صُب الشاي

ميلاد ثابت إسكندر
(Melad Thabet Eskander)

الحوار المتمدن-العدد: 6655 - 2020 / 8 / 23 - 17:16
المحور: الادب والفن
    

دنيا غريبـَة وعالـَم أغـرَب ، ولا هَقـدر غير أنـي أسـتَـغــرَب
أقعُـد نرغـي أنا وأنتَ شوَّيـَّـة، وبلاش أعذار علشـان تهــرَب
لحظة هَحُط الشاي ع النار. أهو نتسَّلَي أنا وأنت يا صاحبي
أصل أنا فاضي ليل ونهـار، والفيس بوك عَدَمنـي وطاحبـي

أيوَّه زمان كان عندي طموح، أني راح أعلَي لفـوق وراح أكبَر
وإللي قدرت أوصَّلُـه سطوح ،، بيت في الحــارة كمـان متـأجَّر
******** هههههههههههه ********
أيوَّه يا سيدي أنا بضحَـك، مالك !؟! أنا لسه بعقلي وماتجاننتش
اضحك أنت كمان علي حالك ، دي بداية القصة أنا ما أتكلمتش

صُب الشاي بقَــي واسـنـد ضَهـرَك، وناولنــي أكبـَـر كوبايـَّـة
وانسَـي الدنيــا وروَّق فكــرَّك، شُـرب الشاي ع السطح حكايّة

ارفع راسك بُـص لفـوق، عِـد نجـوم السمــا لو تقـدَر
لمـا أتأمل فيهــا بَفـوق ،، من أوهامي وبحمد وأشكُـر

بص يا سيدي، أنا حالي أتغّـيَّـر، كنت زمان حال غير الحال
ماكنتـش حاسس أني صُـغَـيَّـر !!! أحلامـي كانت وهم خيال

أيـوَّه أنا عَنـدي يامـا مواهــب ،، ربنا شكـلهـا فـي تكـوينـي
وف محـراب الفن أنا راهـب، كَـبَّرت أنا نفسي قُصاد عيني

تفكيري اتمّحوَّر علي ذاتي، إزاي أبقي كبير مشهور
والناس تتمـنَـي تحياتي، ويشاوروا عليَّ !!! مغرور

ومعارض بقـيَ هنا وهناك، والمسـرح يستنـي لؤاك
وجــرايد تكتب وتفَشَّـر، نجـم جـديـد وسـط الأفـلاك

ونسيت أني تراب مش أكـتَـر، وحياتي في حقيقتها بُخار
يظهــر لثـوانــي ويـتـبَـخَّـر ، والوَهم في يـوم راح ينهار

وأسانســير المَجــد الباطل ، أتعَّطَّـل فـجــأة وأنا فيــه
وطموحي في لحظَة بقَي عاطل، والفكر اتغَيَّر معانيه

تجــربــَة كانت قاسية كتير، لكن درسهــا كان مفهوم
كل إللــي بيحصَل للخيـر، حتي لو كان مش مَهضوم

من يومها سَـلِمـت الدَّفَة ،، ورَفَعـت شراع للسما فوق
وف حبُه يوماتي بَتدَّفــا ،،، مهما تعتِم جـــاي شـروق
ده سلام ربنا غطَّي وكفَّا ،، أصلُه الخالق مش مخلوق
*******************

#ميلاد_ثابت_إسكندر (هاشتاغ)       Melad_Thabet_Eskander#          

---

اشترك في قناة ‫«الحوار المتمدن» على اليوتيوب
حوار مع الكاتب التونسي د. هشام القروي حول تعدد الاحزاب والديمقراطية في تونس والعالم العربي بشكل عام	حوار مع الباحثة اللبنانية د. ريتا فرج حول الاسلام والجندر واتجاهاته الفكرية في التاريخ المعاصر

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات