صنم حسنى مبارك

سليمان الزهيري

الحوار المتمدن-العدد: 3025 - 2010 / 6 / 5 - 18:32
المحور: الادب والفن
    

فى عز ما الليل مخاوي الجن والعفاريت
وف عز ماكانت الدنيا ف الضلام والبؤس
كانت البنيه بهيه هى سقف البيت
وهى عيش المشنه وهى قرص الشمس
وبعد طول الزمان ومعافرة الحواديت
وضعف عين البصيرة والحواس الخمس
بقت الحدايات النهارده بتحدف الكتاكيت
وبقوا الأبالسه أئمه والأئمه خُرس
..........
ضاقت البلاد ف عينين الأولاد
وللغريب شِرحه وبِرحه
وأدي الفساد وادي الأوغاد
وأدي نتاج كفر مصيلحة
أبو العلاء حسني مبارك
........
بيقول كرامة المصريين
طول ما أنا عايش متصانه
ويبعتروها شمال ويمين
وف كل مطرح متهانه
ودا كله خير حسني مبارك
........
ما بقاش وطن ... بقى مسقط نور
وعفش دار هو بايعها
وكلنا بنموت بالدور
والدولة مشلولة دراعها
عشان يتبسط حسني مبارك
........
سكنوا الغلابة فى القرافات
وعلى الرصيف ملايين ناموا
وإخترعوا للمساكين إتاوات
أدي السلام وأدي حمامه
كله حمام حسني مبارك
.......
باع المصانع والشركات
اللي جمال كان أممها
ورجعوا من تاني البشوات
والأرض خدها وسلمها
لأصحاب جمال حسني مبارك
........
ف خيره ربى قروش وحيتان
ما بيختشوش ولا بيخافوا
وبقوا الغلابة ف كل مكان
زي الهاموش ولا يتشافوا
علشان يعيش حسني مبارك
.......
وَقف صفوف المصريين
فى وضع ما هوش تشريحي
وعاص وشوشنا بزفت وطين
وبقينا مُسلم ومسيحي
ودى مِلته حسني مبارك
........

مصر اللي كانت درة تاج
ولا عمرها تشبه غيرها
دلوقتى عايزة قرار وعلاج
من ضفرها لغيت مناخيرها
وياريت يشوف حسني مبارك
.........
بيموت على أكتاف المخاليق
بِعقدْ عُرفي ماهوش شرعي
وعايزننا نسقيله العُليق
وإيدنا ف إيديك يا برادعي
نكسر صنم حسني مبارك
نكسر صنم حسني مبارك
سليمان الزهيري

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل