بالعراقي المو فصيح

حميد حران السعيدي

الحوار المتمدن-العدد: 4760 - 2015 / 3 / 27 - 14:48
المحور: كتابات ساخرة
    

ضاعت علينا (يبو الجنيب)
عراقي كاتل روحه على اليصير باليمن !!!.
والله ياخويه أنه وياك وما هاين عليه أي تدخل بالشأن اليمني وخاصة من ألسعوديه ودول الخليج لأن ألمسأله مبيته من ناحيتهم ضد هذوله الناس , بس يبعد أخوك إحنه هم عدنه حرب شو ماشفت العزم ماخذك بهاي الحده ليش أحنه وداعش نلعب دعبل مثلا ؟؟؟ .
خويه تره الشهداء اللي قدمناهم من أجل العراق هوايه ونزيف الدم بعده مستمر , والمظلوم مايرضه يصير على غيره ظلم واللي يعاني من تدخل الاخرين مايرضه يتدخلون بشؤون غيره وخاصة أذا كانوا من نوع آل سعود مايدخلون بالمعروف وتاريخهم يشهد على ذلك ...لكن مو مثل (مزبان) الله يرحمه واسولفلك سالفته :
صارت طلابه بين اخوانه وجماعه أخرين والطرفين يهددون بعضهم ويتوقعون الصبح تصير عركه , وبعد صلاة الفجر مزبان أخذ عتاده وبندقيته وطلع , صاح وراه واحد من اخوانه ها مزبان وين رايح ؟ , كاله والله خويه خوالي تفكهم ثار وانه مالي كعده وياكم رايح لخوالي لو قاتل لو مقتول , رد عليه أخوه وكاله , مزبان خويه اذا شايلك غيض وتريد عرك تره الصبح قريب وتفكنه راح يثور واذا خوالك اعز من اخوانك الله وياك .
ماعلينه ارجع الصاحبي العراقي واكله خويه تره خاف انته سمعت اكو ناس تتدخل بقضية اليمن , وداعتك ذوله مثل مرحوم (كاطع) وهم اسولفلك سالفته :
كان السلاح أيام زمان مكوار وفاله وقليل من البنادق من نوع (شوزن , وجعازه , وأم عبيه ... وغيرها) وكلها بنادق مداها قريب ... المرحوم كاطع سمع اكو بندقيه اسمها برنو تنباع بسعر غالي بس هي ترمي بعيد وهو الله امكنه فراح اشتراها , من رجع سألوه جماعته عن سعرها وعرفوا بيها غاليه كلش وجان يكدر يشتري بسعرها 10 بنادق من اليعرفونهن لاموه وعتبوا عليه فضحك وكاللهم : هاي رصاصتها توصل بعيد وانه عندي غايه وي ناس راح اوزهم ويتعاركون بيناتهم وانه ارمي من بعيد , رصاصهم مايوصلني ورصاصي يوصلهم وشكتل منهم انه ربحان .

#حميد_حران_السعيدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل