همسة اليوم: عم -عشم- مات واندفن من زماااااان!

محمود عبد الله
أستاذ جامعي وكاتب مصري
(Dr Mahmoud Mohammad Sayed Abdallah)

الحوار المتمدن-العدد: 7306 - 2022 / 7 / 11 - 23:52
المحور: التربية والتعليم والبحث العلمي
    

عم "عشم" مات واندفن من زماااااان!
أحيانا تلاقي حد من الحبايب يتكلم بثقة وهو بيطلب حاجة ويقولك: "ده من عشمي".."أصل أنا عشمان فيك" وهو يفتقر لأدني درجات الكياسة واللياقة المطلوبة في التعامل الإنساني والإجتماعي..وتلاقي الموضوع ده منتشر قوي في بلدنا - بالذات في الصعيد! نفسي أعرف الشخص ده جايب الثقة دي كلها منين؟! يعني مثلا:
- هل هو - زي ما بيقولوا بالبلدي كده - "مقطع الطرق عليك رايح جاي"؟ يعني - بصفته قريب أو صديق عزيز - جالك زارك في بيتك مثلا لما رجعت من سفر - أو حتى يعرف عنوان بيتك أصلا؟
- هل عمره اتصل بيك إلا لو كان ليه مصلحة؟! اتصل مثلا علشان يعيد عليك أو يهنيك بترقية أو حدث سعيد؟! أو حتى وقف معاك لما كنت في محنة ومحتاج أي كلمة يآزروك بيها ويطبطبوا على قلبك؟!
- هل كأخ مثلا هو واضح معاك بيطلعك على كل كبيرة وصغيرة تخصك في ورث أو ما شابه ذلك؟! ولا بس عنده فضول مرضي مقيت يخليه فالح بس يجرجرك في الكلام علشان يعرف مرتبك كام وفلوس المذكرات أخبارها إيه؟ أو أحيانا يتريق على معاشك الهزيل وإن أولادك ممكن يتشردوا لو جرالك حاجة..ده إنت ممكن تسمع بودنك أقرب الناس ليك وهم في بيتك وفي ضيافتك يتهامسوا ويقولوا: "هيه بس الشقة إللي قاعد فيها دي..وهترجع ظروفه تعبانة تاني"! وتقسم بعزة جلال الله إن ده عمره ما هيحصل إن شاء الله..والله أعلم بمين ممكن يحتاج للتاني..وإللي تعب وكافح وسهر واتمرمط واستحمل الغربة والتلج وكان مشتت ما بين 5000 حاجة كل يوم يوازن بينها علشان يوفر لنفسه ولعياله حياة كريمة عمره ما هيبقى تافه ولا مبذر ولا سفيه..ولا هيسمح لحد في يوم من الأيام إنه يبقى داينه بحاجة..
- هل إنت شخص إيجابي بتصون العشرة بجد؟؟ هل لو طلب منك طلب تافه مثلا بترد عليه ولا بتتهرب منه؟ مع إن الطلب ده مش هيكلفك أكتر من دقيقة واتصال تليفوني أو حتى رسالة!!
- هل إنت شخص متفاعل وبتقدر العلاقة فعلا؟ يعني بتهنيه زي ما بيهنيك..بتتطمن عليه زي ما بيطمن عليك؟ بتروحله زي ما بيروحلك؟ بتآزره زي ما بيآزرك؟ ولا العلاقة من طرف واحد بس؟؟
- هل إنت شخص راق محترم بيحترم خصوصية الناس وأسرارهم؟ ولا حد فضولي حشري سقيل عاوز تعرف كل حاجة عن غيرك وبتطارد الناس بمكالماتك كل شوية علشان يعملولك إللي إنت عاوزه وكأنهم خدامين عندك - وبعد كده ولا تعرفهم؟
- هل إنت شخص واضح بتراعي شعور غيرك وما تضغطش عليه بنقطة الضعف أو العيب إللي عنده؟ ولا بتضغط على الناس وتستبزهم والناس تخاف حتى من مكالماتك - فما تردش عليك؟ وياريت تفهم الرسالة وتسكت..لأ..تعاند وتكابر وتقول: "مش أنا إللي يتعمل معاه كده"..لأ يا سيدي..إنت شخص بارد جبلة ما بينكسفش على دمه أبدا..المفروض تكون فهمت الرسالة..أنا أعرف واحد مرة إتكسف مات! وعن نفسي لو حد عمل معايا كده - مش بس أبطل اتصل بيه وما أردش عليه لو اتصل بيا وبس..ده أنا كمان أعمله "حظر" على الموبايل والفيس و"بلوك" من حياتي كلها..وتغور المصلحة إللي بينا - لو فيه مصلحة..يعني الواحد يبقى حسيس..اتصلت بيه مرة مثلا وكانسل عليا باعرف إنه مشغول..لو ما اتصلش في خلال ساعة أو ساعتين ، ممكن أجرب تاني..ما ردش أستنى شوية كمان وأبعتله رسالة على الموبايل أو الفيس..وهكذا..يعني ما تبقاش سقيل تتصل بحد 50 مرة في الدقيقة ولازم يرد عليك - ولو ما ردش ، يبقى أجرم!
- هل إنت بتطبق معايير عالمية في التعامل مع الناس؟ وأقصد بمعايير عالمية السلوكيات والأخلاقيات السائدة في كل مكان والمشتركة ما بين كل الأديان وهي أقرب إلى القوانين إللي بتنظم حياة الناس وما يختلفش عليها إتنين زي:
1-عمل التكليف الذي يكلفني به رئيسي في العمل في أقرب وقت ووفقا لما تسمح به الظروف..
2-الإنضباط والدقة في المواعيد والمحافظة على سير العمل قدر الإمكان..
3-الرد على المتواصل في أوقات العمل الرسمية بأي وسيط (هاتف - رسالة نصية - بريد إلكتروني) وتلبية حاجته في ضوء اللوائح والقوانين..
4-مساعدة الزملاء على إنجاز العمل طالما أن هذا سيصب في مصلحة المؤسسة..
5-عدم إزعاج الزملاء في بيوتهم والتواصل معهم في الأوقات المحددة سلفا..
6-قبل عرض الأمر عبر الهاتف استعمل عبارة مهذبة تحدد فيها الوقت المطلوب مسبقا - مثل: "تسمحلي آخد 5 دقايق من وقت حضرتك؟" - "هل يناسبك دلوقتي أتكلم معاك ولا اتصل في معاد تاني يناسبك؟"
7-رد على أي رسالة عادية not spam أي رد حتى ولو مبدأي علشان تشعر المرسل باهتمامك بالأمر وعدم إهماله من قبيل: "استلمت رسالتكم وسأوليها كل الإهتمام وسأرد عليكم لاحقا"
8-في هذا الصدد ، إذا كانت الإجابة بالرفض كن واضحا منذ البداية..عبر عن رفضك ولكن "بشكل مهذب": "شكرا على رسالتك وتواصلك ، ولكني للأسف لن أتمكن من القيام ب........وذلك لانشغالي الشديد..وأرشح لسيادتكم .........للقيام بذلك فقد يكون أقل انشغالا مني هذه الأيام!
5-لو فيه موضوع تافه لا يستحق الرد تجاهله تماما just ignore it ..يعني في مجتمعنا مثلا فيه ناس عاوزة تستفزك وتخرجك عن شعورك أو تعطلك ..تجاهلهم تماما..ولو قررت تعمل block لشخص مش مظبوط يبقى ما تحاولش تشوفه بأي طريقة تاني..إنساه خالص لغاية ما يتحرق لوحده..هو تفكيره كده..بيئته كده..أخلاقه كده...لكن إنت مش كده ولا هتكون كده!
6-لما تكلم حد تعرفه وليك طلب عنده ، حاول تظهر إهتمام بشخصه وإسأل عن أحواله الأول - وبعدين قول طلبك بأدب..من غير ما تلزمه بشيء أو تحرجه..فيه ناس أعرفها "لاااااارج" جدا..تطلب شيء وممكن يكون صعب شوية..فتقولك إيه: "هستنى رد حضرتك خلال اليومين إللي جايين دول..لو ما رديتش هافهم إنك مش موافق أو ما تقدرش تعمل الموضوع ده"! شوف الناس؟؟ ولسه بنتعلم والله!!
كفاية كده النهارده..أرحب بتواصلكم وتفاعلكم..
تحياتي

#محمود_عبد_الله (هاشتاغ)       Dr_Mahmoud_Mohammad_Sayed_Abdallah#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل