تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

وصايا أم- شعر شعبي

ابراهيم الخزعلي
(Ibrahim Al khazaly)

الحوار المتمدن-العدد: 4503 - 2014 / 7 / 5 - 02:18
المحور: الادب والفن

وصايا أم

يبني لو شفت السّمه إدّلهم

او من بارودها تظلم

والهموم اعليك تِتلملم

ودنياتك طعمه سم

وبهيمه وحدك الماشي

وايامك جروح ودم

خلك رجل

خلك قوي

خلك شهم

خليك أقوى من دنياك

واحذر دوم من اعداك

اليضعف يبني يتحطم

ولاتخلي ايدهم بيدك

تره العاشرهم تندم

يبني الكّوم محتاله

تتربص وتتحايل

وتتآمر وتتشمشم

و لو مدّيت اله بيدك الماعون

تعض ايدك و ماترحم

طبعهَ الغدر مثل الذيب

وسنون الذيب لو كشّرت

متبسم

يبني كل تاريخهم عدنه

ما مش يوم ما بي دم

امشي اعل الدرب لاتحيد يوليدي

لايمنه ولايسره ولاتساوم

خلي ابالك الثوار

الّي اخبطت ماي الهور بدماها

وكردستان يا ما خضّباها الدم

وانظر دوم ليكَدّام

لاتحزن ولاتيأس ولاتهتم

لايغرّوك بَبْيَضها

ولا اصفرها ولا اخضرها

وتبيع الكرامه والشرف والدم

تدري اشلعبت الأنذال يوليدي

من چان الها الحكم مغنم؟

سنين طوال يا ما ضوكَونا المر

وچان اعراكَنا سجن و مقبره و مأتم

شوف اسَجّل التاريخ يوليدي

ايادي املطّخات بدم

داست عل الشرف

والدين والناموس

تزني وتعتدي وتعدم

لا غيره وشرف عدها

ولا تقره ولا تكتب ولا تفهم

ما عاش المارضه بالذل

وي شلّه امسربته تحكم

تريد الناس هم خرسان

هم عميان

واليحچي ويشوف بعينه مايسلم

أنه ادري بك ما تطخ الراس يوليدي

للأنذال والأوباش

من جاحش او من بعثي

او من شيشان ، من افغان

والرعيان واليظلم

واحدهم صخل اثول

واخر ثور ومعمم

انه ادري بك چبير انته

واكبر بعد من الهم

يهل طبعك وفه وغيره

وعل النخوات دومك

حاضر امحزّم

وحتى النخوه ما تحتاج

قبل النخوه تتقدم

براسك تحلف الشجعان يوليدي

اخو خيته الوفي المعروف

مثل الشمس ما ينضم

هذا انت العراقي

الما يهاب الليل

وذياب الظلمه لا والله

من ای-;-دك فلا تسلم

النه يشهد التاريخ يوليدي

والينكر هذا لو اخرس

او لو اعمه او لو ابكم

انته الشيدت بابل

وبْمسَلّتْه َصرت تحكم

يا حيف والف يا حيف

ويا وسفه الزمن ظالم

لا يعدل ولا ينصف ولايرحم

وطبع الوكت چالميزان بفعاله

( يَضَعُ الرّواجِحَ
والنّواقص تَعْتلي )

يبني لا تنسه وطنّه

وشعبك المظلوم

والمحروم والمسكين والكادح

والمضطهد والمعدم

يبني لا تنسه اخوتك

الايزيدي والصبي

والعربي والكردي

والآشور والكلدان والمسلم

يبني كلكم ذخر ليّه

وبيت البيه زلم يبني

ايادي اعداه ما تكَدر

تجيه اتخربه وتهدم

وصم تراب من لحدي

ضمّه الك ساعة المحنه

بكل ذرّه العدو ترجم

يبني لا تنسه وصيتي

ايحفظك الله من المصايب

والنوايب والخيانه

والغدر واهل الظلم

الدكتور ابراهيم الخزعلي
4/7/2014
[email protected]

#ابراهيم_الخزعلي (هاشتاغ) Ibrahim_Al_khazaly#

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن
في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل