احنا طراطير ومش فاهمين اللي بيصير

جان نصار

الحوار المتمدن-العدد: 4882 - 2015 / 7 / 30 - 18:02
المحور: كتابات ساخرة
    

قيادة الشعب الفلسطيني بتفصل واحنا الشعب منلبس.
منلبس مقالب مؤمرات خلافات عطعطه وجعجعه املاءات ترشيحات وصايات اوامر مش مهم احنا منلبس.
قيادة فتح بواد ومقابلها قيادة حماس بواد تاني.والحورات بيناتهم مقطوعه و اذا صار ولو لا سمح الله بيناتهم العكس فحواراتهم مثل حوارات الطرشان ما حدا سامع لحدا.
اللي انا مستغربوا انو كيف فصيلين لقيادة شعب واحد همومهم وحدي ومشاكلهم مشتركه وبدهم بالاخير دوله ومش قادرين يتحدوا ويتفقوا على راي.. صارلهم اكتر من سبع تمن سنوات والله ماني ذاكر قد ما مسلسلهم الشيق اللي اسمه( المصالحه) طول ,لدرجة ان الشعب يئس وفلس وفقعت مرارته وبطل يتابع ولا يسأل عن احداث المسلسل. صار كتير اوفر وبورنغ يعني ممل ل االله.
طب اذا انتوا شعب واحد ومش قادرين تتفقوا على راي كيف يا ترى بدكم تتفقوا مع العدو والطرف المقابل يا ترى.
شو اللي عمال يصير وراء الكواليس ومن تحت وفوق الطاوله الشعب ما حاسس فيه وبدكم تقولو طراطير ومش عارفين شو اللي عمال يصير لا عند حماس ولا فتح ولا هاي اللي بسموها منظمة التحرير وبعدين بقولوك حق تقرير ومصير.
تراشق الاتهامات على المفوضات بين هدول وهدول واسرائيل شغاله .فتح بتقول انو حماس بتفاوض اسرائيل وهدول بنكروا .وحماس بتتهم المنظمه وفتح بالعماله وتفاهمات من تحت الطاوله مع اسرائيل وهات حيكها وافهم الخلاصه وخود الزبده واعرف يا مواطن على انو خازوق انت قاعد او بدك تقعد او رايحين يقعدوك عليه.
الشعب الفلسطيني والمواطن صار زي الزوج المخدوع اخر من يعلم وما بعرف اكم تهريب ولعات مرتو عم بتهرب.
حماس غيرت طريقة لعبها من 2و4 و2 ل4 و1 و3.يعني طقعوا لايران والمساعدات والمبالغ كانت تحرز وهرولو عند حبايبنا السعودين وقديش هبشو ولهطو وعلى شو اتفقوا العلم رايح يجينا بالاخبار من صحيفة الانتبندت اللنديه خلال الاشهر القادمه لانو هاي اسرار انتوا يا هالشعب بخصكوش فيها.ولازم تحديد مواقف انتوا مع السنه او الشيعه ( او سينوشيعاوي).
موضوع اعادة اعمار غزه خللي على الله هسع مش وقته.المهم في مخيمات صيفيه لتدريب الاطفال على القتال والدفاع عن الوطن ويكونوا مشاريع استشهاد اذا ربنا كتبلهم اياها. بالمختصر الامن مستتب والصواريخ تصل الى العمق الاسرائيلي والكهربه مقطوعه وتصل تباعا والمي فيها ملوحه والشعب جوعان ولهيك على عيد الفطر استهلك القطاع 960 طن شكولاطه بعد ما سمعوا نصيحة ملكة فرنسا (انطوانيت)ابان الثوره الفرنسيه لما خبروها ان الشعب جوعان ومش ملاقي خبز ياكل ,قالت طب ياكلو بسكوت.وجماعتنا على العيد اكلوا اكم حبة شكولاطه وقيادة حماس بتوكل كبسه سعوديه ودندرمه(بوظه)تركيه وفريش ليمونيد بالدوله القطريه.
الشعب بتقلى والقياده بتتسلى .
بالمقابل السلطه برام الله كمان مشغوله بالاقالات والزعلات والحردات والمؤامرات وطاسه وضايعه فتح تتشعب والخلافات طافت الى السطح(اكيد بسبب ارتفاع درجات الحراره).
الرئيس ابو مازن عدا عن زياراته المكوكيه هون وهناك ويتحدث مع الرئيس هادا وهداك اكيد مش مشان حل القضيه لانها اليوم باستقرار عاطفي ومنقضر نقول انها مجمده لاشعار اخر او حتى تهدئ عواصف وبراكين المنطقه العربيه .(هادا عزيزي القارئ لن يكون على زماننا فلا تشغل باللك)
بالمختصر الزيارات هاي لتدفق المزيد من الدعم المعنوي والاخوي اللي هو مش كتير مهم بس الدعم المادي وهو الاكثر اهميه وحيويه وديناميكيه.
في الداخل يعني عنا هانا في الضفة الرئيس مشغول في اعادة ترتيب البيت الفلسطيني(حلوي هاي الجمله اعجبتني فيها عمق).
الرئيس اقال الاخ ياسر عبد ربه من مهامه اللي هي امانة سر اللجنه التنفيذيه لمنظمة التحرير(مش فاهم شو وظيفتها هاي الوظيفه وايش اهميتها) اللي فهمته بحسب فهمي الضيق انو هذا مركز حساس وممكن اللي بشغل هاي الوظيفه يكون الرئيس القادم للسلطه ويمكن فتح والله اعلم بكون رئيس الشعب الفلسطيني.
هيك البرتوكول بقول وقيادة فتح بدها والشعب لا الو راي ولا كلمه وحتى اعتراض على اساس اننا قطيع من الخراف.
ابو مازن عين الاخ صائب عريقات على اساس انو لغته الانكليزيه قويه ومقبول امريكيا وثعلب مفوضات صارلو عشرين سنه بفاوض الاسرائيلين وبفاوضه لا همي اخدو حق ولا باطل واحنا زيهم.ولهيك سميت بالمفوضات العبثيه.
الطيراوي زعلان ومش راضي .والجنرال الرجوب كمان زعلان ومش راضي لانو بهيء نفسه لمنصب الرأسه .
هاي جملة (احنا مش طراطير عارفين شو بصير بالبلد) هي جملة الاخ جبريل الرجوب
عفوا اخ جبريل بجوز حضرتكم مش طراطير وانت عارف البير وغطاه بس مع الاسف احنا الشعب والمواطنين طراطير ومش عارفين شو بصير ولا النا لا بالعير ولا بالنفير لا صغيرنا ولا كبير.
بعض الاقلام اشتغلت هون وهناك لتلميع هادا وهداك اشي بقولك الرجوب هو الافضل وفي ناس بتلمع الاخ محمد دحلان الزلمي اليوم واصل وعمال يرش فلوس بالهبل...
واللي غيظني انو انا ولا طرطوشه صابتني, ناولوني ولالمع اللي بدكم اياه بس ناولوني الاخضر او الاصفر مش مهم.
اسماء مرشحي الخلافه هي:مروان البرغوثي معتقل ومناضل وحاجته اعتقال.
توفيق الطيراوي:رجل المهمات الصعبه وليش الحكي محبوب ومقبول على الكثيرين.
جبريل الرجوب:وزير الشباب والرياضه وكرة القدم مقبول من فئات عريضه من الشباب والفتحاوين
سلام فياض:رئيس وزراء فلسطيني سابق وهو اقتصادي بامتياز واقام العديد من المشاريع الاقتصاديه ولا يزال .مدعوم اماراتيا.
محمد دحلان:اشهر من ان يعرف.قيادي فتحاوي يعيش بالخارج ويمكن بالداخل الله اعلم.
اسماعيل فراج:مدير المخبرات العامه من منطقة بيت لحم
صائب عريقات ذكرته خلال المقال.
هدول المذكورين هم الفرسان السبعه اقوى المرشحين واكيد كمان في غيرهم من الاسماء والمنتسبين والمرشحين كتار واحنا الشعب الطراطير ما النا دخل ولا كلمه .
زي ما شفتوا اعزائي القراء لم اذم باحد لاني مش مستغني عن روحي ومقالي فشة خلق مش اكتر.
بصراحه انا مع التجديد وانتخابات واستفتاء والشعب يقول كلمته.
اخ يا راسي اخ يا ايدي راحت عيني والله حرمت انا رأليس بدون رأي بردون واسف .فخار يكسر بعضه.
تحياتي لكم من باريس وصلت الى بلاد الحريه لاجئ تياسي عفوا سياسي.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل