زيتوني فاتح .. زيتوني غامق مع جرغد مقلّم - مشاهد من الشارع العراقي

محسن لفته الجنابي
كاتب عراقي مستقل
(Mohsen Aljanaby)

الحوار المتمدن-العدد: 3957 - 2012 / 12 / 30 - 01:46
المحور: كتابات ساخرة
    

اليوم كنت كَاعد بمكان بيه تجمع وكان معي مجموعه كلهم أكبر منّي وأجانا شاب زغيروني ما أعرفه لابس قميص أسود ذكرني بالزيتوني بس الموده شويّه أطوخ من ذيج التعرفوها أم الجارلس والعسكري , أفتر سلّم علينا و جابه حظّي الأغبر ولطش بصفّي , أتوقعته مولود توالي الثمانينات أبن البارحه , كان يتكلم بزوده ويقاطع أي واحد من عدنا رغم أن كل الكَاعدين أكبر منّه بالعمر والمكانه والخبره , كلما واحد يجي يسلّم علينا يطبره و يطلعه من الكلّجيّه .
أجه رئيس لجنه حقوق الأنسان بمجلس النواب سلّم علينا ولما راح , كَال عليه بعثي وحرامي ومرتشي .
وراها أجه نائب سابق هم طلعه بايك الله وخلق الله و أرهابي من ذيج الصفحه , وراها أجه واحد ماله علاقه بالسياسه وشخصيه معروفه , كَال هذا كافر و يشرب عركَ , سألته شلون عرفت , شفته بعينك ؟
كَال : ماشفته بس متأكد لأن مبيّن من شكله ومادام مزيّن لحيته بالموس أكيد كافر ومرتد ويستحق الحد والقتل , وبدأ يكَص بالوادم وجابهم بالسرة ماخلّا واحد من الكَاعدين ماشتمّه لسابع ظهر و كل شويه يكَوم يرعد , حتى وصلها للعبوات و حلف ميت يمين لو يوكَع بيده أي واحد منهم يفجره و يشرب من دمّه ويمرعده
سألته : زين عمي .. أنتَ ألمن تحب وتحترم و تقدّر ؟
كَال : بس قائدنا المفدى الأوحد
جاوبته : بابا قائدكم واحد من المسؤولين الوصلونا لهالوضع المقرف وعنهم مايختلف , يجوز بس باللبس , بعدني ماكمّلت .. أشو هذا الوليد تخبل عبالك ضربته طلقه وعيونه كامت تجدح نار مثل وايرات الكهرباء لما الدنيا تمطر , وكَام يصيح بعلو صوته :
قائدنا شريف و ماكو منّه و سوّاه منزّل من السماء وبس هو باللعب وكَام يخطب :
آني وآني مكتبي بساحه الخلاني وأبن عمّي ملازم دمج بالفوج الثاني .. وغطّوا وجوهكم من الصوت و السبابيل الوصلت لأبو غريب و العبيدي وسدت الطريق الدولي

حقيقه آني هم خفت , لأن هيج نمّونه مسودن وبيده فاله ممكن كُلشي يسوّي , وطيّبت خاطره بكلمتين و دزّيتله على جاي ويّاه كَلاص مي بلاستك معقم أريده بس يسكت خاطر أخلص , ولما كًمت أكيد قرضني وظلّيت أباوع وراي ورحت لسيارتي فحصتها , أخاف من التايهات والمغطايّات من لواصق وعبوات لأن داعيكم غشيم وأحجيها مثل ماهيّه ودائما"أوكَع نفسي بمواقف مشابهه و كًلشي يصير بهالبلد , فالتطرف والتسقيط و القتل بسبب الرأي صار مودة عند المراهقين وكلمن يريد يصير شقاوه وياخذ على الوادم يروح يلبس زيتوني طوخ وياه جرغد مقلّم ويفوت بفاله ومحد يكَدر يفك حلكَه ولايتنفس ..
بقى أكو سوأل دمرني : هذا الوليد وأمثاله شلون يتعاملون ويّه أبهاتهم وأمّهاتهم وعوائلهم , الله يساعد أهلهم وجوارينهم وكل مناطقهم أكيد مراويهم نجوم الظهر ...
ناخوشه على كولة صاحبي علي كمال وشلون واقع طايح حظّه , كل العالم يتقدم بأخلاقه وأحنا نرجع لي وره وعمت عين كل واحد صار سبب بضياع الأخلاق والتربية وتدمير الأجيال و تفكك المجتمع
وعفتهم وجيت وأخذت حب وجع راس ولطمت

#محسن_لفته_الجنابي (هاشتاغ)       Mohsen_Aljanaby#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل