غير لائق...فى ذكرى وفاة عبدالحميد شتا

سليمان الزهيرى

الحوار المتمدن-العدد: 2405 - 2008 / 9 / 15 - 02:20
المحور: الادب والفن
    

إلى شهيد الظلم عبد الحميد شتاوالقصه لمن لا يعرفها أن شابا مصريا ظل يكافح طيلة المراحل الدراسيه أملا فى مستقبل مشرق وحصل على الإمتياز فى كليته وإنتظر تعيينه فكان الإستثناء لأنه غير لائق إجتماعيا فدفعوه للإنتحار خلاصا من الظلم
غير لائق.....
يامصر الله يسامحك دمعى ف عينى إنجلد
فوق كوبرى من الكبارى شايف حتة ولد
ورده قطفوها بدرى ولا ضهر ولا سند
مش غرب يا مصر لأه ..داإحنا أصحاب البلد
::::::::
ورده وشافوها حلوه قطفوها للفاظات
وقالوله الفقر عيبه والفقرا دول عاهات
عايشين يمكن عواله وكمالة تعدادات
رافعين ديل الأكابر وأصفار جوه الخانات
:::::::::
من كتر الدمع عينه ما بقتش مصدقه
وفروع الزينه فجأه بقوا تربه ومشنقه
بقى شايف كل حاجه ف عيونه ضيقه
مكتوب عليه إنه يفضل فى طور الشرنقه؟؟
:::::::::
كان جاى بالفيش بتاعه أبيض ولا سابقه فيه
سابقاه زغرودتة أمه...... والفرحه بتناديه
لا ف عيلته حد هابش قرض بمليار جنيه
شرفا ومن كد إيديهم فضلوا مراهنين عليه
:::::::::
غير لائق والأكاده ع الحيط بالمفتشر
وكأن الفقر عيبه والفقرا مش بشر
غموس الظلم داقه لما ف جسمه إنتشر
يابتوع الافتا ردوا ....قتلوه ..والا إنتحر؟؟
:::::::::
خلوه من غير مايدرى ينسى أنه له حقوق
والظلم لقاه مسلسل دمه ف قلب العروق
بيهد خلاص كيانه ويجيب من تحت فوق
ولقاه واقف بطوله ولا شاف م الظلم طوق
::::::::::
الحمل تقيل وأظنه مش قادر يرفعه
ودوسيه أوراقه فجأه بقى ماشى يقطعه
بيهز ف راسه يسأل كان ايه اللى مطمعه؟!
فى الفقر إتحط عوده وم الفقر بيقلعه
:::::::::
مسكين على بر تانى واهى طارت كفته
وقالوله دى دنيا تانيه ولا تشبه دنيته
زقوه والسكه ديه ما كنتش سكته
قفلوله بيبان حياته واهى غرقت قشته
::::::::::
تعب السنيين بحاله داسه وبان الوجع
والحزن اللى ف عيونه بقى جاى بالمرتجع
فحروله وزقوا ضهره لما المسكين وقع
وف أتخن حيط دماغه بتقول إنه إتخدع
::::::::::
غير لائق والإشاره بتقول عندك وأقف
دى حسبه والنتيجه مش خاضعه للصدف
يعنى إنت زى غيرك كان لازم تتقطف
ومادام دول ع الكراسى ولا حاجه هتختلف
::::::::::
يبقى إما يموت ضرورى نسأل ليه إتقتل؟؟
ويامصر لابد نعرف إزاى بقى دا حصل ؟
دا لا كان شارب سيجاره ولا عمره كان خلل
ولا كان له فى السياسه ولا خبط فى الحلل
::::::::::
يعنى أفهم ليه نهايته تكون بالشكل ده ؟
ما يكونش أبوه إسرائيلى أو أمه من العدا ؟؟
ف الغلب الناس دى عاشت وبيحمدوه ورضا
واللى قتلوه كروشهم واسعه ومتبغدده
::::::::::
مش قادره ليه الحكايه فى دماغى تتهضم
إزاى فيه ناس غلابه فى الفقر بتتلضم
شايلين حمل البلدى وف الآخر....تترجم
يبنوا وإن عاشوا يبنوا.... اللى بنوه يتهدم !!
::::::::::
بسهوله كإنه عادى وطبيعى ويتقبل
وإزاى ما سبتش لسه ؟ دى خيوط وبتتفتل
وحكاية الحلم كدبه واللى بيكدب بطل
يا نيل أصبحت مالح والشوق خلاص دبل
:::::::::::
يامصر الله يسامحك دمعى ف عينى إتخرس
والآهه اللى بخناجر ماسكها ميت حرس
حقه وكان بده ياخده ما كانش بيختلس
وإزاى يهون عليكى ودا مربط الفرس ؟؟
دا مربط الفرس ......
سليمان الزهيرى

#سليمان_الزهيرى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل