يوميات معلم زنكَلاديشي4

حيدر حسين سويري

الحوار المتمدن-العدد: 7097 - 2021 / 12 / 5 - 19:15
المحور: التربية والتعليم والبحث العلمي
    

شكوى من معلم زنكَلاديشي خلص صبره، سنعرضها باللهجة الزنكَلاديشية: مثل ما كلها ضدكم يا تدريسيين، مثل ما تتحملون زخم 60 طالب بالقاعة وأكثر، مثل ما شروطهم تتنفذ بيوم وليله، شروط اللبس والقيافة والجوارب ولا تضرب ولا تصيح و..... كتب رسمية صارت بيوم وليله...
بيكم حظ يا معلمين اخذوا حقوقكم: ليش الترفيعات مو من تاريخ الاستحقاق؟ ليش جاي تنعلس عليكم سنه وشهور بحجه موازنه وما عدنا؟ ليش الترفيع تمر سنه يله ينطوها؟ ليش قانون حماية المعلم ماكو؟!
بضميركم كم حادث صار للمعلم وانهان وانتقص من كرامته؟ وبيهم انطك ونضرب وتهدد بسبب عدم سماحه غش او منعه لغش، لو تهدد وجروا عليه سلاح، كم حادثه صار وحنا اعلامنا ضعيف ما ننشر الذي بصير ضدنا؟ وإذا صار شيء علينا بيوم وليله القنوات والبيجات تشتغلنا مربعتين!!
ليش؟!
من معلم ينسحل، ماكو اعلام، ماكو طشه، ماكو نقابة توكف لك، محد يلزم ظهرك، كل هذا علمود 580ألف، 400ايجار و180كراوي الله شاهد، ليش جاي نتحمل فوق طاقتنا، علمود هل العيشة غير؟! ليش الراتب أدنى راتب؟ شهادة شكبرها شكَدها ودراسه وتعب و.....
ليش محد يطالب بزيادة الراتب؟ او تعويض عن دوام يوم السبت؟ او بدل ايجار وطعام كما حال الوزارات الأخرى؟ ليش إذا تلميذ تخربط بدرسك؟ متكَدر تحمي نفسك من أهله ومن الكَوامه التجيك؟ إذا طالب طلعته وعثر وطاح؟ طلع بدرسك أنت المتهم!
يا ناس جاي نداوم على حساب ارواحنا على حساب صحتنا؛ مثل ما كل الجهات تحط شروطها علينا لازم نوحد كلمتنا، هم عدنا مطالب، لازم نداعي بيها ولازم تتنفذ، كافي نتحمل على حساب صحتنا ورزق عوائلنا؛ نواجه طلاب يشهد الله لا خلقه ولا اخلاق ولا دراسة، ولو بيدهم يسحلونا، بس هاي بقت! كافي نتحمل غش الامتحان الخارجي علني وما نقدر نتكلم، كل سنة في الامتحان الخارجي (روحوا راقبوا) على يا ساعة بطلقة ونروح الى رحمة الله إذا منعنا غش؛ كافي نتستر على مهازل وزارة التربية اتجاه المعلمين، الطالب الخارجي كَام يدري بالغش (استاذ اطلعهن هسه لو بعد؟) من غير التليفونات التي تملأ جسمه في كل مكان! كافي، يزي عاد مو بزعنا...
وإذا تحب وزارة التربية تتأكد من مهزلة الامتحانات الخارجية وغشهم الذي بلغ 100% خل تسوي استبيان سري للمدرسين وتكتشف النسب، المدرس صار يخاف يتكلم، لان عيشته وعيشة عائلته على هل المهنة الكَشرة... لهنا وكافي يا وزارة التربية، غسلتوا المعلم غسل وشريتوا ع الحبل وصار مهزلة لليسوه والما يسوه وانوب جاييني بقرار اللبس وكذا؟ قادرين على هاي السوالف!؟ لازم اكو حل يا نقابة المعلمين، اسمكم نقابة وما جاي نشوف منكم شيء اتجاه المعلم، ألف معلم انهان والنقابة صم وبكم مجرد تصريح!!
بقي شيء...
كمعلمين نرى ان التعليم الالكتروني فاشل، خصوصاً في مرحلتي الابتدائية والمتوسطة، لكن لا بأس به إذا كان بجانب الحضوري؛ كمعلمين عانينا من الجهد والتعب بسبب سوء التخطيط والتوزيع من قبل الوزارة، وبالرغم من هذا كله فإننا نطالب باستمرار الدوام الحضوري، فالتكنولوجيا هي مجرد أداة لتحفيز الأطفال وجعلهم يعملون معاً، لكن وجود المعلم هو الأهم في حياة المتعلم.

#حيدر_حسين_سويري (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل