تضرب السد وتغرق مصر وتلعن سنسفيل ابوها!! طيب كيف بدك زعماء العالم العربي يتماثلوا مع شافيز او يدعموا نصرالله؟؟!

شايف كيف اسا فهمنا عليهن.. وعرفنا شو السبب انهن لحد اليوم واقفين مع اميركا واسرائيل.!!؟؟ بس بتعرف بدي اذكرك باشي كنا نقوله دايماً.. يمكن هو شطر من بيت شعر حفظناه عن غيب.. بيقول "يا أُمة ضحكت من جهلها الأُمم".. قال عرب قال!!!!!!!!!!!!!!!!!!!!!!!

#زاهد_عزت_حرش (هاشتاغ)       Zahed_Ezzt_Harash#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات