تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

خريج وعاطل عن العمل

عباس طريم
كاتب - وشاعر
(Abbas Trim)

الحوار المتمدن-العدد: 7495 - 2023 / 1 / 18 - 15:52
المحور: كتابات ساخرة

خريج وعاطل عن العمل .

___________________________

انه مليت انه مليت .... خريج اوكاعد بالبيت
انه مليت انه مليت .... عطال اوكاعد بالبيت
+ + +
يوميه اويه عيالي صراخ ... طكه وطيح وطيخ وطاخ
مريتي اتطالبني ابمسواك ... وكل يوم انه اوياهه اعراك
المسكينه اتحصللهه اطراك ... لو صعدت عندي اوحريت
+
تتعمد فتح الثلاجه .. وتكلي اطفالك محتاجه
تريد اسماك اتريد البان .. ولحم وتفاح ورمان
وجيب اتكلي الباذنجان .. وتمن ماعدنه ولا زيت

+
جندوب امكابل بدريه .. واتخنزر كل ساعه عليه
اتخنز وادري اتريد اكروش..وتندب حظهه ابوسط الحوش
واتسمعني .. اتصيح الدوش .. لياحد عاطل ما بي هيت
+

ممنوع اليحجي و يتنفس .. واليكعد يمي ايصيراخرس
الكل يمي ايدنكون الروس .. وياويله اليطلبني افلوس
وابني اكويطع من ايحوس .. خياط ابراسه احسب خليت
+
ما اسمح للواحد يحجي .. واكسر راسه ابايدي اليبجي
من اكعد يمي التوثيه .. ومن اصرخ ترجف بدريه
واتروح اتحضر الصينيه .. اتكلي اتدلل يابو البيت
+
ناطر بالبيت التعيين .. وكلما اراجعهم ... بعدين
واحد كلي احذر لتدوس .. انعينك بس انطينه افلوس
كتله وروح امك مهلوس .. هلستهم كال المن جيت
+
امي اتصيح الله واكبر .. مشتهيه اكل راس اشونذر
ولكم ما شفنه التفاح .. وما ضكناه من يوم الطاح
صاحبنه امخلصهه ادياح .. حسفه ويه الدايح ظليت
+
واتلوم امي وتحجي اجماله.. واتكلي اطلع للعماله
ويالخلفه اطلعت انه وجوكه .. وكلولي ابسرعه اشمرفوكه
ومن شمريت اول طابوكه .. طكيته ابراسه اوشرديت
+
امي اتخاف انجن واتخبل .. واتدور لي وتنشد عن حل
كل يوم انروح الكشاف .. يطكني ويصرخ لا لتخاف
ايكلي ابراسك جن اصناف ..وانه ادري ابروحي انجنيت
+
لا ما ظلت عندي اعصاب .. واتعارك حته اوي الباب
ااتدخل بالمايعنيني .. مره ابوكس وغلكو عيني
ومره باسعاف اموديني .. للعمليات اوحسيت
+
مليت امن الكعده لوحدي .. اموشل ومصفر ما عندي
بطال واكتب اشعار .. وبالصدفه اندك باب الدار
ومن اعرفته ايريد ايجار .. من الحايط كمت ونطيت
+
اضطريت ادين من ماضي .. وماضي انطاني وخابر راضي
وراضي نشرهه ابيوم الثاني .. وانطاهم اسمي اوعنواني
وعلج ابحلك الكل خلاني .. وانتشرت بالانترنيت
+
مكرود انه وحظ ما عدي .. بس عشتو ايسموني افندي
مفلس والبس ربطه وقاط .. مشكك بي عشرين اخياط
بجيبي دينارين افراط .. وصمونه اوجاي اتغديت
+
عوذه كتبلي حجي امناتي .. وقطني افلوس وديج اهراتي
وكلي اسمع مابيني وبينك .. اسبوعين اويطلع تعيينك
اتبشر راح اتسد كل دينك .. لهنا , ندهوني اوفزيت
+
انه مليت انه مليت .. خريج اوكاعد باللبيت
انه مليت انه مليت .. عطال اوكاعد بالبيت

#عباس_طريم (هاشتاغ) Abbas_Trim#

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن
في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل