مقهى الكذابيين ( الهجرة والمؤامرة)

وليد عبدالله حسن

الحوار المتمدن-العدد: 5101 - 2016 / 3 / 12 - 08:49
المحور: الادب والفن
    

صوت استكان الجاي في المقهى يرن يرن يرن ومعه ترن سوالف عن الهجرة الجماعية للشعوب الاسلامية الى بلاد الكفر ، والحديث حار كحرارة الشاي العراقي وبالتحديد في الصيف، والحديث يدور عن حجم المؤامرة ضد الوطن والاسلام اسمع الحوار:-
-قال الاستاذ سمعان شيوعي سابقا هذه مؤامرة راسمالية لانهاء مايسمى بالعمال في العالم وتحويلهم على عبيد في بلاد المال والثروة الحقيرة يغسلون مواعين مطاعم الدجرة الاولى ويخدمون مثل الحمير في مطاعم مكدونلد ، ويمسحون مولات البرجزازية اللعينة ، وينظفون القطط والخيول والكلاب مال الاغنياء.
-عقب عليه الشيخ في الحوزة العلمية سابقا:ـ تره هذا مذكور في كتبنا في الملاحم والفتن وكل شي مذكور عن اخر الزمان والحمد لله، وانا أخبرتهم قبل ٥-;-٠-;- سنه واعتبروني دجال بوقتها سبحان الله، ظهر الحق وزهق الباطل ،والخروج قريب باذن الله ، تكبير.
- تنحن الشيخ الدكتور السلفي سابقا وقال :- نبؤتك صحيحة لان كل الناس شردت منكم خارج البلد ،واذا انت مكتوب عدكم في كتبكم الي صارها كم سنة ، احنه موجوده عدنه في القران الكريم مذكور كل شي عدنه، ولعلمك ماعملوه الغرب هو اخذ الاسرار العلمية من الايات الكريمة فقط ،واذا تريد تتأكد اقرأ البخاري ومسلم وراجع باب الجهاد والهجرة وان شاء الله يظهر الحق وننتصر على الباطل، و ونهزم كل مجوسي حاقد على امة الاسلام والعرب، تكبير.
-قال الاستاذ في حزب الدعوة العميل سابقا وهو يهتف في المقهى بصوت عال:ـ
انها مؤامرة كونفوشوسية خسسية من اعداء الله والاسلام من اجل تفريغ العراق من الطاقات العظيمة ،وطاقات الشباب العاملة والمنتجة ، هي مؤامرة صهيونية وقطرية و ماسونية استعمارية للقضاء على شباب الاسلام ،ووضع نهاية لديننا الحنيف بس مراح يكدرون وخاب سعيهم وظل طريقم باذن الله.
- رد عليه مناضل قومي سابق قال له :-زين هو وين الاسلام الي تحجي عنه اشوا العالم كضتها حروب وموت ودمار وفقر وخراب، شنهو انت عايش بالمريخ ،لو دتدجل على الناس.
- رد عليه المناضل الشريف سابقا - مو كل هذا صار من وراء قومياتكم الحقيرة و على اساس القومية هي الحل ،موهي الي طيحت حظنا وحط العرب والاسلام ياخايس.
-قال له بعثي سابق :- اصمت وانجب انته لو بيك خير كان بقيت سياسي وصرت شي جبير مو ساكن بالكهواي وتقرأ شعر شعبي معفن ، ودتخم بالجوامع والفواتح مال الشهداء.
-قال له المناضل الشريف سابقا - لو بقيت سياسي لحد هسه كان صرت مثلك قاتل وخائن للوطن وصرت مثل ذاك (اشار الى الاستاذ في حزب الدعوة العميل سابقا) كذاب وحرامي وقاتل ويقشمر على الناس.
-قال احد الشباب المراهقين وهو يلعب ورق مع جماعته بالمقهى:ـ عمي انتم شنهو تحجون تره احنه مانريد اي شي انريد نتونس ونركص ونحب ونتعرف على الحياة بدون ما الموامنة واكفه على راسنه والي يحجي يصكوه.
- شاب ثاني يقول :ـ ونريد نفرح وتعبنا من الخوف والحرب والفقر والقلق وكل يوم فاتحة وموت وقتل وفلان اليوم يمك باجر جابوه ملفوف بالعلم ،حتى العلم العراقي كرهناه من كثر مالتفت بيه شباب بلدنه. وحتى كلمة الله واكبر كرهناها بكثر ماانذبحوا ناس وهم يهتفون بيها تكبير تكبير والناس تموت من الجوع،وتكبير نكبير والناس تنذبح ،وتكبير تكبير والناس هاجرت كلها ومراح يبقى غيركم بالبلد.
- شاب ثالث يقول:- ونريد نشوف حياتنا ونشتغل ونصير عدنه فلوس ونزوج وتصير عدنه بيوت، يعني يعني نريد نعيش بس مانعرف اشلون محد يعلمنا اشلون نعيش صحيح ومحد يعلمنا اشلون ننتج ونعمل صحيح ،كلها صايره براسنه قديسين.
- شاب رابع يقول :-احنه بساطة نريد نعيش مثل الاوادم صديقي هاجر تعرفون ليش لسبب كلش تافه بس هو يشوفه مهم :- لانه يحب يركص ويتونس ويشرب ويجب فريق كرة القدم الالماني .
- شاب خامس:- نريد ندرس ونتعلم ونفكر صحيح ونحجي بحرية مو كل اشويه جاي واحد يهددنه بالقتل، لو يقتلنه علمود لابس بنطرون مو شرعي، لو قيمص نتشبه به بالغرب ،ومرات واحد يكفر الف مرة لمن تلبس شي، او تريد تحجي شي يخالف معتقد الموامنة، حتى الاهل يضربونك الف نعال لان يخافون على انفسهم، نريد نعيش وندرس ونصير شي مهم بالحياة.
- شاب سادس :- كل ما اريده اتعين اتعين اتبعين وبس بعد ان اتخرجت من الجامعةو بقيت دايح ، وماريد ابقى ابيع بسطية ملابس عتيكة بالات بالشارع وتركض وراي البلدية، اريد اعيش كانسان لو هاجر او اموت احسن الي.
- شاب سابع :-تره احنه مالنه علاقة بكل هذا الحجي مالتكم ، العب العب وخلي ذولة الرفاق والموامنة يلوصون براحتهم ههههههههههه.
-قال الحجي ابو فاضل الجايجي سابقا:-
تره ياجماعة الخير -هواي شباب حلوين هاجرت الى بلاد الغرب ، وصحيح ،والله منهم طاقات جبيرة واساتذة هواي خسرهم البلد، بس هسه تره جيرانه حسوني همين هاجر ويه الشباب الى بلاد الكفر والخلاعة اعوذ بالله منكم ياسياسين.
- قال الاستاذ في حزب الدعوة العميل سابقا :ـ هذه احد الادلة التي اتحدث عنها. ماذا يعمل حسوني هو طاقة عراقية اكيد هو انسان منتج ومتعلم ؟ أحجي ابو فاضل احجي و اخبر الجميع ،وحتى يعرفون حجم المؤامرة على الوطن والاسلام العظيم.
-قال حجي ابو فاضل الجايجي سابقا :- الحجي بيني وبينك، تره الي هاجروا اكثرهم مثل حسوني ،وتره حسوني طاقة مو عادية بالنبش و كان يعمل عطال بطال ويحشش واهم صفة معروف بيها- ينبش بخشمة اربع وعشرين ساعة براس الفرع مالتنه ولازم خص٠-;-٠-;-٠-;-٠-;-٠-;-٠-;-٠-;- عوفوه بلكي بالغرب يتعلم شي جديد .
صمت الجميع.

#وليد_عبدالله_حسن (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل