فهد يخرج من قبره بيوم الشهيد

مازن الحسوني

الحوار المتمدن-العدد: 8257 - 2025 / 2 / 18 - 20:41
المحور: مواضيع وابحاث سياسية
    

زارت قيادة الحزب الشيوعي العراقي قبر مؤسس الحزب بيوم الشهيد المصادف 14 شباط .وضعت الورود على القبر مع بعض الكلمات بالمناسبة مستذكرين فيها دور وحياة فهد وتاثيره على الحزب ومأثرة أستشهاده .
بشكل غير متوقع خرج الرفيق فهد من قبره وسط دهشة الحضور . البعض فرح وهلل والبعض أخذته الصدمة ولم يعرف ماذا يفعل والبعض من القادة تملكتهم الرعشة والخوف من هول المفاجأة وما سينجم عنها.
نفض فهد التراب والغبار عن جسمه وملابسه وحيا الجميع وسط سكوتهم المطبق .
-رفاق اشو ولا شاب بيكم شنو القصة ؟ وين شباب الحزب ؟
-أحد القادة- يمكن ما تعرف رفيق أنو بهذا الوكت الشباب ملتهين بغير شغلات وما يحبون زيارة القبور والموتى .
-فهد-بس انتم جايين مو لأجل زيارة خاصة وأنما لمناسبة حزبية وهذا لازم يكون ضمن مهام منظماتكم .خاف وراها غير شي ؟
سكت الجميع وبقى كل واحد يتباوع بوجه الثاني وما يعرفون شلون يردون رغم أن احدهم نبز وگال؛
-لا رفيق ماكو أي شئ.
-فهد- عوفونا من هاي الشغلة . هسه احنه بزمانه رفعنا شعار (وطن حر وشعب سعيد ) وين وصلتوا بيه ؟
-الجماعة أنخلسوا وما يدرون شلون يدارون السالفة وشيجاوبون .
-فهد من شاف الربع مخلوسين جاوبهم، ترى أنا صحيح بالگبر بس اسمع كلشي واعرف لأن هواي من الرفاق أجوا وحچوا وحتى ناس عاديين نسمع منهم خاف تگولون اللي جونه يعادونكم ونسمع منهم بس .
-الربع بدأوا يرعشون ويخافون أنه راح يكشف كل الملاعيب وشلون يخلصون من الورطة ،وواحدهم يگول هسه چم واحد حچوا علينا وفصلناهم أنوب فهد شنسوي وياه وشلون نفصله؟
-بزمنا شعلنا الدنيا على الأستعمار البريطاني وببساطة امكانياتنا نزلنا تظاهرات وقمنا باعتصامات وانتفاظات ضد المحتل وسقطنا حكومات صورية سواها المحتل وخليناهم يخافون واللي يتعاون ويه المحتل يستحي من روحه .تحبون اذكركم بهذي البطولات لو حافظين دروسكم وتعرفوها؟
-لا رفيق نعرف كل الزين ذاك التاريخ المشرف واللي نثقف بي كل الرفاق الجدد والناس بكل يوم.
-زين لعد شنو صار بيكم بعد 2003 وعملتوا ويه الأحتلال وأنوب تعملون تحت أبطه والمصيبة المعاهدة وياه تقبلوها وأحنه گلبنا الدنيا يوم معاهدة بورتسموث واسقطناها .
-الرفاق واحد يتباوع للثاني ويندسون ببعضهم ياهو يقدر يرد عليه .
-أحد القادة _رفيق الوكت أختلف والدنيا غير شكل ولهذا كنا مضطرين .
-خوش مضطرين يوم اسبوع سنة عشرة خو مو طول الوكت .النوب شوكت تغيرت دول الأحتلال في أهداف أحتلالها لشعوب العالم . هي نفس الأهداف استغلال خيرات الشعوب لمصالحها الخاصة واليختلف بس الأسلوب .
-زين عوفونا من هاي شعبنا سعيد بعد الأحتلال اللي قبلتوه ؟
-قادة الحزب يتلفتون وما يعرفون شلون يجاوبون .واحد منهم يقول للثاني ما تجاوب مو انت مسؤول التنظيم المركزي وعلى اساس تعرف كل عمل الحزب ما تجاوب.
ليش أنت ما تجاوب مو على اساس أنت يم السكرتير دوم وتصفطون الأمور مع بعض قبل أي واحد يعرف حتى أحنه الكبار اخياناً ما نعرف شنو تسوون.
انه ياهو مالتي هو السكرتير يومية يجي بسالفة وما أعرف منين تجيه ويگول يلا تعالوا نسوي هيچ لو هيچ.
-فهد-اشوفها علگت بيناتكم ، يبين خوش وحدة أفكار ورأي . بالمناسبة عرفت أنا شلون الشعب سعيد وهو يعيش أنگس من ايام زمان ويدور بالزبالة على الأكل والقلة ما تعرف شتسوي بالفلوس وقسم من ربعنا داخلين بمصالح خاصة ويه ذوله القلة .
زين لا وطن صار حر ولاشعب سعيد ، خوش عفنالكم تنظيم أقوى حزب بالبلد وتخافه وتهابه الجميع حكومات وأحزاب شلونه هسه ؟
اهنا صرخ واحد من الحاضرين بعد ان طگ چبده من اللي سمعه وصاح .
-يا رفيق ضيعنا كلشي لا تنظيم بيه خير ولاشباب عدنه ولا أحد يهابنا ولا احد يستعبرنا كثير ولا احترام لتاريخكم وشهاداتكم البطولية وكل اللي نسويه هو نمشي الراگ الراگ لأن نخاف وحتى بدأوا يثقفونا بالخوف واحنه ما نگدر نسوي شئ لا ويه الحكومات ولا الأحتلال وحتى بالوثائق موجود هذا التثقيف خاف واحد يگول چذب .هذا حالنا يارفيق والشباب ما بقوا يجون اللنا واحنه الشياب البقينة لأن نحب تاريخنا باقين وهل تشوف بس الوادم الگاظية الله وكيلك .
المسكين اللي حچه القادة بدأوا واحد يتباوع للثاني ويأشر لمسؤول التنظيم أن يدون اسمه حتى يتحاسب لأنه خرق النظام الداخلي وبين عيوب الحزب بشكل علني حتى ولو گدام السكرتير السابق .
-فهد – ها يا قادة الحزب يا أشاوس شنو ردكم ؟
الكل أنخلست وتبلعمت وما تعرف شنو تجاوب.
-فهد- راح انا أگلكم شنو تسوون .
الكل خافت هنا وبدأت تتوجس شراح يگول وواحدهم يتباوع للثاني .
-أمامكم حلين .
الاول هو أن تعتذرون من رفاقكم وتعلنون أستقالتكم وتگولون أحنه بعد ما نگدر نسوي شئ أكثر وتخلون غيركم شباب وشجعان ما يخافون يجون يقودون الحزب لو الحل الثاني تبقون بنفس الطريق الأعوج اللي ما اعرف شلون صار هو السائد بعمل الحزب وبذيچ الساعة أنا أتبرأ منكم جميعا ولحد يجي يزورني بيوم الشهيد لأني أعرف الشيوعيين اللي ضحيت بروحي وأنا أعتز بهاي الشهادة ومثلي كثيرين غير هاي الأشكال وغير هذا الشغل.
الأن راح أترككم وأرجع لقبري واشوف السنة الجاية راح تجيني الناس اللي أنا أفكر بيهم صدگ شيوعين واحبهم واعتز بشاهدتي لأجلهم لو محد راح يجي !!!

#مازن_الحسوني (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل