السياسيون وشكوى الفقراء2

حيدر حسين سويري

الحوار المتمدن-العدد: 4575 - 2014 / 9 / 15 - 11:31
المحور: مواضيع وابحاث سياسية
    

" السياسيون وشكوى الفقراء2 "
**********************
بقلم الكاتب : حيدر حسين سويري

هذه المرة أنقل لكم حوار، وشكوى أحد المواطنيين، أثناء مراجعته لمديرية أحوال الرصافة، والذي دار مع صديق له حينما سأله صديقه :
- ماكو هالأيام ، ما نشوفك؟!
- والله ياأخي هاي دوائر الدولة دوخة
- ليش عندك معاملة؟!
- راجعت الجنسية ، علمود أبدل الجناسي مالتنا، أني والعائلة
- ليش؟!
- الوكيل (وكيل الحصة التمونية) كَال ما ينطونك البطاقة التمونية، لأن جناسيكم قديمة، وما بيها فسفورة
- إي بس الجنسية يكَولون تطلع بيوم واحد؟!
- وداعتك أسبوع صار اطارد وكَوه فضت
- ليش؟!
- رحت أول يوم، وصلت وتعرف الأزدحام مال جسر كَراج الأمانة؟!
- اي بالظيم، واحدنا ينسمط سمط من الحر ياله يوصل!!، كَول وصلت ..
- وصلت، طبيت من التفتيش ورحت سلمت الموبايل، ودخلت، لكَيت جماعة ملتمين، كَلتلهم شكو؟ كَالوا اسحب استمارة, بس انت فردي لو زوجي؟!
- هههههههههههههههه شنو فردي لو زوجي؟! هاي جديدة ...
- أني هم ما أفتهمت، شفت شرطي, كَتله : عمي اني فردي لو زوجي؟، باوع بالجنسية وكَال : اليوم مو الك تعال باجر وعافني وراح!، أني هم رجعت أخذت الموبايل وطلعت رحت للبيت
- هذا أول يوم ، كَول رحت يوم الثاني ...
- رحت يوم الثاني، وهم لكَيت نفس الميز ونفس اللمة, كَول مديت روحي، كَتله : بعد عمك اريد أبدل الجناسي، كَال روح للبصفي هو (بغداد الجديدة)، رحت للبصفه، باوع بالجنسية وكَال : تعال باجر
- ليش؟!
- تجيك السالفة، أني هم كَتله ليش؟ كَال : مو أنت زوجي واليوم فردي؛ كَتله : عمي مو البارحة أجيت وكَلولي باجر!، جا البارحة فردي واليوم فردي؟! ليش؟، كَال : البارحة31 بالشهر واليوم 1 بالشهر، كَتله : أها، زين اني شلون زوجي؟ أريد أعرف ولو أضايقك، كَال : على رقم السجل ...
- وهذا طار ثاني يوم
- كَول رجعت اليوم الثالث، بعد أندليت رحت الصاحبي، كَتله : عمي علمود الجناسي، كَال : جيب 500 دينار وهاك استمارة، أخذت الأستمارة الزركَة، وكَتله : عمي وين اروح، كَال روح للأستعلامات فوكَ، رحت شفت واحد كَتله : عمي وين الدرج؟، أشر بيده وكَال : منا. طبيت لكَيت درج صعدت للطابق الأول مكتوب الكرادة الشرقية، صعدت الآخر مكتوب الرصافة، وجنها مثل فيلم عادل امام(ارهاب وكباب) الناس مالها معّرف، كضيت شرطي : عمي وين بغداد الجديدة؟، كَال : عمي جوه انت شصعدك؟، كَتله الحظ غير، كَول نزلت، كَالولي منا. باوعت قريت مكتوب الأستعلامات، لكيت سره، وكفت بالسرة
- كَول وصلك السره
- وصلني السره، كَال : حجي روح للعرضة حجي بره يمليها إلك، ويرتبها وتعال، أني هم ما أضبط لساني، كَتله : جا بوية أنت شنو شغلك ، أشو هذا زهكَ عليه وكَال : أهوووو كَام يتفلسف براسنا واحنا كاتلنا الحر، أبويه دوخر وراك ناس؛ وخرت، وطلعت للعرضةحجي، تلكَوني شباب حلوين (الله يحفظهم) : هله عمي، استريح، شعندك؟، بس أطيته الأستمارة والجناسي ، ويمة ترمز مال ماي والدنيا حارة، على ما شربت الماي، استنسخ، وكبس الصور، ورتب المعاملة، وكَالي عمي بوجهك للمدير، كَتله عمي شتطلب؟ كَال عمي 3 الاف دينار، انطيتهن واني الممنون، وبكَلبي أكَول لو يشغلونه جوه مو أحسن من ذاك العنفص عليه؟!
- كَول رحت للمدير ...
- رحت ، لكَيت سرة ، وكَفت ، كَول وصلت، كَال : حجي جيب تأييد سكن، بيه صوركم، وتوقيع شاهدين، ومصدق من الناحية، كَتله : عمي غير هاي بطاقة السكن ، كَال تعلمني شغلي؟! روح جيب تأييد وتعال ...
- هذا هم طار يوم، صارن 3 أيام
- رابع يوم رحت طلعت تأييد سكن، الله يستر عليهم 5 دقايق انطونياه، وكَلولي عمي روح للناحية بصفنا، رحت للناحية لكيت شباب (الله يحفظهم) انطيتهم التأييد كَالوا عمي استريح و5 دقايق يجيك التأييد، كَعدت وذيج القاعة الحلوة والبرودة الترد الروح وبراد مال ماي، والله ويصيحون بإسمي وأخذ التأييد..
- إي وبوجهك للجنسية!!
- شني جا أنت نسيت، غير أني زوجي هههههههههه
- ههههههههههه العفو نسيت
- رحت خامس يوم طلعت بوجهي للمدير، وقع وكَال روح للأستعلامات، رحت كَال : غرفة( 10)، رحت لغرفة 10 ، كَال : روح كَص وصل حسابات، رحت للحسابات، كَصيت وصل، مو هواي ياخذ، على الجنسية ألف دينار بس
- وبعدين؟!
- وبعدين رديت للغرفة(10)، عمي هاي المعاملة، كضه وكتب عليها وكَال روح للمدير!!، رحت للمدير، كتب عليها وكَال ارجع للغرفة 10 ، رجعت، كَال : حجي جيب ورقتين من الغرفة البصفي،كَلهم صحة صدور
- صحة صدور ماليش؟!
- تجيك السالفة، عمي صحة صدور ماليش؟!، كَال مال بطاقة السكن، كَتله : أنا عمك ليش، كَال : مو ضابط المركز ما كاتب اسمه بس كاتب ضابط أمن المركز، كَتله: جا عمي والتأييد شنو شغله؟! كَال : عمي روح ولا تأخرنا تره روحنه فايره . رحت جبت الورقتين، ملاهن وكَال روح للمدير، رحت للمدير ختمهن، وكَال روح صدرهن، رحت لبو الصادرة، كَال : هذين ختمين بعد ختم ارجع للمدير، كَتله : عمي جا غير هذا ختم المدير؟، كَال : عمي درووووووح ولا تضوجني، رجعت للمدير كَتله : استاد يكَول بعد ختم ، كَال : روح للمعاون، رحت للمعاون، ختمت ورجعت صدرت، وداعت وكل واحد اوكف كَبال غرفته ربع ساعة بالسره!
- الله يساعدك، ورحت سويت صحة صدور؟!
- رحت يوم الثاني للمركز ، سووها الي وخلوها بضرف وكَالولي أخذها، أخذتها، رحت يوم الأخر
- صار سبعة ايام
- الساعة بثمانية اني وكَفت أباب الجنسية، بثمانية ونص طبيت للغرفة انطيته المعاملة وصحة الصدور، كَال : إي هسه صح ، تعال إبصم بصمت كَال روح إنتظر بصالة الأنتظار...
- يا الله
- وهيه شلون صالة إنتظار!، تكَول تنور وحاطينك بنصه!
- ليش ماكو تبريد؟!
- يا صخام!، الصالة صايرة بنص البناية، ومخلين مكيفات بالغرف ، تعرف المكيف يدفع الهوى الحار ليبره، وين راح يجي؟!
- للصالة طبعاً
- ومخلين مبردتين ما بيهن مي! وعدك الأحساب، الموظفين والمراجعين مسموطين سمط!
- اممممممممم، خلينا يم الجناسي اشصار عليهن؟!
- طلعت الوجبة الأولى، ماكو جناسيي، طلعت الوجبة الثانية، هم ماكو!، صارت الساعة 12 الظهر، زهكَت، رحت للغرفة : جا بويه وين جناسيي؟!، جان يكَلي: حجي وين جنت مو أسم أبو زوجتك ممبين زين . غير تجي؟ ، كَتله : عمي وأنا اشم إيدي؟ جا غير تصيح عليه وأني كَاعد بالصالة؟! كَال : يله حجي ما صار شئ، فد ساعة وتجيك الجناسي، روح استريح!
- راحت السوده!
- والله والساعة 2 الظهر ويصيحون بإسمي وأماء عائلتي، وأخذ الجناسي وأكَلبهن ولنهم زينات ومابيهن شي
- هههههههههههههه إي قابل شبيهن؟!
- إي حقك تضحك، جا غير واحد كاتبينه إنثى، والآخر كاتبين عشيرته خطأ، أهوووووووو وشكد أخطاء بس أنا الحمدلله طلعن سلامات
- يا سلامات مو انت أسبوع عتعتوك اتعتعت
- زين أنت ما بدلت جناسيكم؟!
- أني أنطيت على كل جنسية 10 الاف وجابوهن الي للبيت، اشتريت راحتي
- أنا أخوك!

#حيدر_حسين_سويري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل