عزائي اِني أحبك

حسين جهيد الحافظ

الحوار المتمدن-العدد: 2260 - 2008 / 4 / 23 - 06:07
المحور: الادب والفن
    

يلي صوتك نايل
وخصرك عتابه
ونظرة اِعيونك موال
نگلة اِجدامك بوذيه
وخطوتك تجليبه
واِزهيري مشيتك
والفرح ينده تعال
دارمي اِحروف السوالف
چوبي واِتنگط وصال
وصف طولك خيزران
وبوگ من جيدك
أخذ جيده الغزال
الليل من لون الشعر لونه
والصبح متغطي بالوجنات
واِرضابك زلال
زمة اِنهودك زهو دجله وفرات
اِتلاگن اِبشط العرب
عفه ودلال
المطر من سبحة اِدموعك تعلم
وصفگة الخرزات
أخذ منهن مثال
وبيك من شبعاد سوله
من تكظ قيثارهه
وتسرح خيال
يلي صوتك عندليب
وضحكتك فرحة حديقه
قدح المشمش محنه
وشوگ راج البرتقال
اِمنين أجيب أوصاف
لأوصافك حرت
ما أظن قاموس يحويهن محال
بويه ناشدت السوالف
ما شفت سالوفه ترهم
مات بشفافي السؤال
دوريت أكتار كلي
ما شفت غيرك حبيب
ومن جمالك
ما شفت أبداً جمال
اِمنين ما أشوفك ترافه
والترافه اِبأصل طبعك
موش نزوه واِفتعال
غصن زيتون وحمامه
أهداب جفنك
نوبه ونوبه قصيده
وسيف حاضر للنزال
هذا كله وبعد أدري المستحيل
اِنته وصعب المنال
بس عزائي آنه أحبك
واليحب يرسم آمال
اليحب عايش آمال

#حسين_جهيد_الحافظ (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل