تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

الناس والسبنسه

سليمان الزهيرى

الحوار المتمدن-العدد: 2402 - 2008 / 9 / 12 - 01:36
المحور: الادب والفن

ردا على البيانت الإقتصاديه المضروبه التى تتحدث عن إرتفاع مستوى الدخل وزيادة الناتج القومى وإرتفاع معدلات التنميه ......إلخ إلخ
::::::::::::
:::::
الناس والسبنسه
"""""
كل إما بقلب قناه يطلعلي كام برواز
يقيد فى حبة خشب ويحط فوقهم جاز
معدلات تنيمه وما أعرفش كام من كام
وأرقام تشوف رصهم هتحسهم ألغاز
ما تشوفشى حال البلد فوق م الورق كداب
بطل تشوف البلد من فتحتين فى الشيش
وتعالى شوف العيال إزاى بقى بتفرح
فرح العبيط إما يأخدوا تأجيلات م الجيش
شيلك أنبوبه فاضيه ف مستودع الأنابيب
أو قول علىً وعلى أعدائى ف طابور العيش
وإبقى إستلف علشان ما تدهن الشقه بالمعجون
وحلنى على ما تخش جمعيه تقبضها للتشطيب
وإقعد بمقطف ذره وإشويه على الكورنيش
وقدم ورق فى شغلانه محجوزه للمحاسيب
وزوف برجلك أمل طرحه ما بيقضيش
وحط فص مكركرون ع جرح مصر يطيب
وإن كنت أعمى بصحيح ما تشوفشى م الغربال
إصرخ من الفقر صرخه ترج كل الكون
وعدى ويا الولاد فى مراكب الكرتون
وإقرأ اليفط اللي مكتوبه ولا بميت لون
شايلاها كل الحيطان وخصوصا البقال
ممنوع يا عم الشكك ودا منع للإحراج
وكإن عيب الحموله هييجى ع الشيال
الصبر تاه والفرج أبوابه مقفوله
والخبط فيه بالدماغ ولا حرك الإقفال
والناس ف قلب الغميق دراعاتها مشلوله
والعقده متعقده ولا عدش فيه حلال
فيسلموها لظروفها ويمشوا جوا الحيط
ويمضوا ع الإستقاله قبل إستلام الأشغال
تدق ع الرأس طبول يمكن ولا تتعد
يوم الثلاثاء عندهم يشبه ليوم الحد
وبيحمدوه ع السواد ويخافوا لو يسود
ولكل لحظه فى حياتهم قصه أو موال
إركب مع الناس سبنسه ف قطر راكبه الهم
وشوف عشان تذكره ناس قابله بيع الدم
تلقط عنيك الصور لا تلاقى ... كيف ولا كم
ولا خبط زى اللضا لما يزق البال
سيبك يا عم اللي قاعد رابط الكرافت
لا الناس دى ناسك ولا أنت حتى عايش الوقت
ولا أنت شايل حمول بتهد حيل الصبر
ولا إنت جاتلك مراره م العيشه والأحوال
سيبك بقى م الشاشات وأرقامك العيره
ضاقت طاقات الأمل والضى تصبيره
والعتمه متكومه بتكسر المقاديف
والناس بتسأل بحيره حرام دا والا حلال!!!!

#سليمان_الزهيرى (هاشتاغ)

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن
في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل