مشوار

محمد علي ثابت

الحوار المتمدن-العدد: 3074 - 2010 / 7 / 25 - 15:35
المحور: الادب والفن
    

أول الحكاية
لو الحكاية لها أول
إني كنت في زيارة
وماكنتش ناوي أطوّل
لكن زيارة لمين؟
مش عارف
حقيقي مش عارف
جايز لحد أعرفه
وجايز لحد معرفوش
جايز لحد بحبه
أو لحد مابطيقهوش
مش عارف
ولا فاكر
وماتفرقش كتير
المهم إني نزلت في ميعادي
اللي أصلاً معرفش مين حدده
وفضلت ماشي، ماشي
شوارع تشيلني
وشوارع تحطني
شوارع فيها مطرة
وشوارع حر نار
شوارع فيها ناس
وشوارع كما الصحرا
شوارع زحمة
وشوارع ضلمة
شوارع فيها خُضرة
وشوارع من عَدَم
وفي كل شارع رصيف
وإشارة مرور خضرا
وبقيت أنا محتار
في أي اتجاه أمشي؟
وإزاي إذا مشيت في اتجاه
أضمن إني ماندمشي؟
وإكمني كنت مستعجل
ولا يمكن أبدأ م الأول
وعايز أرجع أوام
من تاني على بيتي
من تاني على أوضتي
لقيتني بقول خلااااص
أنا أحط لنفسي أساس
وعليه أمشي على طول
يعني أطاوع الصوت اللي جوايا
يقول يمين، أروح يمين
ناحية الشمساية، والحَر، والرملة
يقول شمال، أروح شمال
ناحية المطرة، والسقعة والضلمة
يقول الصوت طوالي
أخليني ماشي طوالي
يقول وَقَّف شوية
أركن على أي جنب
وآخد نفس عميق
بس المهم أفتكر
أنا مشيت إزاي
عشان أعرف أرجع من تاني
لنفس مكاني الأولاني
وفعلاً بدأت أطاوع خيالي
وأمشي في اتجاهه
شوية طوالي
وشوية داير مايدور
شوية يمين، شمال، قدام، ورا
وهكذا، بقيت عَبد لخيالي
مش من كُتر خصوبته
ده أنا مُرْغَم لا بطل
وهو كان قدامي بديل تاني؟
وبقيت بسيب ورايا علامات
أو تقدر تقول،
بقيت أحفر في الطريق ذكريات
مرة على رصيف حطيت صورة حد غالي
ومرة حفرت اسمي على لون الإشارة الأخضر
ومرة بنيت جبل رملة على شط من الشطوط
وعلى حيطة مهجورة فضلت أرسم خطوط
وهكذا دواليك
علامات، معاليك
لحد ما علِّمت الطريق كله
طريقي اللي اخترته أنا
بخيالي، وبصوتي الداخلي، وبكياني، وبحدسي
طريقي المفروش علامات من يومي ومن أمسي
وفضلت ماشي، ماشي
مش فاكر كام ساعة بالضبط
أو جايز كام يوم
معرفش
وتعبت طبعاً من المشي
وعطشت جامد أوي
والمياه اللي معايا خلصت
ولا كانت فيه أي مياه حواليا
ولا حتى مياه مالحة
لأني مشيت أكتر في ناحية الصحرا
وبقيت جعان جوع كافر
وخلااااص، بقيت مش قادر
ولا نخلة ولا بلحة
ولا فوقي طيور سارحة
تحط عالأرض، وبزلطة أرجمها كما الصياد
ولا سمكة قدامي سابحة
أصطادها برمح أصنعه من خشب الطريق
ولا حواليا بشر
أتاريني بالمختصر
وصلت في النهاية
لطريق مسدود
في آخره سد عالي
سور ضخم وغريب
مقدرش أتسلقه
أعلى من خيالي
وأعلى من عينيا
ووصلت لحد عنده
ولسه فيَّا بقايا عِند
ودقيت عليه كتير
قال إيه بحاول أهدمه
في الأول كان شديد
زيي تماماً، عنيد
خَلاني أترعب
لكني لقيت في السور فجوة
لقيتها بالصُدفة
حقيقي، بالصُدفة
جايز تكون مَخْرَج ليَّا من هنا
أعبرها وأنجز منها مشواري
لكن ثواني ثواني
آه يا حيرتي ياني
الفجوة مش أد جسمي
أصغر مني بكتير
محتاج عشان أدخلها
أرجع عقدين لوَرَا
أو أبذل دلوقتي مجهود كبير
شوية دقدقة بالعضلات
شوية تخبيط وتوسيع، بالمخ
وشوية طبطبة بحنيَّة
وعملت ده كله
وإديت للفجوة بوسة كمان
وقلتلها: يا ست يا فجوة
اتفتحي يا فجوة
لجل ما أشوف فيه إيه وراكي
إيه مستخبيلي على ناحيتك التانية
يمكن يكون بحر
يمكن جبل
يمكن إشار مرور حمرا أو خضرا
ويمكن بشر يعرفني ما ينكرني
والحق يا سادة
إن الطبطبة جابت نتيجة أحسن من الدقدقة
وكمان من التخبيط
ولمحت، وأنا بطبطب، فوق الفجوة بشبرين
أو قول تلاتة
مشروع فجوة تانية
يادوب مستنية على خبطة
من اللي بالعقل
نفسها تتخبطها
عشان تتفتح عالآخر
وأوامك اتصرفت
وإديتها طبعاً فوق الخبطة
كذا خبطة وخبطة
ولقيتها بسرعة بتتفتح
مش هي بس
دي فتحت مجرى طويل
بينها وبين الفجوة الأقدم
وزي الرهوان عَدِّيت من بين الفجوتين
بمنتهى السهولة
وقمت بدور البطولة
ونطيت عالبر التاني
اللي ورا السد الغريب
اللي كان من شوية راعبني وماليني بالإحباط
وفجأة لقيتني بقرَّب، بقرَّب من مشواري
من الناس اللي رايح لهم، من غير ما أعرفهم
والحاجات اللي لازم أقولها وأعملها، من غير ما أفهمها
ولما دخلت البر التاني
كانت صدمتي كبيرة
وسخريتي من نفسي أكبر
أصلي، في آخر الحكاية
لقيتني في نفس مكاني الأولاني
اللي اتحركت أصلاً منه
والسور أتاريه كان جدار أوضتي
وطبعاً بقيت أضحك على خيبتي
وبقيت مش عارف أنا اتحركت ليه
أو مين على الحركة زقني
ومين على الرحيل وزِّني
وما نابني غير إني اتعطلت عن بُكرة
وخسرت بالمرة مجهود وكام ذكرى
بالذات صورة الحد الغالي
اللي كان طيب قوي
ومكانش باقي عندي من ريحته
غير الصورة
بس بعد نوم عميق على سريري
صحيت مبسوط ومنفرجة أساريري
وقلت لنفسي،
وأنا بشرب كوباية الشاي الصباحية،
إيه يعني مشوار فِشِنْك؟
مش اتعلمت وطُفت وشُفت؟

#محمد_علي_ثابت (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل