حرام عليكي

سليمان الزهيري

الحوار المتمدن-العدد: 4032 - 2013 / 3 / 15 - 16:10
المحور: الادب والفن
    

حرام عليكي
****
لو حد قالك ما تخافيش
إبقي إنزليله وانت ف إيدك الأكورديون اللي اتكسر منك
وخلي دمعك يخبي باقي كيسين الفول المرمين ع الأرض
وسلمي له يوم طلعة رجب على تربة أبوه وأمه
وقوليله مش فارقه.........
الحلم بيتخانق مع الناس على الحنفية
واخد في وشه
مفتوحة رأسه كإنه باب واقع
لحظة ما كنا بنلعب السيجا
ونزغلل عيون الدنيا بالمرايات
حبة دموع
كانوا طفشانين زي اتجاه القصيدة للفرار منك
لما تلاقيني بحبك ما تسبيش إيدي
وما تكسريش اللحن في النوتة
وما تزعليش لما أحدفك بالطوب
أصل أنا فعلا ما بقتش فاهم حاجة
مين اللي جاب القلعة جنب البحر ...؟؟؟
مين اللي فرط سبحة الدراويش
مين اللي قال الغياب يساوي ورقة البوسطة
مين اللي جاب صورتك على الكومدينو
قُرب المسافة ما بين القلب والطلقة
خلاكي أشبة بريحة الكولونيا لحد كان بيموت
كل اللي ثبتت عليهم تهمة الطيران
بقوا مربوطين في الخيط
من بعد ما كانوا قاطعين تذاكر سينما حفلة 6
ولحد ما صورهم بقت متعلقة ع الحيط
كله صبح على حد علمي وعلمك
- في الهوا سوا –
بقوا مرصوصين كلهم في قصيدة عمودية
على نن عينهم هيصبح قالب التنشين
جناحات عفية الريح محاصراها
وإيدين غلابة بيزرعوا ف الطين
ماتوا وخلاص
زي اللي ماتوا قبلهم ......وخلاص
ما سابوش وراهم حاجة مفهومة
نقط دم فوق التراب
وضحكة ساكنة جنب علامة النصر
وفيديوهات بتكسر حظر التجول لإجتياح النار
علشان كدا
أول إيديكي ما طبطبت على ضهري
مسكت فيكي والدموع بتقول
حرام عليكي
حرام عليكي

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل