21 نوروز/نيروز

عبد الرضا حمد جاسم

الحوار المتمدن-العدد: 8655 - 2026 / 3 / 23 - 13:56
المحور: الطبيعة, التلوث , وحماية البيئة ونشاط حركات الخضر
    

يا ورد
يا ورد كَل للورد قدم ورد للورد
لن الورد هم ورد وبنص حديقة ورد
و يحتاج يشتم ورد
وألي يقدم ورد أكيد هوَّ ورد
يا ورد كَل للورد أزرع ورد يا ورد
لن ألي يزرع ورد...ويتعب عليه أو يجتهد
أكيد يجني ورد
يا ورد كَل للورد أنه أخلي ورد وانت تخلي ورد
ولمن يزيد الورد...الدنيه تصبح ورد
وكلمن يجي من بعد
ويقترب...ينسه التعب
ولو شاف الورد روحه ترد
لن الورد هوَّ اليخلي المحب....شما بعد
حتماً يرد... مشتاكَ يحضن ورد
يا ورد...ألي حمل لسعات شوك الورد
يفرح ويرتاح... ويسعد وينسعد...لــــو طكَ الورد
الي يحب الورد...لو عنه مجبور أبتعد
ع لبعد.... حبه يتجدد يتقد
يا ورد
عندي قصه ويه الورد
أرد أسولفها بقصد
فد.....يوم شفت الورد
شايله بـاقة ورد... أو واكَف بنص الورد بالبرد
أرْتبكـت...خفت...وصْفكَت من حيرتي أيد أبأيد
وتاه عني الرشد
وترددت...مكَدرت أحاجي الورد
خافن الي يصد ويرد
للبرد أُميت بس عن بعد
خايف شويه اتقربت... و شاورته متردد
هذا الورد مـا يحملك... يـا برد
بضحكه جاوبني البرد
وعله أيدي...بحنيه وعطف شد
ما تعرف أنت الورد !!!
بكل مكان وكل وقت ينزرع....يّفَتحْ
وينشـرعطر... وميهمه حر لو برد
يوم أنه شفت الورد
ضايج... منفعل... مْحْتدْ
وخدوده متغيره...خدٍ يختلف عن خـد
وراسه للأرض ملتوي... مرتد
استفسرت .....يا ورد
تزعل علينه يا ورد....زعلك يهد الحيل هد
ما جاوب الله يسَّلمه ....متعصب معاند
و بعد التوسل والأخذ و الرد
كَال...من فعل بعض البشر
بعض الورد راح يعوفنه ويشرد
كَتله كَلي شصار حته منزعج هلكَد
ما أجاوب كَال... أجاوب مـــن بَعَــــــــــــــدْ
تريدني اتوسلك...كَتله... وكَدامك أنحني أو أكَعد
سـولف...اعرف أنت رقيق أشكَد... وما تحمل قهر متأكد
كَال... ما يحمل أذيه الورد
ولا حمل يوم الأذيه ألأحد
كَتله تتألم أدري ...
و أدري تسامح الغفلان و الغلطان لـو يْكَطَعكْ مَتْعَمِد
وكل يوم يتكرر مثل هـالمشهد
وانت تحملت من هذا....أكبر...وأكثر وأشد
وبطيبه ومحبه قابلت كلمن قابــــــــــلك بالضـــــــد
وريحتك بخدودك وفرحان... تفّرح مســــتعد
جنك معاند يا ورد... وتريد عني تبتعد... وتروح مَترِدْ
يا ورد
رحمه عله روح ألي زرعك أبقه...أتحمل...أصمد
بلكي البشر يتعلم الطيبة...وعن القساوة يرتد
و يحترم كلمن مثل حالك... لجل الحياة... كابد أو كد
ومني عهد...وعد
بس لا عليْ تزعل ...
كل وقت....أزرع بنص الورد شتلة ورد
أو لو شح عليها الماي... أسكَيها مـن ماي شريان أو وريد
وأكَعد أراقب عن بعد
بلكن طيور المحبة...تلم البشر وتسعدهم أتغرد
ومثل ما تفرح أفرح....
لو زرع كل واحد
كَدام بيته ورد
و عود يم عود...يصيـر مشتل ورد ممتد
ولو تهب نسمات عـذبه عله الـورد
تنتـشر بالكون ريحة ورد
والناس تفـرح تنسعد...وينطرد كل حقد لو يشـرد
ونصير أخوه... واحد لواحد
بالصدق والحق سند
سـاعتها أنه أعتقـد
التمايز بين واحد أو واحد....يتحدد
بمقدار العمل والجهد والإخلاص والجد
يا ورد...
أنت رافقت البشر مـن يــوم الأول ولليوم... وترافقه للغد
إنْشَرت بين البشر حب وسلام وأمان أو ود
وزلزلت الحزن والظلم والحقد
والورد احسن هديه تتقدم بكل عيد
وبكل وكت من المهد للحد
ياورد...
كل زرع من ينضج أو يمتلي...ينحني
بـس الورد لو نضج يوكَف منتصب.... أموّرد...مْتِقِد
كل زرع لـو فاته الــوكت.... وتغّير... كَالوا تلف...فِسَد
بـس الورد...يكَولون عنه ذبـل...وهـذا بيه معنى وقصد
يعني أنطه عمره....حته لعمر غيره يمد
و لن الورد لا أفْسَدْ و لا يفْسِد و لا يفْسَـد و لا فِسَدْ
يا ورد
عله كلشي أنزرع...كَالوا ينحوي ينحصد
بـس ع الورد كَالوا ينجمع ...
لن الجمع يعني أتواصل و أتحد
وكَالوا عليه شدة ورد...باقة ورد
لن بيه أشكال ألوان لا تنحصي أو تنعـد
يـا ورد
يغسل أذنوبه البشر أو يطّهر...لــو بالماي يتعَّمـد
شلون لو كل البشر...بعطر وجمال الورد لنفوسها أتْعَمِد

#عبد_الرضا_حمد_جاسم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل