رايحين علي فين؟؟؟!!!

ميلاد ثابت إسكندر
(Melad Thabet Eskander)

الحوار المتمدن-العدد: 6859 - 2021 / 4 / 4 - 09:04
المحور: الادب والفن
    

يدخل الممثل ويلقـي التحيــة علي الجمهور ثم يطرح فكـرته بطريقة كوميديـة سـاخــرة.
الممثل: عايز أكلمكم عن موضوع غاية في الأهمية ( إحنا رايحين علي فين ؟ ) فيه شوية مفارقات حصلت معايا خليتني حقيقي أطرح السؤال ده، أنا بحب أوي الأفلام الوثائقية، من فتره شوفت فيلم عن كوكب اليابان الشقيق أه والنعمة زمبؤلكم كداهوَّن كوكب اليابان الشقيق اللهم لاحسد، وعين الحسوووود فيها عود، أيه ده ؟! أيييييه ده ؟! ( بصوت أعلي ) بقي دول كانوا مضروبين بناواوي من ييجي 72 سنه بس ؟!! أشك في ذلك ، ما هو يا إما القصة دي متفبركة زي تاريخنا، يا إما القنابل بقي كانت زي بومب وصواريخ العيد عندنا !!!!!!! أيه الحضارة دي ؟!! علي فكره أنا مش هكلمكم عن اللي وصلوله في مجال التكنولوجيا والأليكترونيات والصناعة والفضاء وكل المخترعات. أنتم أكيد عارفين كله ده، أنا اللي هيفرسني الفيديو اللي شوفته، أنا هكلمكم عن نهضة اليابان في ال ( w . C) أه زي ما سمعتوا بالظبط، في التواليت ، أو بالبلدي كده بيت الراحة ، بس بيت الراحة أيه !! ده يتقال عليه بيت الهنا ، بيت العز يا بيتنا يا مزود حسرتنا....حاجة مختلفة عن هنا خالص أوبشان غير عادي يا جماعة وكله ، بالتاتش ،، اللمس يعني !!! زرار عشان الشطاف يخرج من مكانه المحدد، وزرار عشان قوة ضغط الميه في الشطاف، كل حاجة معمول حسابها يعني لا تقولي بقي محبس مفوت ولا جلده مقطوعة، ما علينا ،وزرار عشان درجة حرارة الميه ، تخيلوا، أنت اللي بتحدد درجة الحرارة اللي أنت عايزها يعني مافيش حاجة عشوائي كده،وأيه كمان ... أه ، وزرار للإضاءة المحببه ليك وزرار للموسيقي وبرضو بتتحكم في مستوي الصوت: ترفعه في حالة لو كنت مكسوف من الأصوات اللي هتصدر من حضرتك وخاصة وأنت ضارب كشري أو محشي ،، فهمين قصدي طبعاً ، اه أنا نسيت أقولكم أن في كيس بلاستك بيلف علي مكان السديلي مكان ما بنقعد وبيتغير توماتيكي بعد كل مره ، ده غير السينسور عشان درجة حرارة السديلي شتوي وصيفي، يعني رفاهية ولا في الخيال، كله ده كوم وفيديو المواصلات كوم تاني خالص ،لسه شايفه الصبح قبل ما أنزل وأجي الكلية ، طبعا ده عايز يوم بحاله عشان أوصفه، لكن المفارقة العجيبة دي خلت شعوري بالإستياء من مواصلاتنا زاد وتعمق بعد اللي شوفته، أنتم لو تعرفوا أنا باجي الكليه إزاي هتعذروني ،، دي مش عربية خالص يا جماعة ، تخيلوا وإحنا في القرن الواحد والعشرين والعالم بيكتشف كواكب جديده ورايحين جايين علي القمر والمريخ والمحطة الفضائية ، وأنا لسه بركب العربية ... قصدي ( شبه العربية ) بتاعة قريتنا، ما أنا ماينفعش أكدب وأقول عليها عربية أبداً ،، دي أساساً الخواجة صانعها عشان نقل البضايع والمواشي ؟؟!! قوم إحنا بقي أيه ,, فكرنا !!! وياريتنا ما فكرنا، روحنا عملنالها صندوق من ورا وكنبتين خشب المسافة اللي بينهم تخليك لازق في وش اللي قدامك، وياريتهم متنجدين ، دأنا وسطي إتخلع وخصوصاً في المطبات ، تقولشي راكبين جمل !!! لأ والمصيبة بقي لو ركبت جنبك بنت ،، مع كل مطب حضن، ويقولولك بنحارب التحرش !!! وبعد المعاناة دي توصل الجامعة وتلاقي يافطة طويلة عريضة مكتوب عليها ( افتخر أنت في جامعة بني سويف ) محسيسني إني داخل جامعة كامبريدج ، مع تقديري وإحترامي لكل جامعات مصر، إحنا أساساً خرجنا خالص بره التصنيف العالمي لجودة التعليم ،، وأفضل جامعات العالم ، حقيقي مفارقات عجيبة ، والسؤال ؟ إحنا رايحين علي فين؟؟؟!!!

#ميلاد_ثابت_إسكندر (هاشتاغ)       Melad_Thabet_Eskander#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات