العربي بين الحقيقه والخيال والاحلام والامال

جان نصار

الحوار المتمدن-العدد: 4931 - 2015 / 9 / 20 - 16:10
المحور: كتابات ساخرة
    

مسكين المواطن العربي فهو اكثر انسان عايش بعيد عن الواقع وبفضل الخيال ومن هون بتلاقي كل حياته عايش(دريمنغ , وشينغ ,هوبينغ) يعني مقضيها احلام واماني وامال.
يمكن البعض يقولي طب الغربي والغير عربي ما بحلمش وبتمناش وبتأملش وانا بقولوا اه يا عيوني كل الشعوب بتحلم وبتتمنى بس احلام شعوبنا غير بعدها في مرحلة البدائيات واللي غيرنا من زمان بطل يحلم فيها . حتى غيرنا بطل يحلم بالمره يعني بالنادر و احلامهم ترف وبزخ ونوع من التسليه.
من يوم الولاده بلعن العربي الساعه اللي ولد فيها بهذا العالم المتخلف.
العربي اكبر احلامه هي الحريه وهاي محروم منها والغربي بالنسبه لالو هايك شغلات بديهيه وما بفكر فيها.
العربي بحلم بالوظيفه والعمل وبلاقي بطاله.
بحلم بالعداله الاجتماعيه والديمقراطيه وهاي ببلادنا سلع ترفهيه ممنوعه ومحذوره لانها غير اخلاقيه.
بحلم بالعلم والمدرسه والجامعه وهاي محرومين منها اكثر من 120 مليون امي .
في بعد بلدان محرومه من التعليم اللزامي غير العربان ودول التخلف.
الفقير بحلم يسير غنى وهو قاعد محله يعني لابدو يشتغل ومع هيك بدو يصير غني ..ويمكن بدو يشتغل وما في شغل.
لان الحاكم مشغول باللهط والشفط والعبط والنطط والفعط والخرط والفرط والقحط والبعط.
راح افسر كلماتي لانو البعض بفكر اني بختلق ومجرد سجع.
اللهط:اكل مقدرات واصول الشعوب و الاوطان
الشفط:نهب ثروات البلاد وتجيرها للحسابات الشخصيه
والعبط:احتضان النساء والتفكير فقط على اشباع الغرائز واللي منتصب بين الاجرين.
والنطط:هو السفر شري مري من بلد لبلد وشمات الهوا وقال توثيق العلاقات مع الدول
الفحط:الزعيم عنا لما يقعد على الكرسي بفحط وبتثبت وبلزق ولا ربكم بزيحه عن الحكم الا لما تطلع روحه.
الخرط:هو الكذب وابر المورفين اللي بضربوها للشعوب على اساس ان تبقى مخدره وغائبه عن الوعي
الفرط:التفريق بين الناس بالافكار والمعتقدات من منطلق فرق تسد.
القحط:هي بلادنا الجرداء اللي قحطهاالحاكم ولم يترك للشعب مجالا للابداع والتنوير.
البعط:هو القتل والسجن لكل المعارضه وطالبي الحريات.
اعتذر عن الاطاله لكن الشيئ لزوم الشيئ.
منرجع للعربي كل حياته احلام.. العزابي بفكر يتزوج وهو حيلتوا اللضى يعني كما خلقتني يا رب طفران ومفلس على الحديده.
والبنت بتحلم بفارس الاحلام يجيها على حصانه الابيض والله وكيلكم حتى حمار ابيض ما في وانتظري واحلمي العريس راجع.
الفلسطينيه بعدهم بحلموا وبتأملوا وبتمنى باقامة الدوله وهمي مفرقين ومزاودين ومش متحدين وبعدين بدهم الله يعين.
مات ابوي وهو يحلم بالدوله وانا قاطع تذكره على االويتنغ ليست لجهنم وبطلت احلم بالدوله .صرت احلم اني بعدني بحلم وبتمنى اني ما اعود اتمني وقطعت الامل من كتر ما اتأملت .
انا وملاين زي من العرب صرنا نحلم تحت الطلب يعني قبل النوم منبرمج ومنفرمت عقلنا الباطن على الاحلام السعيده والله لا يأرجيكم صرنا نشوف كوابيس مش احلام.
مثلا المواطن الدنماركي او الاسكندنافي او الغربي المتقدم ما بحلم بالسعاده ولا الفرح ولا الاستقرار ولا الوظيفه ولا الزواج ولا الضمان الصحي وضمان الدخل ومسكن لائق وحريه وعداله اجتماعيه وديمقراطيه وتعليم كل هدول واكتر عندهم لشو بدو يحلم فيهم.
تصوروا ما عنا كل هدول وغيرهم من المصايب والكوارث بالاضافه للارهاب وبدكم انو المواطن العربي ما يحلم.
اي بدنا نضل نحلم ونتأمل ونتمنى تنو يفرجها الله هذا اذا فرجها.وبدنا نبقى بعيدين عن الواقع لانه الخيال افضل.من الاسم خيال يعني غير واقعي
وبقولك ما بعد الضيق الا الفرج .يا جماعه من وين الفرج من فوق السطوح والا من تحت الدرج.
صار الواحد فينا يحلم انو عم يحلم حتى بالحلم ذاته اد ما صرنا مدمنين احلام واماني وامال.
ختاما:اخي المواطن اذا كنت بعدك من مريدي الاحلام التي لا تتحقق , رغم ان الحلم هو جزء من الحقيقه والاحلام حق مشروع ومكتسب لكل مواطن ارجو لك احلاما سعيده ويفضل ان تنام ساعات اضافيه حتى تنسى واقعك الاليم وبتمنى وبتأمل انو احلامك تكون ورديه وعلى الاقل الحلم بالايد ولا عشره على الشجره.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات