مواويل مسيحيّة

زهير دعيم

الحوار المتمدن-العدد: 3868 - 2012 / 10 / 2 - 17:17
المحور: الادب والفن
    

بْغَرِّد قصيدي في عِشق مصلوب
غلب الرَّدى والشرّ والمغضوب
واشترى حياتي بدمو هالمصبوب
وزرع السّما أفراح ومْواويل

عشق الخير والإنسان دربي
وإله الموعظة والحُبّ ربّي
مع ابليس رح تظلّ حربي
ما دام هالقلب يُخفُق بالحياة



وين ماروح رَح احمل صليبي
واشهد للناس ، لعدوّي وقريبي
بغير يسوع ما النا هريبي
من جهنم وسلطان العِدا.


بفرن الحُبّ طهّرني إلهي
أنا اللّي كنت عشقان التباهي
زرعني رجا وقلع منّي الدّواهي
وغمر بالدم جروح الزمان



ميلاد الربّ عنواني وناسي
وغيرو ما لفت نظري وراسي
مصيرَك اذكرو إنْ كنت ناسي
ولا تسلّم حياتَك للبلى


يسوع المجد والعزّ وإبائي
حامي موطني وحافظ أبائي
بوقت السَّقَم هو بلسم دوائي
وتاج الماز عَ جبين العمر

بزمن الحرّ يسوع انتعاشي
وبوقت الثلج بِدَفّي فِراشي
كلام الربّ هو زادي ومعاشي
وضمّة ورد عَ جبين الزمن


انسان الخير ما أسرع وصولو
مهما كان الوانو وأصولو
رب المجد موقّع عَ حصولو
ع تاج مزيَّن بلون الذهب

بِطعمِ الحُبّ شكلّي حياتي
وغَسَل بالدم آثامي وآهاتي
حَمَل الربّ بدّلي سُباتي
بنغمة تشقّ غيمات السّما


حُبّو قَد حْدود الكوْن
من كل جنس ومن كلّ لوْن
وقت الشِّدّة أمل وعوْن
وراحة بال يا خاطي

كلام الربّ عنواني وآياتي
وهمسة روح بترفرف بناياتي
هيهات انساه كل العمر هيهاتِ
فقلبي بلاه شقفة من حجر


درب الربّ مشواري وطريقي
وزادي ومطرتي وخِلّي ورفيقي
ونسمة مُعنشة تْطفّي حريقي
وتمسح ادمعي بليلة شتا

لغير الربّ ما بكتب قصيدي
وبزرع حقلتي بوردِ وحصيدي
فادي الكون ثرواتي ورصيدي
وربّي الّلي فدا كلّ البشر

حَبّيت الربّ والبسمة عَ تمّو
ورد فوّاح متخبّي بِكمّو
غلب الشَّرّ بصليبو وِدمّو
وغمر القلوب بِحُبِّ البَشَر

ضايع كُنت وبالحُزن مجبول
عمري خريف وأشهري أيْلول
لقاني الربّ وقال : الوقت مقبول
ادخل وتمتّع بأفراح السّما


جليلي أنا ويسوع جاري
ناقش كلمتو بقلبي وداري
صليبو دوم عنوان افتخاري
وجمرة شاعلة بليلة شِتا


طريق الحُبّ مشواري ودربي
وفادي النّاس ابن الله ربّي
مسيحي أنا لا شرقي وغربي
وصليبي رافعو فوق السّحاب


عطرو علَّق بِتيابي
مِن يوم مَ دقّ بابي
يسوع هالربّ الغالي
الهي وأحلى حْبابي



يسوع البارّ زهّر في غصوني
وسيّج حقلتي بأعلى الحصون ِ
المرأة الفاضلة بنتو المصون ِ
وكلّنا في الربّ اخوة يا بَشَر

يمينو مدّ ومسّح دموعي
ودفّا بالحُبّ أيامي وضلوعي
لا تستغربوا..هذا يسوعي
الّلي شفى بالدم جروح الزّمن



ظلّ الربّ في قلبي وبعدو
ملك مُختار لا قبلو وبعدو
وهبني البِرّ يوم وفّى بوعدو
ومات مرفوع عود الصّليب


أمثالَك ذهَب وآياتَك لآلي
وصليبك مجد بيضوِّي الليالي
روح الحقّ يا ساكن خيالي
إلَك في مهجتي أحلى مكان


بداء الحُبّ والرحمة رماني
غيَّر مسلكي ولوَّن زماني
إبن داوود بدمو اشتراني
وزرع القلوب نور وميجانا


يا خاطي العمر ساعات وثواني
حرام يضيع عَ باب الغواني
احسبْها صحّ وشكّل هالأواني
بعهد جديد حكيو من ذهب موّال

وطن الربّ هو داري ودياري
ومتعة مأملي ورمز اختياري
صليب يسوع باسبورتي وفخاري
وتأشيرة دخولي للسّما



غرّد عَ غُصني ونَوَّر الأكوان
وسقى جذوري من دمّو هالريّان
هذا يسوعي فادي بني الإنسان
وحامي حمانا والأرض والأوطان


حضورَك مجد وآياتك هنيّات
يا مخلّص النَّفس من إيد الخطيّات
ينبوعَك عسّل وصليبك نُسيمات
تهبّ وتنعش قلوب البشَر

احموا الأرامل واحفظوا حقّ اليتيم
وحبّوا العِدا قال بالصّوت النغيم
راعي الخِراف الّلي غلب عتم الجحيم
إلو رح تسجد كلّ الرُّكَب

صليبي عزّ وعنوان انتصاري
وقصة حُبّ لخيّي وجاري
كتبها الربّ بدمّو الّلي جاري
ملحمة عشق عّ جفن السّما

بين التّلّة والتلّة زرعنا الآمال
وسقيناها صُبحيّة بدمّو اللّي سال
لا تغتّروا يا حْبابي هوِّ المآل
وهوِّ الشمعة المضويّة وأحلى موّال

جليلي أنا بالموطن جليلي
وصليب الربّ عنواني ودليلي
ابن فرعون لا مثلي ومثيلي
لأنّي ابن لربّ السّما


بعيوني أنت الأحلى وربّ الأكوان
راسم الدّنيا لوحة بريشة فنّان
انت الربّ المتجلّي بصورة إنسان
حُبّك عطري وينبوعي


بأحلى الشِّعر عم بكتب قصيدي
قصائد حُبّ مرشوشة برحيقي
عن ملك الكون الهي وطريقي
ابن الله يسوع الملك


بشموخ ومجد أنا برفع صليبي
وبقول للناس يا خيِّي وحبيبي
ذوقوا الحُبّ وشاركوني نصيبي
نصيبي مسجّل بسفر الحياة


حبّوا العِدا وصّانا فادينا
وكتب بالدم عهودو الأمينا
حبّ النّاس مرفأنا ومينا
بيحمي سُفنّا من هياج البَّحر

غَسّل الإثم وطهّر لي الأواني
وزرع الدّرب بزهور الأماني
يسوع البّارّ أبدية حَباني
وتاج مصنوع من أغلى ذهب


بيوم الضّيق بتنعشني نسمتو
بيشفي المرض وبخفّف قَسوتو
يسوع الربّ في قلبي رسمتو
ملك متوّج عَ طول المدى

بصليب الربّ بْتحدّى جنونو
وبْسحَق قامتو وبْخَزِّق عيونو
إبليس الكذب مع شرّو وفنونو
أمام الربّ غبارة في الهوا

#زهير_دعيم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل