ليش مريدي

احمد عناد

الحوار المتمدن-العدد: 5964 - 2018 / 8 / 15 - 17:10
المحور: مواضيع وابحاث سياسية
    

ليش مريدي
ليش تفجر بمريدي
مريدي بية شي يمثل الحكومة حتى تستهدفه
مريدي مابية بس
ابو بسطية المخضر
مريدي بيه بسطية السمج
مريدي بية بسطية النگة
مريدي بية العتيك والمستهلك
مريدي بيه ناس على باب الله
مريدي بيه ناس غبشت وكالت يارزاق
مريدي بي ناس غبشت كالت يا مسهل
مريدي بيه واحد جايب مبردة بيته يبعه
حتى يوكل جهاله
مريدي بية واحد جايب هدومة يبعه حتى
يرجع بعلاكة لجهاله الفاتحين حلوكم
مريدي بية ارملة شهيد تبيع خضورات
حتى تعيش الايتام
مريدي بية ارملة مغدور جاي تبيع زيت
الحصة حتى توكل جهاله
مريدي بين ابن مخطوف قتل يبيع علاليك
حتى يعيش امة واخوته
مريدي بية زوجة معاق بالحرب اهملته الحكومة
تبيع خردوات حتى تعالجة
مريدي بية اخ شهيد يبيع جگاير حتى يعيش عائلته
وعائلة اخو الشهيد الي سنتين وما مستلمين التقاعد
مريدي بيه ابو فالح كبير سن فقد اولاده الثلاثة بانفجار ساحة الخمسة وخمسين جان عدهم بسطة بيض بالجملة متعاونين عليه ويحاول ان يعيل زوجاتهم واحفاده بنفس المهنة
مريدي بية ام جبار ..
الي ولده واحد نخطف هو وتريلة التجارة ونقتل والثاني مات بانفجار السنك جان يشتغل حمال والثالث بسبايكر وتنكرت الحكومة والاخير استشهد بالموصل. وعده كوم احفاد وتساعده مرت جبار ابسطية المخضر والي حصلت لقب ام الشهيد بس
مريدي بيه ستار الاسير ..
الي كضة نص عمرة اسير بحرب ايران ولحكتة الطائفية وانبترت رجله من اطوع للدفاع بعد فتوى المرجعية وحاط بسطية جكاير وكارتات ولليوم يحلم بجميلة جيرانهم الي راد يزوجه ايام الشباب وابوه انطاهة لابن عمه .
مريدي بية عدنان المله ..
كاما يلقبونه لشدة ايمانه وورعه وخلقه الي ما فوت زيارة وهو يمشي على رجلية وما نادت المرجعية هب ولبى النداء لكن من اتصوب وراحن نص مصارينه. وصارن صوندات محد سال علية ولاراتب ولاعلاج ولاتقاعد خلف الله على ابن عمه لم اخوته وعشيرته وحشمهم ولمولة فلوس العمليا وهسة ابسطيته مال الملابس الداخلية والجواريب وحلف بعد حتى الجامع مايطبله .
مريدي بية مية مثل هاي القصص بيه ميتيين. كله ناس عايشة تحت انين الليل غصات النهار
وها هو الموت يحلق فوق رؤسسهم مع كل صباح وفي كل مكان في العراق الا الغبراء فهي امنة ..
مريدي لايحوي بين طياته غير انين الفقراء ولوعة المضلوم وحسرة المغدور مريدي لايحوي الا الفقراء والكادحين الذين يسعون لقوتهم اليومي
لايحوي سوى زفرات الالم وحسرات الجياع. تان تحت وطأة حكومات فاسدة سرقت قوت هولاء الفقراء لايحوي سوى الايتام والارامل والامهات الثكلى لايحوي سوى من ترك من تاجرتم بدمائهم لسنوات مرة عرقية ومرة مذهبية ومرة باسم الدفاع المقدس وجلستم في كراسيكم وقصوركم لا يحوي مردي سوى تلك الغصة والسعي وراء لقمة العيش. والتي تنتهي بدموع في اخر اليوم مع كل طلب من ابن مغدور او زوجة محرومة او ام ذكر ولدها الوحيد .
سؤالي ليش مريدي ليش مريدي
سيضل يتكرر كل يوم
هل فهمنا من يفجر بنا ام لم نفهم لحد الان وسنكرر
ليش مريدي ..
ليش مريدي ..
احمد عناد

#احمد_عناد (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل