خواطر لعيد

حسين جهيد الحافظ

الحوار المتمدن-العدد: 2487 - 2008 / 12 / 6 - 03:55
المحور: الادب والفن
    

--- الخاطرة الأولى.... الى فيروز
مر العيد .... مر بي
مر وهاجت أحزاني
مر وعيدك اِمبارك
حزينه اِبطارف اِلساني
حرت المن أگولنهه
ذبحهه البعد ... أذّاني
گمت واِبشوگ المفارج
تلوب الروح بالحسره
تهت وي صوت فيروز
وصده الذكره
(( زوروني بالسنه مره
حرام تنسوني يالمره حرام ))
حرام اللي يحب حبه
يظل يتكسر اِبصدره
حرام اِتذوب روحي وتحزن ألحاني
مر العيد ...... مر بي
مر وهاجت أحزاني

--- الخاطرة الثانية ... الى مي ووحيد
مرالعيد ..... مربي
أعاين للوكت متبسمره أيّامه
أشوف الليل عام اِيمر
وتمر جيثوم أحلامه
أشيل العين للساعه
شجاهه ميل الثواني غيّر أطباعه
نسه يفتر .. نسه لو وگفته سهله
نسه ما يسمع اِشغنّوا
وبالعيد الغنه يحله
(( اِستعجل يا زمن يالله
اِسنعجل عليك الله ))
اِستعجل خلّه يفرح بيك


گلبي وينسه آلامه
مر العيد ...... مر بي
أعاين للوكت متبسمره أيّامه

--- الخاطزة الثالثة ... الى ياس خضر
مر العيد ..... مر بي
رحت وي طيفكم سارح
أصفن وأحسب الصفنات
شفت روحي اِبسوالفكم
شفه اِتصير للضحكات
فرح والناس بي اِتلوم
خل اِتلوم كل الناس
گمت أنذر وأوفي اِنذور بالاِحساس
عجنت الشوگ بالصفنه
وعلگت اِشموع ( خضر الياس)
ذبت بسكوت وي شمعي
وطحنت الروح حنه وياس
لني اِبصوت غنّاكم
يا محله الغنه لو بيه طرواكم
سرحت اِوياه ولن عيني
دمعتي اِبشوگهه اِتهلهه
(( أعزاز عدنه ومن هويناهم
هوينه الناس كلهه
اِو يا عشكهم كبرت الدنيه بأهلهه ))
كبرت والحزن مذبوح
عيد وغنّن النجمات
وآنه العيد مر.. بي
أصفن وأحسب الصفنات
--- الخاطرة الرابعة ...الى صديقه الملايه
مرالعيد... مر بي
حزين وحزناني اِوياه
فاضت روحي حنيه
رديت وحزن روحي
ذبح كل فرحه طاريه
حرت وأدري الحچي البي



حچي الهم..... حچي لي
حچي گلبي ..... حچي اِهوايه
حچي حبهم...... حچي حبي
حجي شوگي ..... للولايه
حچي دافي ............ حلو اِتغنيه الملايه
صديقه يا وتر حزنان
غنّيني
غني بيهم
غني بي
(( للناصريه ... للناصريه
بو اِجناغ أريد اِوياك للناصريه))
مر العيد... مر بي
حزين وحزناني اِوياه
فاضت روحي حنيه

* كتبت بتاريخ 13 ذي الحجة سنة 1403 هجريه--- 13 تمّوز- 1983
في اليوم الثالث من عيد الأضحى المبارك حيث إذاعة صوت الجماهير
وبرنامج ( ما يطلبه المستمعون )والأغاني التالية

1- زوروني بالسنه مره---- لفيروز
2- اِستعجل يا زمن يالله ---- لمي ووحيد
3- أعزاز ---- لياس خضر
4- للناصرية ---- لصديقة الملاية
الزمان أعلاه
المكان معسكر اِسبيلك --- خليفان / أربيل

#حسين_جهيد_الحافظ (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل