تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

تخيل لو هتاخد مصر صوره

سليمان الزهيرى

الحوار المتمدن-العدد: 2401 - 2008 / 9 / 11 - 04:00
المحور: الادب والفن

تخيل لو هتاخد مصر صوره
تخيل لو هتاخد مصر صوره
هتبدأ م اللى ساكنيين العلالى
وتنزل ع اللى نايمين ع الحصيره
هتبدأ م المبانى اللى إرتفاعها
بيخنق تحت جفن الناس دموعها
تهيج الثوره تسجنها ف ضلوعها
وتكتم سرها ما تجبش سيره
تخاف ع الجرح لما الليل يطوله
فتسكت خايفه م اللى راح تقوله
تدَخل نفسها فى سين وجيم
وشىء فوق حملها مش راح تشيله
يدوبك يصلبم ع الأرض طولهم
عيدان فى الأرض بس الريح كتيره
تخيل لو هتاخد مصر صوره
"""""
هتاخد صوره للناس الغلابه
بتوع العين بصيره وإيد قصيره
وناس علشان تعيش بتبيع كلاها
وخمسه والا سته ف قلب قاعه
وناس واخداها يمكن كعب داير
عشان ما يبيعوا جلده والا ساعه
وبياعين فى قلب الموسكى عينهم
على البلديه ليلموا البضاعه
وناس فى كل حته مده إيدها
تقول لله كإن إحنا ف مجاعه
وناس ع القهوه قاعدين م العصارى
عشان بعد العشا فيه ماتش كوره
تخيل لو هتاخد مصر صوره
""""""
هتاخد صوره للناس الأكابر
لا سموا ف مره شحته والا صابر
ولا راضى ولا عايش وجابر
بياكلوا ف آته محلوله وغيطانها
على ما تمد مش حتلاقى آخر
عينيهم فى السما لكن دمانا
بيجرفها إبتسامهم ع الضوافر
يمصوا من الفجور دم الغلابه
عصابه تروح وتيجى ميت عصابه
يخلوا جنينة الأحلام خرابه
يسفوا من العجين كل الخميره
تخيل لو هتاخد مصر صوره
"""""""
هتاخد صوره تبدأها بجماد
هرم والا معابد أو مسله
ومصر اللى بولادها فى المزاد
وناس م القهر خانقاها المذله
هنا والا هناك إلمح كاميرتك
وقوللى ازاى بقى وإنت وشطارتك
هتاخد صوره فى غاية التضداد
وناس م الحيره مش لاقيين إجابه
دا عيب فى الأرض
والا فى العباد ؟؟
والا فى العباد ؟؟؟

#سليمان_الزهيرى (هاشتاغ)

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل