ومضات

حسين جهيد الحافظ

الحوار المتمدن-العدد: 2474 - 2008 / 11 / 23 - 06:36
المحور: الادب والفن
    

1 –
غين + ميم = غم
هم × هم = هم
هاي الدنيه وآنه اِمعاند
والما يعرف خل يتعلم

2— 14 / 7 / 1996
اِبشوگ اِشتهيتك قلم
تكتبلي ما أعنيه
ترسم أمل بالگلب
اِبلون الوفه تمليه
صدگ لگيتك قلم
لكن حبر ما بيه

3— 12 / 2 / 2003 – النجف
حضنتك بالحلم نعناع
وسمعتك نايل وچوبي
لگيتك طبع من زمزم
غسلت اِبمايك اِذنوبي
مر بي الصحو وفزيت
لگيت الحلم مكلوبي


4 — 25 / 3 /1997 *
اِبگلبي رسمتك فرح
لوحه الوفه عنوان
جيتك لگيت حزن
واِختلطت الألوان

5 – 31 / 10 / 1985 *
كتبت الأقلام كل شي
رسمت الحب مزهريه
ِمطرزه اِبأحله الأوراد
بس قلم حبنه خطيه
مات سكته
وفارگه اِبحسره المداد
* 4 – 5 نشرت في جريدة الناصريةالعدد 129
السبت 2 / 11 / 2004

6— 5 / 6 /1998
گبل بي جرج
منك ما أگلك لا
بس اِبنعمة النسيان داويته
شجاك وفززيته اليوم
وأكبر من گبل ما چان رديته

7— مهداة الى الأخ الشاعر عارف مامون العبد الله
حلو طبع اليسامح
واليقبل عذر مو عيب
وحلو طبع اليشيل الغيض من باله
وهنياله اليصافح چف عدوه
ويغفر الزلات هنياله

8 – صدگ – 22 / 12 / 2001
گصير وأگصر اِمن المليم
بالباطل أبد ما غلط واِتملگ
وطويل اِبطول طول الناس وأطول
لساني وما گصر بالحگ
لكن ما شفت من گال
عونك بالحچي وصدگ

9 – 12 / 7 / 1972
حنيني الكم مثل
حن الدمع للعين
وشوگي الكم
جرح واِشتاگ للسچين

#حسين_جهيد_الحافظ (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل