صباح الخير يا مصر

سليمان الزهيري

الحوار المتمدن-العدد: 2655 - 2009 / 5 / 23 - 06:30
المحور: الادب والفن
    

صباح الخير يا مصرصحيح
يا واقعة ف جنينة تماسيح
بيفتحوا الباب لأجل الريح
تعدى والشمع بيطفوه
****
كل اللي نبنيه ..... بيهدوه
وإذا جينا م التيه برضه نتوه
ويصورولنا الدنيا سواد
ويمسكوا دراعنا ويلووه
****
نقوم نقع مش فارقه كتير
يصفنا الخوف بالطوابير
ونمضي فى الآخر تأخير
وإن قولنا ثور ...الثور حلبوه
****
من الكبير لأصغر دكان
دول مصمصوا النار والدخان
وبيقطفوا الورد الغلبان
وبيزرعوا الشوك وبيسقوه
****
دول كسروا كل المقاديف
ووقفونا طابور لرغيف
وعلقوا رقابنا ف خطاطيف
واللي إحنا بنبكه يسفوه
****
سنين طوال بتجر سنين
نعيشها باالغلب وبالدين
وناس دموعها تموت ف العين
ويمسكوا الصبر يفلوه
****
ودول بشر مدهون ورنيش
وناس تشوف على راسهم ريش
شبه الكاسات على رف النيش
لو يمسكوا الفرح يمصوه
****
طالعين عيار يدوش ويصيب
ويغتنوا بورقة يناصيب
ويزرعوا ف ديلهم محاسيب
يحافظوا ع الدرب اللي مشوه
****
بالمليارات ما أعرفشي إزاي
وفلان أبوه كان بياع شاي
في قطر كان رايح مش جاي
فجأه إغتنى وعشره يحاوطوه
****
يقع إن وقع ما يشوفشي حساب
وياكلوا ع الضرس وع الناب
ويضربوا المربوط لو ساب
ويطبخوا السم..... ما يأكلوه
****
بقى كل حوت ف إيديه منشار
يسفوا م الميه و م النار
نجوم يفط وأبطال أدوار
حسب الأفيش ما يعوز يملوه
****
حيتان ورق وولاد جرابيع
لما إختشوش قلعوا البراقيع
وقعدونا ف سوق للبيع
واللي يراضيهم راح يراضوه
****
حبة كلاب صبحم أعلام
وسرطنوا حتى الأحلام
وحقنوا طين مصر ببرشام
يهري البدن والكبد هرووه
****
ما فيش عدد .. دا الفيش مدكوك
صبح الوطن فى إيدين مملوك
وقلعوه ملط وع الشوك
هيله بيله وقصادنا بيرموه
****
هيله بيله كدا عينهم عيننا
وعششوا الدوده ف طينا
وإن قولنا أه ه ه .. تخرج أنه
ويحرقوا الدمع ويشووه
****
مدد مدد يا وطن محروق
مدد مدد يا وطن مسروق
يا شمس مش بتبان ف شروق
أدهم على القضبان قتلوه
****
مدد مدد صروا المناديل
حمل البلد بقى أصله تقيل
وأبرهه بيحميه الفيل
أما إن وقع هيبان على أبوه
****
جبان ومتداري ف متاريس
وتاريخ بلد لفه ف قراطيس
وموته إنما موته فطيس
وكل من حواليه ساعدوه
****
على كل خنجر 100 بصمة
لوشوش ألاجه ومبتسمة
ما بيعرفوش عدل ف قسمة
حتى النبي ... ماله بياكلوه
****
عمر الخراب على طول ما يدوم
والثورة بكرة هتصبح عوم
ونقتل الخفافيش والبوم
ونهدم السور واللي بنوه

#سليمان_الزهيري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات