عبد الدايم نايم في رمضان صايم

جان نصار

الحوار المتمدن-العدد: 4839 - 2015 / 6 / 16 - 13:25
المحور: كتابات ساخرة
    

بدايه اهنئ كل اخوتي في الانسانيه المسلمين بالشهر الفضيل رمضان وبقولكم كل عام وانتوا بالف خير وصحه وسلامه وينعاد عليكم وقد تحققت الاماني والامال وكل واحد يحط الاماني والامال اللي بدو اياها.
اكيد في كل رمضان في مظاهر كتير ايجابيه ومفرحه وسعيده لكن بالمقابل في سلبيات محزنه ومخيبه للامال ولازم نحكي عنها.
راح نتكلم عن منطقتنا فلسطين والاراضي المحتله رغم ان كتير من اللي راح نحكي عليه احداثه وسيناريوهاته تنطبق ايضا على وطننا العربي.
هذا شهر استهلاكي اكتر منما هو انتاجي. وبالاصل عنا شو احنا منتج غير مواد غذائيه وتمونيه وشوية خضار وفواكه.
لا صناعات حربيه ولا سيارات ولا ادوات كهربائيه وطبيه او زراعيه او تكنولوجيه يعني نحنا نستهلك اكل ونوم اكتر من كل شعوب العالم طبعا بالاضافه الى الكسل والتنبله خصوصا بالشهر الفضيل.
يعني المواطن العربي عبد الدايم نايم لانه صايم وبستنى الطبخ والاكل واذا في عزايم هيك بشكل عام الوضع قائم.

اللحوم والخضار والفواكه والاسماك بتغلى عنا الاسعار والكل بحمل الاحتلال السبب.
فمثلا هاتو اللحام واسألوه ليش يا اخي بترفع الاسعار بهذا الشهر الفضيل مع ان بيعك ماشالله بزيد, كن بقولك اليهود بغلوه علينا ونفس الشئ بقية التجار مع العلم ولا في منه هادا الحكي.
اينعم في بينا صراع وخلاف واحتلال لكن انكم يا تجار مشان الجشع والطمع والنهب تحملو الاحتلال الذنب كتيري هاي.
وبعدين اذا الواحد فينا احتج وقال هاي عند التجار اليهود في الاعياد الاسعار بتنزل وعنا بترتفع بصير الواحد منا عميل ومتواطئ وضد المقاطعه وبشجع الاحتلال.
طب انت يا تاجر بتشتري من عند اليهود اللحوم والاسماك والخضار وطني وانا اذا اشتريت يعني عميل.
القياده الفلسطينيه تطالب المواطنين وهم تحت الاحتلال المقاطعه وما في بديل .يعني المقاطعه على شوية بسكوت وشوكولاطه ومعكرونه والباقي نشتريه من الاحتلال.
فمثلا اللحوم عندنا في شمال الضفه مزرعه ابقار وواحده في جنوبها يادوب 1000 بقره.هل هذه الابقار تكفي لاطعام وانتاج الحليب والالبان لاكثر من اربع ملاين مواطن .
بدنا كل يوم 5 مليون لتر حليب غير الذي منو.
منرجع لمظاهر هذا الشهر الفضيل لانه شطحنا كتير.
اللحوم المجففه والمنتهية الصلاحيه تباع على اساس انها طازجه في مين يلهط هادا عندنا.
في مصر تباع لحوم الحمير على اساس انها دليكاتس ويللى خللي الفقراء ياكلوا محدا حوش. الاسماك المجمده ومنتهية الصلاحيه تنزل الى الاسواق في مين يشتري التمور والحبوب ايضا المنتهية الصلاحيه تلعلع في الاسواق.
تمور اسرائيل تذهب الى الدول العربيه بعد اعادة تغليفها وغيرها من الانتاجات التمونيه الغذائيه على شوية خضار وفواكه وبقولك مقاطعه.
مميزات هذا الشهر هو وقوف عجلة الانتاج والعمل اللي هو بالاصل يعمل بوتيرة حبني اليوم وانساني بكره,اي يوم ايوه وتلاته لاء.
المواطن معصب ومنرفز وبخانق دبان وجهه لانه صايم وعطشان من الحر ومحمل ربنا جميله وبقول للجميع سيبوني يا ناس في حالي اعيش مطرح ما اروح ومحدش يكلمني.
الرجال في البيوت نيام والنساء على ابو طبخ وتحضير لوجبة الافطار واذا صحي الرجال بتفرجوا على الفضائيات اما مسلسلات او برامج ومواعظ دينيه.
موائد الافطار مليئه باللحوم والاسماك واليخاني والسلطات والشوربات والكبه والصفيحه والدجاجات غير المشروبات والفلافل والحمصات وبالاخير بعض الحلويات والنقرشات والمكسرات وللهضم الشايات وختامها مسك بعض المسلسلات.
يعني التفكير بالفقراء والتقشف هاي شغلات منشوفها بس بالمسلسلات او شي شيخ يحكي عنها في الفضائيه لكن في بيته اكيد ما راح يطبقها.
احلي شي انه لا يستطيع اي دائن ان يسترجع ماله من مدين لانه الجواب معروف انت شايف جاين على شهر فضيل ومصاريفه زايده وكتيره تعال بعد العيد. طبعا بعد العيد بدو يقول فتوح مدارس ولساتنا مندفع من ديون رمضان وبعد اشهر بقولك جاي علينا عيد الاضحه والشتا على الابواب وهات حيكها. هاي بتذكرني بنكته ننهي فيها مقالنا اللي بتقول:
واحد مقتدر وغني معروف بالكرم والمساعده قاعد في قهوه بين بعض الاصحاب.اجى واحد عنده وطلب منه ان يدينه بعض النقود.
قام الغني سأل الرجل بس بدي اسئلك سؤال كل قديش انت بتتحمم(تغتسل) قالو الزلمي كل 3 ايام اجاب الغني روح ما بدي اداينك.
اجى واحد تاني وقالو يا فلان ديني مبلغ من المال وسئله نفس السؤال كل قديش انت بتتحمم قال كل يومين اجابه بديش اداينك.
جاء الثالث وطلب الاستدانه فسئله نفس السؤال واجب التالت انا بتحمم كل يوم مرتين فاعطاه ودينه (اقرضه) النقود.
لما راح سئلوه القاعدين والاصدقاء ليش ما دينت الاول والتاني مع انهم افضل من التالت .
اجاب كلهم مثل بعض التلاته بس مشان لما اروح اطلب دينتي منه وبدي ابوس ط................. مؤخرته وقفاه مشان استرجع دينتي على الاقل تكون نظيفه.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات