هيفاء وهبي وجدلية الصراع الفلسطيني فلسطيني

جان نصار

الحوار المتمدن-العدد: 4902 - 2015 / 8 / 20 - 15:55
المحور: كتابات ساخرة
    

القضيه الفلسطينيه والصرعات الداخليه بين الفصائل وخصوصا فتح وحماس بطلت تهم حدا من زعماء وسياسي الوطن العربي المشغولين بقضايا بلادهم وصراعتهم الداخليه وتفتيت اوطانهم ومحاربة الارهاب المتثل بداعش واخواتها.
لهيك بقي الصراع والخلافات بين الفصائل الفلسطينيه لوحدهم وما عاد حدا يهتم حتى ابناء الشعب الفلسطيني انفسهم بقضيتهم ومستجداتها.
بس الهوبره والجعجعه والفشخره والطخطخه والعطعطه والمرجليه وطرح الشعارات والمذاوده والمطاحنه والمشاحنه والمشاكسه بعدهم على حالهم من يوم يومنا احنا يا هالفلسطينيه .
الخلافات الفتحو حمساويه والمصالحه ما الها ذكر عند الناس ويئسوا من قصة ابريق الزيت .
حماس وقيادتها ماشين على مقولة ميكافيلي اللي قاللكم وقلي اه يا ترى للي الغايه تبرر الوسيله .
المصالحه انتهت وكل عنزي تنمسك من كرعوبها واللهم نفسي .غزه لحماس والضفه لفتح والشعب لالله هادا اذا رضي فيهم.
اليوم مستعدين لهدنة عشر سنين مع اسرائيل بس خلينا على الكرسي قاعدين, لانه ولا اللي خلقكم احنا متزحزحين, وما صدقنا على الله امتى نركن ونستكين ,وطالما في دعم وداعمين مثل الاتراك والسعودين والقطرين ومنلعب على الحبلين ومنلفي على الايرانين,,فطز بالشعب والمساكين اذا كانوا جوعانين والا عطشانين ويشكروا ربهم انهم زي الكلاب عايشين وصبح ومسى يصلوا ويقولوا امين.
المسخمين والمشحرين اهلي غزه بعدهم لليوم متفائلين ومنتظرين الوعود باعادة اعمار غزه وبقولولك سمعنا طحن ولا شفنا طحين.
اعادة اعمار غزه راح يكلف 4 مليار دولار ,لاء لاء 8مليار دولار, لاء لاء 12مليار دولار والمصراي جاهزين وموجودين بس وين وين الله اعلم يا فلسطينين.
حماس بتقولك انو المحادثات والتفاهمات الغير مباشره برعاية الاتراك وقطر ومباركة السعوديه وتحفظات ايرانيه . والاخ طوني بلير مبعوث الرباعيه بقولك تكي وبتنحل الاشكاليه.
الاحلى والانكى انو الاسرائيلين بقولولنا ولا في منو هادا الكلام مع انو المحادثات من تحت الطوله جاريه بس هادا الغنج المعروف يا حماس بتشد يا اسرائيل بتشد وقال :جدي بلعب على تيس.
كالعاده الشعارات والعطعطه موجوده.الاخ اسماعيل هنيية بخبرنا ان حماس لن ترضى بان تكون غزه هي فلسطين وهدنة العشر سنين هاي مرحليه وتكتيك اوتوماتيك تتعرف شو اللي جايك, واستراحة مقاتل وعلى الاقل ضمان لوجود حماس على قلوب الغزين لمدة عشر سنين وبعد انقضائهم يخلق الله ما لا تعلمون.
هنيه بقول:ستقطع الايادي التي تمتد على القدس.
يا خوي يا هنييه هيني انا ابن القدس لا شفت تقطيع ايادي لانها محتله ومع الاعادي وكل شعاراتك لا حياة لمن تنادي والحياة صارت اتوماتيك مش عادي.
اخونا التونسي قال هرمنا واحنا هرمنا وسئمنا وانسينا اسمنا وافكاركم وشعارتكم صارت تسمننا.
كل قيادة حماس حتى اذا بدهم يزوروا مصر من قطاع غزه صاروا يوصلولها عن طريق تركيا او قطر...عادي بدخلوا من المعبر وعلى مطار القاهره ديركت وبتوجهوا لتركيا او قطر ومن هناك مره تاني لزيارة القاهره.كيف هادا الحكي انا مش فاهم.
لانه اتخاذ القرار والاستقرار والخيار والاختيار والاستمرار والاستحمار وصولا الى الهدؤ او الانفجار صارات بأيدي الاتراك والقطرين والسعودين الاخيار اللي جابولنا المصايب والدمار وابقى سلملي يا ابن غزه على اعادة الاعمار.

فتح ومنظمة التحرير والمقاطعه برام الله هدول كمان مشغولين عن الشعب والناس بخلافاتهم الشخصيه الكيديه والتنظيميه والقياديه والاقتصاديه الماليه ونازلين بأوبر مورفينيه وتصريحات سياسيه لابناء القضيه بالسكوت عن الاعتدأت الاستطانيه ومصادرات الاراضي العربيه لصالح الدوله العبريه وبلاش انتفاضه جديده شعبيه لانو المفاوضات بالمي المغليه بعدها مش مستويه.
اسرائيل بتقولك الوضع هيك مليح ابو مازن احسن مين يحافظ على الهدؤ والاستقرار النسبي بالضفه وحماس همي المؤهلين لتسليم البضاعه .وقيادة غزه وجماعة رام الله وخلافاتهم هاي من مصلحتنا.
ابو مازن بيسابق الزمن مشغول بضمان الدعم المالي وهاي اليوم بستعد لزيارة ايران طالما ان حماس ارتمت بخضن تركيا وهو بدو حضن واحضان يحضونوه.
وكمان مشغول بالموتمر التنظيمي تبع فتح وخلافاته مع الكثيرين طافت للسطح .
القيادي الفلاني عليه ان يستريح لانه هرم وكبر بالسن وبتنهشه الامراض.والقيادي الشاب تعينه بمركز سفير في بلد اوروبي المهم نخلص من شره.والقيادي علان مشاكس ومش تبعي لازم نشوفلو شي صرفي. وهداك من جماعة دحلان وهادا من جماعة الرجوب و الباقي المتهور والغير ملتزم واللي بعده مش ناضج واللي بعده بدو فت عدس يعني شو بدكم بالطويلي طاسه وضايعه. وهاي الحلول والانتخابات والتجديدات والاخترعات واعادة البناء لازم تخلص لغاية اخر السنه.
معليش اعزائي القراء بدكم تعرفوا شو دخل الست هيفاء وهبي بالموضوع.صدقوني ولا حاجه وما الها خص بالموضوع لا من قريب او من بعيد واصلا هي ما بتعرف وين هاي فلسطين واذا بالصدفه سؤلت عن رأيها بالقضيه راح تجيب:الله يوفيئكون وينصروكن وبتمنالكم كل خير.
طب ليش هاي المياصه والبراده والصقاعه والسرمجه والهبل وقلة الحياه بعنوان مقالك المتستفز.؟
لانك عزيزي القارئ الذي لاتعرفني وتعرف كتاباتي الساخره من حيث لا تدري قادك فضولك ومغامرتك وخيالك الفنتازي لكي تقرأني .
ولانه هيفاء وهبي حتى وان لم تكن بالمقال تسترعي انتباه 100 مليون عربي اكثر من ما تسترعيها حلول القضيه.
عنوان صادم هيفاء وهبي وجدلية...... انا حتى كلمة جدليه صدقوني مش عارفها واكيد مش راح اجادلكم عليها.
يا جماعه العنوان هو نص المقال وبعدين فيو عمق لدرجة اني انا كاتب المقال اضطريت لقرأته.
وختاما منيت نفسي بشي لايكين وواحد اعجبني على سيرة المناضله هيفا.
شو رأيكم بشي يو تيوب ساخن وطالع من الفرن طازه للاخت هيفا.
بليز ورجاء خاص على الاقل قارئ واحد ولو باسم مستعار يكتب تعليق فعلا يقول اللي جابني على مقالك الست هيفا بليز رجب.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل