هذا اللي ناقص ياعالم!!

محمد الرديني

الحوار المتمدن-العدد: 3052 - 2010 / 7 / 3 - 09:40
المحور: كتابات ساخرة
    

بعد انتشار داء السرطان في محافظات جنوب العراق بفضل نائب العريف السيد ابن السيد علي الكيمياوي وولايات الفقيه ، وقتل الالاف الابرياء في كربلاء والنجف قبل 19 سنة على يد حسين كامل ، وبعد تيتم اكثر من مليون طفل وتشريد مئات العوائل الى بلاد الله الحارة والباردة منذ ذلك الحين ولحد الان، وبعد انتشار تجارة بيع العمائم والمسبحات " اليسر" وماشابهها، وبعد كل هذا وذاك كتب طلاب احدى المدارس الاعدادية في دفاتر الانشاء:
- دولة ماكو... اقلام رصاص ماكو...برلمان ماكو.. حكومة ماكو..رئيس عشيرة أكو..لطم أكو..صوبات علاء الدين أكو بس كيروسين ماكو..مبردات أكو بس ميغاواط عوازة ماكو..احزاب أكو بس ضمير ماكو..تمثال حمورابي أكو بس راسه ماكو..السيستاني أكو بس الغيرة على الناس ماكو..دولارات امريكية أكو بس العدالة ماكو..هيئة النزاهة أكو بس محلات لبيع الشرف والكرامة ماكو.
واغلق الطلاب دفاترهم حين دق الجرس معلنا انتهاء وقت الامتحان، فيما كان مدير المدرسة يعد خطبة قصيرة يلقيها على ابنائه لاعجابه باحترامهم للوقت رغم انه اصبح عملة نادرة في المنطقة الخضراء.
ومن سوء حظ هذا المدير وهو من الشخصيات التربوية المعروفة بنزاهتها والمرشح لاستلام حقيبة وزارة التربية والتعليم العالي، ان يرن جرس الهاتف في مكتبه ليتم استدعائه على عجل الى ديوان وزارة الصحة لمقابلة الوزير هناك.
ما أن دلف – حلوة دلف واعتقد انها مقتبسة من اسم المرحوم ابو دلف – الى مكتب وزير الصحة حتى بادره الاخير بصوت مبحوح:
اسمع، جاءتني تعليمات حزبية مشددة قبل قليل بعدم تجديد ترشيحي لوزارة الصحة وضرورة اعتذارك عن قبول حقيبة وزارة التعليم.
فقاطعه مدير المدرسة قائلا:
عيني مو تفاهمنا مع الزعيم الشاب وحلينا المشكلة بكم بير نفط شنو يريد بعد؟.
لك لا مو هاي القصة.
لعد شنو؟؟
انت تعرف جماعتنا العراقيين، ممكن يسكتون عن الكهرباء والماء ومايهمهم يعيشون فوق او تحت خط الفقر لانهم معتادين بس من توصل الى الاولاد ترى كراسينا راح تطير.
بس شنو ماتفضه؟؟
وصلتني نسخة من مقال منشور بالانكليزي في جريدة "الغارديان" البريطانية.
يكولون هاذي خوش جريدة بس مو انت تعرف انا بالانكليزي مثل ما انت بالصيني.
مو وكته هسه، اقراها بالعربي سكرتير الرئيس ترجمها وبعثها الان.
وقرأ مدير المدرسة ويالهول ما قرأ :
( ذكرت صحيفة "غارديان" البريطانية امس أن المدير التنفيذي السابق لشركة أوكتيل الكيميائية البريطانية بول جينيغز يواجه خطر تسليمه الى الولايات المتحدة الأميركية بعد أن أقرت الشركة دفعها لمليون دولار كرشى لمسؤولين عراقيين وأندونيسيين، لضمان استمرار بلدانهم في شراء الوقود السام منها.
وأضافت الصحيفة قائلة إن جينيغز وسلفه دينيس كيريسيون قاما بتصدير أطنان من مادة "رابع أثيل الرصاص" إلى العراق، وهي مادة محظور استخدامها في السيارات في الدول الغربية لما لها من أضرار تؤدي إلى تلف المخ لدى الأطفال.
ويعتقد أن العراق هو الدولة الوحيدة الذي ما يزال يضيف هذه المادة إلى الوقود.
ونقلت الصحيفة عن أحمد الشماع وكيل وزارة النفط لشؤون التصفية وصناعة الغاز قوله إن هناك عددا من كبار المسؤولين النفطيين في البلاد متهمين بتلقي رشى خلال الفترة التي تلت العام 2003، مضيفاً أنه سيقوم في التحقيق في هذه المعلومات.
ونفى الشماع أن يكون هو نفسه قد أخذ إجازة مجانية في تايلند على حساب الشركة البريطانية( انتهى الخبر).
تذكر مدير المدرسة خطبته التي كان يزمع – حلوة يزمع - اسماعها لطلابه قبل ساعات وقرر بينه وبين نفسه ان يجري تعديلا يشمل التحذير من مخاطررابع اثيل الرصاص، ويجب ان يقول لهم كذلك ان هذا الاثيل مو نفسه اثيل مال "الكسلة" في الزبير لانه سام ويكولون قاتل همينة.
سمع وزير الصحة يقول:
شبيك صافن؟؟
لالا ماكو شي، افكر باولادي يريدون يرجعون من اجازتهم في تايلند بعد يومين، خليني اروح ابعث لهم ايميل واقنعهم يبقون هناك.
وشلون اذا انتشر الخبر وعرفوا الناس ببلاوي هذا الاثيل.
بسيطة ، نكذب الخبر ونقول العبارة التالية "هذا الخبر عار عن الصحة".
عيني هاي مو جريدة تصدر بالعراق .. هاي جريدة عمرها اكثر من 150 سنة وماتنشر اخبار مثل جماعتنا من يجتمعون من اجل مناقشة القضايا ذات الاهتمام المشترك؟.
وبصوت ساهم وربما سارح همس المدير : اي ، نعم ، نعم
ولك اشبيك شو انخرست؟
لا والله، بس جاي افكر هل صحيح احمد الشماع سافر الى تايلند على حساب هذه الشركة؟ نياله على الاقل شاف بلد حلو بيه حوريات جميلات.
بس هو نفى الخبر.
لو تقرأ الخبر زين راح تشوف منو الصح ومنو الكذاب.
خلينا بالمصيبة اللي احنه فيها.
اي مصيبة ،عيني هاي سهلة انت اجتمع بالاطباء وحذرهم من التصريح باي كلام للصح ومن جانبك اعقد مؤتمر صحفي كول فيه ان حرب الخليج مازالت آثارها السرطانية مستشرية بالبلد.
يعني شنو مستشرية؟؟
يعني منتشرة ايها الوزير، وخلي السكرتير يكتب اخبار عن الجهود المبذولة في مكافحة السرطان والجدري وانفلونزا العصافير والكحة الديكية.
طيب هاي فهمناها، والرشاوي.
يامعود، منو يقرا منو يكتب، عمي الناس اعتادت على سماع هذه الاخبار وصار عندها حصانة وماعاد الواحد بيهم يهتم ، ماسمعت المقابلات بالراديو، بعضهم يكول خلي يسرقون بس نريد كهرباء ياناس.
وغادر مدير المدرسة على عجل وقبل ان يقترب من المصعد سمع الوزير يصيح:
ولك سكرتير سويلي مؤتمر صحفي بس بسرعة والله.

#محمد_الرديني (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل