تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

شارع الثوره

سليمان الزهيرى

الحوار المتمدن-العدد: 2408 - 2008 / 9 / 18 - 03:51
المحور: الادب والفن

لو سمحت ....تعرفشى مبنى 23 يوليو يا عم اروحله منين؟؟
إسمعنى يابنى كويس وإحفظ السكه
الشارع اللى إنت فيه دا إسمه شمبليون
مع إنه كان قبل دا فوق م الحيطان عكا
شارعين تسيبهم ع اليمين وإحود
هتلاقى يافته قديمه بمسمارين صدوا
مكتوب عليها بخط أظنه مش واضح
شارع الثوره وقصادها محل للبس مستورد
وتحت منها إشاره وخلق يابنى كتير
لاهم راضيين كده...... ولاهم بيعدوا
شر البقر ع المداود واللى جاى أسود
وعيال بحبة فوط واقفين من إمبارح
ورصيف يلم اللى سارح واللى متشرود
هتلاقى ف اخر الطريق دا ع الشمال مصنع
الورثه قلبوه لشركه تسفر العمال
ف يمينه حبة شقق كانت منبع التطريز
دلوقتى زى الزمن بقوا كلهم بوتيكات
ومحكمه فى وشها قضاياها باالألافات
وناس على القهوه قاعده بتوع شهاده زور
وقبل منهم كنيسه واقفه بين جامعين
وشباب دوقنوهم طويله فارشين سواك وبخور
وكولديرات مكتوب عليها الفاتحه للأموات
وإعلانات عن وظايف خاليه فوق م الحيط
وهتلقى راجل ماأناش عارف أقولك إيه
ماسك سيفين من خشب وف بقه صفاره
بيقول حرام دى البلد متباعه بخساره
جى الطوفان ع البيبان والفايده للشله
دول ناس سابولنا الغطا لكن خدوا الحله
وحاجات كتير زى دى من مده بيقولها
الجو حرر قوى إبقى إمشى فى الضله
هتلاقى كومة تراب ف أخر داهو كله
ورا يافته مكتوب عليها إن المكان للبيع
مبنى بقاله زمن بيمسحوبه الارض
بعنا التراب واللى ناقص هو بيع العرض
بجد يابنى .........
مش إحنا فعلاً نستاهل التقطيع؟؟؟

#سليمان_الزهيرى (هاشتاغ)

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن
في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل