علوة حجي خضر

محسن لفته الجنابي
كاتب عراقي مستقل
(Mohsen Aljanaby)

الحوار المتمدن-العدد: 3944 - 2012 / 12 / 17 - 12:08
المحور: كتابات ساخرة
    

ضاع الكَبّان بعلاوي الحلة وكَامت الحماميل تفرهد , كَوتره و چوم چوم ولحم على باريه و عكَط
حماميل حجي خضر تكَوشر وتبيع بسوكَ الحراميه واحدهم وصل للناموق و كَام يعامل على عمارات الرشيد ويريد يشتري سيف القشله و سوكَ الشورجه شلع ولما يسألوه منين أجتك يكَول : رزق وأجاني للحلك
والقسم اللاخ كانوا كتّاب العلوة يشتغلون عنده بأكل بطونهم وقانعين بمصرف يومهم و كل واحد عايش بحلم بلكي يهمش شليف و يبيعه ويصير باشا وياخذ صوره ويّه الخاتونه شمسي قمر هلال الصبح , تشوف واحدهم مثل چلب المزابل طول عمره سارح بالتايهات ويموت وعينه على المزبله , نكتوا بالحجّي وصاروا كتّاب بعلاوي الحرامية بذاك الصوب , وحقهم لأن يدارون خبزتهم , وأكل الخبز مر ويحتاج فن و تلّون .
أما الناس الفقره فشغلتهم عجيبه وصعبه , بس يتفرجون ومالهم علاقة بالموضوع واحدهم يمر يصفن و يفرفر براسه مثل الأطرش بالزفّه ما يعرف الترعى من التشتر من الخروف السنونه درد , دكَه ومدكَوكَه يشبع بطنه و ماعنده غير سالفة الكهرباء و جوارينهم أم سعد يسولفها مثل أي سالفه على السلاطين والشاطر حسن , لوتذبحه مايحط روحه بالوسطه لأن بيه خوفه من الچرخچي و العربنچي و المطهرچي , حقّه , الشغلة صدك صعبة , منين يجيب كَلب ميّت و يصير قوي وشقي و ماينجرع حتى يفزع للحجي المتفرهد .
حجّي خضر شايب تعبان عيونه جرك و مايعرف الخمسه وعشرين من الألف وربع وأولاده عافوه لوحده لأن مابيهم خير , حايرين بالمكسرات و الريسز و العركَ وراح بالرجلين من وراهم , وصار مضرب الأمثال لكل واحد يضيّع صول چعابه ومايحسب حساب الوكت , لأن أكيد تكثر سچاچينه و تطلع مصارينه , الله يرحمه لحجي خضر بهاي الليله الزمهريرة , خطيّة تفرهد وتفدرل وتوزع حصص مثل خبز العباس لما وزعته حميده بسوكَ الغزل وتالي عمره شافوه جماعة وكان يشحذ العشر فلوس بتقاطع الشاكريه من جهة جسر الجمهورية العابر لباب الشرجي و صارت سالفته بحلوكَ العالم مثل العلچ .... لاتدخلونا بأيراد ومصرف , تره هاي السالفه ماألها علاقة بأي واحد ولحّد ياخذ على روحه خصوصا" أولاد حجي خضر

#محسن_لفته_الجنابي (هاشتاغ)       Mohsen_Aljanaby#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل