إسلامي، إسلام تيغسالين !

ميمون الواليدي

الحوار المتمدن-العدد: 6715 - 2020 / 10 / 26 - 02:40
المحور: العلمانية، الدين السياسي ونقد الفكر الديني
    

إسلامي،إسلام تيغسالين
الإسلام ثابت أنطولوجي فالحياة ديال المغاربة، كيما ثاغنجا وبيلماون(بوجلود) والأولياء وعاشورا. بمعنى هادشي جزء من ثقافة المغربي وشخصيتو ماشي العلمانية ولا المدنية ولا الماسونية ولا المؤامرة لي غايحيدوه. المغاربة من الشمال للجنوب حياتهوم كاملة كايتعاودو النكت الالحادية ديال أيت حديدو على الدين بدون حرج وعمرهوم فكرو بلي داكشي فيه زعزعة عقيدة مسلم وعمرهوم كفرو ايت حديدو ولا هجمو عليهوم.
أنا كبرت فواحد الفيلاج لي ماعمرو تطرح فيه هاذ النقاش ديال الإسلام في خطر، ولا نصرة الإسلام ولا هم يحزنون. الوالد حتى ل40 عام باقي مكايصلي رغم أنه مسلم وصديق لكاع الفقهاء لي دازو فجامع وتقريبا كل شهر شهرين عندنا السلكة فالدار. ورغم أن الوالد قاسح بزاف ولكن الموضوع الوحيد لي عمرو غوت علينا عليه ولا ضربنا عليه هو الصلاة. ملي كايجي رمضان كايصلي وليلة 29 كايعاود اركع آخر ركعة واقطعها وبخير وعلى خير. أغلبية الناس فالبلاد كانو هكاك . المعلمين لي قراونا مكانوش كايصليو وكايكميو وكايشربو الشراب ومع ذلك كانت عندهوم قيمة وكولشي كايحتارمهوم . فالاعدادي كانت عندنا استاذة التربية الإسلامية كاتلبس الميني واستاذ ديال التربية الاسلامية كايشد معانا البندير فالرحلات، والفقسم كايشرح كما يجب، وملي يوذن المؤذن كايمشي يعبد الله بدون تفاخر ولا رياء وعمرو وقف الدرس باش اصلي ولا باش اسمع الآذان، وعمرو جبد سيد قطب ولا البنا ولا الحكم الجبري ولا خلافة على منهاج النبوة. وفالثانوي كانوا عندنا استاذات كايلبسو الميني واساتذة ملحدين ويساريين واساتذة مؤمنين كايعبدو الله، ومع ذلك الفيصل فالقسم هو العمل والاجتهاد. مكانش معانا تلاميذ كايربيو الزغيبات الا فيما نذر ومكانوش معانا تلميذات مغطيين رؤوسهم إلا فيما نذر.
فالبلاد، كانوا بيوت الدعارة ملاصقين مع البيوت ديال العامة وكانوا معروفين، ومكاينش لي كايتهجم عليهوم ولا كايكول هذا الفساد خصنا نحاربوه. كنا كانتعاملو معاهوم على قدم المساواة والعائلة ديالي كانت عندها علاقة طبيعية مع شحال من وحدة وكانتصارفو معاهوم وكانبيعو ليهوم الحليب واللبن بدون اعتداء ولا احتقار. نهار كايكون البني فجامع ولا ليلة 27 رمضان حتى هوما كايوصلو الكسكس للخدامة والمصلين وكايتكال كأيها كسكس وكايدعيو معاهوم الناس. فيهوم لي ساكنة بوحدها نهار العيد كاذبح وتصدق كاع داك اللحم، داكشي لي مكايديروهش أغلبية متأسلمي اليوم.
هادشي ديال "الاخونيزم" و "الوهابيزم" و "السلفيزم" عمرو كان عندنا، بل أكثر من ذلك الناس عندنا كانوا كايعتابروه بدعة، بحكم أننا جغرافيا مرتابطين بالزاوية الدلائية وزاوية امهيواش، فكان التدين عندنا صوفي مسالم أكثر روحانية، وكنا فالصغر كانحضرو الحظرة فالزنقة بنات واولاد ومراهقين و مراهقات بلا مشاكل وعمر شي حد هضر على اللباس ولا تغطية الشعر ولا حلق الشارب والعفو عن اللحية حتى جاو اصحاب الرايب والزنجبيل !
لهذا ملي كايسولني شي حد على الدين، رغم توجهاتي اليسارية الراديكالية لي مخافية على حد، كانقولو أنا مع الإسلام ديال تيغسالين، الإسلام لي كايجمع الجزار والعاهرة على الطرف دالخبز، الإسلام لي مابزز على الوالد اصلي حتى نهار بغا بخاطرو، الإسلام لي سمح لعضو فرقة موسيقية اولي فقيه المسجد، الإسلام لي كايحتافل فالمولود وعاشورا وثاغنجا وذكرى سيدي علي أمهاوش والبوناني والسنة الأمازيغية. الإسلام ديال التويزا لي كايتعاون فيها المؤمن مع الملحد على الحرث وكايتغداو بطاجين مطيباه عاملة جنس وكايحمدو الله ب3 واخا غير واحد فيهوم لي ملتزم دينيا.

#ميمون_الواليدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل