قصيدة شعبية - وصية أم

ابراهيم الخزعلي
(Ibrahim Al khazaly)

الحوار المتمدن-العدد: 2627 - 2009 / 4 / 25 - 04:44
المحور: الادب والفن
    

وصية أم


يبني لو شفت السّمه إدّلهم

والهموم اعليك تِتلملم

ودنياتك طعمه سم

بظلمه و وحدك الماشي

وايامك جروح ودم

خلك رجل

خلك قوي

خلك شهم

خليك أقوى من دنياك


واحذر دوم من اعداك

اليضعف يبني يتحطم

ولاتخلي ايدهم بيدك

تره العاشرهم تندم

يبني الكّوم محتاله

تتربص وتتحايل

وتتآمر وتتشمشم

و لو مدّيت اله بيدك الماعون

تعض ايدك و ماترحم

طبعهَ الغدر مثل الذيب

وسنون الذيب لو كشّرت

متبسم

يبني كل تاريخهم عدنه

ما مش يوم ما بي دم

امشي اعل الدرب لاتحيد يوليدي

لايمنه ولايسره ولاتساوم

خلي ابالك الثوار

الّي اخبطت ماي الهور بدماها

وكردستان يا ما خضّباها الدم

وانظر دوم ليكَدّام

لاتحزن ولاتيأس ولاتهتم

لايغرّوك بَبْيَضها

ولا اصفرها ولا اخضرها

وتبيع الكرامه والشرف والدم

تدري اشلعبت الأنذال يوليدي

من جان الها الحكم مغنم؟

سنين طوال يا ما ضوكَونا المر

وجان اعراكَنا سجن و مقبره و مأتم

شوف اسَجّل التاريخ يبني

ايادي املطّخات بدم

داست عل الشرف

والدين والناموس

تزني وتعتدي وتعدم

لا غيره وشرف عدها

ولا تقره ولا تكتب ولا تفهم

ما عاش المارضه بالذل

وي شلّه امسربته تحكم

تريد الناس هم خرسان

هم عميان

واليحجي ويشوف بعينه مايسلم


أنه ادري بك ما تطخ الراس يوليدي

للأنذال والأوباش

والرعيان واليظلم

وانه ادري بك جبير

واكبر من الهم

يهل طبعك وفه وغيره

وعل النخوات دومك

حاضر امحزّم

وحتى النخوه ما تحتاج

قبل النخوه تتقدم

براسك تحلف الشجعان يبني

اخو خيته الوفي المعروف

مثل الشمس ما ينضم

يا حيف والف يا حيف

ويا وسفه الزمن ظالم

لا يعدل ولا ينصف ولايرحم

وطبع الوكت جالميزان بفعاله


( يَضَعُ الرّواجِحَ
والنّواقص تَعْتلي )

يبني لا تنسه وطنّه

وشعبك المظلوم

والمحروم والمسكين والكادح

والمضطهد والمعدم

ويبني لا تنسه اخوتك الصّبّه

واليزيدي والعربي والكردي

والآشور والكلدان والمسلم

يبني كلكم ذخر ليّه

وبيت البيه زلم يبني

ايادي اعداه ما تكَدر

تجيه اتخربه وتهدم

وصم تراب من كَبري يبني

ضمّه الك ساعة المحنه

بكل ذرّه العدو ترجم

يبني لا تنسه وصيتي

ايحفظك الله من المصايب والنوايب

والخيانه والغدر واهل الظلم



الدكتور ابرهيم الخزعلي
10/4/2009
[email protected]

#ابراهيم_الخزعلي (هاشتاغ)       Ibrahim_Al_khazaly#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل